BRICS Summit Xi Jingping: ભારતની અધ્યક્ષતામાં તાજેતરમાં 18મી BRICS સમિટનું સફળતાપૂર્વક આયોજન થયું હતું. ગલવાન ખીણની અથડામણ બાદ ચીનના રાષ્ટ્રપતિ શી જિનપિંગની આ પ્રથમ ભારત મુલાકાત હતી. ભારતે પોતાની રાજદ્વારી કુશળતાનો પરિચય આપતાં સભ્ય દેશોને એકસાથે લાવી 'નવી દિલ્હી ઘોષણાપત્ર'ને મંજૂરી અપાવવામાં સફળતા મેળવી હતી. જોકે, આ સમિટ દરમિયાન ચીન દ્વારા રજૂ કરવામાં આવેલા પાંચ મુદ્દાના પ્રસ્તાવને કારણે તેના લાંબા ગાળાના હેતુઓ અંગે ચર્ચા શરૂ થઈ છે.
2027માં BRICS સમિટનું આયોજન ચીનના બેઇજિંગમાં
ચીન BRICSના માધ્યમથી વૈશ્વિક વેપાર અને રોકાણમાં પોતાનો પ્રભાવ વધારવા માગતું હોવાનું માનવામાં આવે છે. BRICS મૂળભૂત રીતે કોઈ વેપારી સંગઠન નથી, છતાં ચીન આ મંચનો ઉપયોગ પોતાના વેપારને વિસ્તૃત કરવા માટે કરવા ઈચ્છે છે. 2027માં BRICS સમિટનું આયોજન ચીનના બેઇજિંગમાં થવાનું છે. ચીન રોકાણ માટે અનુકૂળ નિયમો અને ટેરિફમાં ઘટાડા જેવા પગલાં દ્વારા પોતાના ઉત્પાદનો માટે નવા બજારો ઊભા કરવા માગે છે તેવી ચર્ચા છે.
ઓપન-સોર્સ AI સમુદાયોને પ્રોત્સાહન આપવાની વાત
જિનપિંગના પાંચ મુદ્દાના પ્લાનમાં વેપાર-રોકાણ ઉપરાંત આર્ટિફિશિયલ ઇન્ટેલિજન્સ પર પણ ખાસ ભાર મૂકાયો છે. ચીન BRICS દેશો વચ્ચે વિશેષ આર્થિક ક્ષેત્રો (SEZ)માં સહકાર વધારવા માગે છે, જેથી વેપાર અને રોકાણ સરળ બની શકે. સાથે જ LLM એટલે કે મોટા ભાષા મોડેલના વિકાસ અને ઓપન-સોર્સ AI સમુદાયોને પ્રોત્સાહન આપવાની વાત કરવામાં આવી છે. આ પ્રકારની ટેક્નોલોજી સહકારની આડમાં ચીન પોતાના ડિજિટલ અને ટેક્નોલોજીકલ પ્રભાવને વિસ્તારી શકે તેવી ચિંતા વ્યક્ત કરવામાં આવી રહી છે.
ચીની ઉત્પાદનોના વધતા પ્રવેશથી સ્થાનિક ઉદ્યોગો પર દબાણ
એકંદરે, ચીન BRICSને માત્ર આર્થિક સહકારના મંચ તરીકે નહીં પરંતુ વૈશ્વિક સ્તરે પોતાનો વેપાર અને ટેક્નોલોજીકલ પ્રભાવ વધારવાના સાધન તરીકે ઉપયોગ કરવા માગે છે તેવી દલીલો થઈ રહી છે. સસ્તા ચીની ઉત્પાદનોના વધતા પ્રવેશથી સ્થાનિક ઉદ્યોગો પર દબાણ વધી શકે છે, જ્યારે ડિજિટલ ક્ષેત્રમાં સહકારથી ડેટા સુરક્ષા જેવા પ્રશ્નો પણ ઊભા થઈ શકે છે. તેથી ભારત સહિત BRICSના અન્ય દેશો માટે ચીનના પ્રસ્તાવોનું મૂલ્યાંકન કરતી વખતે પોતાના આર્થિક અને વ્યૂહાત્મક હિતોને પ્રાથમિકતા આપવી મહત્વપૂર્ણ રહેશે.
