US Aviation News: અમેરિકાના ન્યૂયોર્ક રાજ્યના ચીકટોવાગા શહેરમાં આવેલા બફેલો નિયાગ્રા ઇન્ટરનેશનલ એરપોર્ટ પર જેટ ફ્યુઅલની અછત સર્જાતા હવાઈ સેવા પર ગંભીર અસર પડી છે. એરપોર્ટ પર વિમાનોમાં ઇંધણ ભરવાની કામગીરી અટકી જતાં અનેક વિમાનો જ્યાં હતાં ત્યાં જ અટવાઈ ગયા છે. સ્થિતિને ધ્યાનમાં રાખીને એરપોર્ટ સત્તાવાળાઓએ તાત્કાલિક NOTAM (Notice to Air Missions) જાહેર કર્યું છે.
જેટ ફ્યુઅલની અછતથી રિફ્યુઅલિંગ કામગીરી ઠપ્પ
એરપોર્ટ પર અચાનક જેટ ફ્યુઅલની ઉપલબ્ધતા ઘટી જતાં વિમાનોનું રિફ્યુઅલિંગ બંધ થઈ ગયું છે. જેના કારણે બફેલો એરપોર્ટને આવનારા અને ત્યાંથી આગળની મુસાફરી કરનારા વિમાનો માટે મુશ્કેલી ઊભી થઈ છે. ઇંધણની અછતના કારણે કેટલીક ફ્લાઇટ્સના શેડ્યૂલ અને રૂટ પર પણ અસર થવાની શક્યતા છે.
એરપોર્ટ પર NOTAM જાહેર
પરિસ્થિતિ ગંભીર બનતાં એરપોર્ટ સત્તાવાળાઓએ NOTAM જાહેર કર્યો છે. ઉડ્ડયન ક્ષેત્રમાં કોઈ એરપોર્ટ, રનવે અથવા એરસ્પેસ અંગે મહત્વપૂર્ણ અસ્થાયી ફેરફાર અથવા જોખમી પરિસ્થિતિ હોય ત્યારે પાઇલટ્સ અને એરલાઇન્સને તેની જાણ કરવા NOTAM જાહેર કરવામાં આવે છે. આ એલર્ટ દ્વારા બફેલો એરપોર્ટ તરફ જતાં વિમાનોને ઇંધણની સ્થિતિ અંગે અગાઉથી સાવચેત કરવામાં આવ્યા છે.
પાઇલટ્સને પાડોશી એરપોર્ટ પરથી ફ્યુઅલ ભરવાની સલાહ
રિપોર્ટ્સ અનુસાર, એરલાઇન્સ દ્વારા પાઇલટ્સને સૂચના આપવામાં આવી છે કે બફેલો એરપોર્ટ તરફ જતાં વિમાનો પૂરતા વધારાના ઇંધણ સાથે ઉડાન ભરે. જો કોઈ વિમાન બફેલો એરપોર્ટ પર રોકાઈને આગળના રૂટ માટે ઇંધણ ભરવાનું હોય, તો તેને નજીકના અન્ય એરપોર્ટ પર લેન્ડ કરીને જરૂરી ફ્યુઅલ ભરવાની વ્યવસ્થા કરવાની સલાહ આપવામાં આવી રહી છે.
ફ્યુઅલ સપ્લાય ટ્રકો દ્વારા પહોંચે છે
બફેલો નિયાગ્રા ઇન્ટરનેશનલ એરપોર્ટ પર જેટ ફ્યુઅલનો સપ્લાય પાઇપલાઇનના બદલે મુખ્યત્વે ફ્યુઅલ ટેન્કર ટ્રકો મારફતે કરવામાં આવે છે. હાલમાં ફ્યુઅલ સપ્લાય ખોરવાવાનું ચોક્કસ કારણ સત્તાવાર રીતે જાહેર કરવામાં આવ્યું નથી. સ્થાનિક ફ્યુઅલ ટર્મિનલના સાધનોમાં ખામી, સપ્લાય ચેઇનમાં સમસ્યા અથવા ઇંધણની ગુણવત્તા સંબંધિત તપાસને કારણે પુરવઠો અટક્યો હોવાની શક્યતાઓ અંગે ચર્ચા થઈ રહી છે.
હવાઈ મુસાફરો પર શું અસર પડશે?
ફ્યુઅલ સપ્લાય સામાન્ય ન થાય ત્યાં સુધી કેટલીક ફ્લાઇટ્સને વિલંબ, વધારાના સ્ટોપ અથવા વૈકલ્પિક એરપોર્ટ પરથી રિફ્યુઅલિંગ જેવી પરિસ્થિતિનો સામનો કરવો પડી શકે છે. હાલ એરપોર્ટ અને સંબંધિત સત્તાવાળાઓ દ્વારા પરિસ્થિતિને સામાન્ય બનાવવાના પ્રયાસો કરવામાં આવી રહ્યા છે. જોકે, ફ્યુઅલની અછતનું ચોક્કસ કારણ અને સપ્લાય ક્યારે સંપૂર્ણપણે પુનઃસ્થાપિત થશે તે અંગે સત્તાવાર સ્પષ્ટતાની રાહ જોવાઈ રહી છે.
