BRICS Summit menu indian food: દિલ્હીના ભારત મંડપમ ખાતે 11થી 13 સપ્ટેમ્બર દરમિયાન યોજાનારી 18મી BRICS સમિટને લઈને તૈયારીઓ અંતિમ તબક્કામાં પહોંચી છે. એક તરફ વિદેશી મહેમાનોની સુરક્ષા માટે કડક વ્યવસ્થા કરવામાં આવી છે, તો બીજી તરફ તેમના સ્વાગત માટે દિલ્હીની લક્ઝરી હોટેલ્સમાં ભારતની વિવિધતા દર્શાવતું ખાસ મેન્યૂ તૈયાર કરવામાં આવ્યું છે. બ્રાઝિલ, રશિયા, ચીન અને દક્ષિણ આફ્રિકા સહિત અનેક દેશોના નેતાઓ અને પ્રતિનિધિઓ આ મહત્વપૂર્ણ સંમેલનમાં ભાગ લઈ રહ્યા છે.
‘Tradition to Table’ થીમ પર ખાસ મેન્યૂ તૈયાર
નવી દિલ્હીની તાજ મહલ હોટેલે વિદેશી મહેમાનો માટે ‘Tradition to Table’ થીમ પર ખાસ મેન્યૂ તૈયાર કર્યું છે. તેમાં ભારતના અલગ-અલગ પ્રદેશોની જાણીતી વાનગીઓને સ્થાન આપવામાં આવ્યું છે. કાશ્મીરી મસાલેદાર અખરોટ, જૂની દિલ્હીની મૈદા કાજુ, રાજસ્થાનની મિની કચોરી, બંગાળની કુચો નિમકી, મહારાષ્ટ્રની ભાકરવડી અને તમિલનાડુનું મરુક્કુ સહિતની વાનગીઓ દ્વારા મહેમાનોને ભારતની વૈવિધ્યસભર ફૂડ કલ્ચરનો સ્વાદ માણવા મળશે.
ભારતીય અને આંતરરાષ્ટ્રીય વાનગીઓનું અનોખું સંયોજન
બીજી તરફ ધ લલિત હોટેલે પણ BRICS પ્રતિનિધિમંડળ માટે ભારતીય અને આંતરરાષ્ટ્રીય વાનગીઓનું અનોખું સંયોજન તૈયાર કર્યું છે. મેન્યૂમાં ગલૌટી કબાબ, તંદૂરી રોટી અને બાજરી આધારિત વાનગીઓ ઉપરાંત મિસો પેસ્ટ સાથેનું બ્રેઝ્ડ રીંગણ, ધીમા તાપે રાંધેલી ચાઇનીઝ કોબી અને એમ્બર સોસ સાથે જાપાનીઝ સ્ટાઇલ રાજમા જેવી વાનગીઓનો સમાવેશ કરવામાં આવ્યો છે. આ મેન્યૂ દ્વારા ભારતીય સ્વાદ સાથે આંતરરાષ્ટ્રીય ફ્લેવર્સનો પણ અનુભવ કરાવવામાં આવશે.
500થી વધુ CCTV કેમેરા તૈનાત કરવામાં આવ્યા
BRICS સમિટને ધ્યાનમાં રાખીને દિલ્હીમાં સુરક્ષા વ્યવસ્થા પણ અત્યંત કડક કરવામાં આવી છે. ભારત મંડપમ અને આસપાસના વિસ્તારોમાં આશરે 15 હજાર પોલીસકર્મીઓ, 200 પેરામિલિટરી કંપનીઓ અને 500થી વધુ CCTV કેમેરા તૈનાત કરવામાં આવ્યા છે. આમ, આ સમિટ દરમિયાન ભારત વિશ્વ સમક્ષ પોતાની રાજદ્વારી અને આર્થિક ક્ષમતાની સાથે દેશની સમૃદ્ધ ખાણીપીણી પરંપરા અને મહેમાનગતિની પણ ખાસ ઝલક રજૂ કરવા જઈ રહ્યું છે.
