Major Security Lapse at Delhi Airport: દેશના સૌથી વ્યસ્ત અને સુરક્ષિત ગણાતા દિલ્હીના ઇન્દિરા ગાંધી ઇન્ટરનેશનલ એરપોર્ટ પરથી એક ચોંકાવનારી ઘટના સામે આવી છે. એર ઇન્ડિયા અને એરપોર્ટ મેનેજમેન્ટની ગંભીર લાપરવાહીના કારણે ત્રણ ઇટાલિયન નાગરિકો કોઈપણ પ્રકારની ઇમિગ્રેશન તપાસ કે ક્લિયરન્સ વિના જ ભારતમાંથી વિદેશ માટે રવાના થઈ ગયા હતા. સુરક્ષા વ્યવસ્થામાં સર્જાયેલી આ મોટી ચૂક સામે આવ્યા બાદ દેશની તમામ સુરક્ષા એજન્સીઓ અને નાગરિક ઉડ્ડયન મંત્રાલયમાં ભારે હલચલ મચી ગઈ છે.
અમૃતસરથી દિલ્હી અને ત્યાંથી સીધા મ્યુનિખની ફ્લાઇટ
આ સમગ્ર મામલાની શરૂઆત ત્યારે થઈ જ્યારે આ ત્રણેય વિદેશી મુસાફરોએ અમૃતસરથી દિલ્હીની ઘરઆંગણાની (ડોમેસ્ટિક) ફ્લાઇટ પકડી હતી. અમૃતસર એરપોર્ટ પર જ તેમને બે બોર્ડિંગ પાસ આપી દેવામાં આવ્યા હતા - એક દિલ્હી જવા માટે અને બીજો દિલ્હીથી મ્યુનિખ (જર્મની) જતી લુફ્થાન્સાની આંતરરાષ્ટ્રીય ફ્લાઇટ માટે. નિયમ મુજબ, દિલ્હી એરપોર્ટ પહોંચ્યા પછી તેમણે ઇમિગ્રેશન કાઉન્ટર પર જઈને પાસપોર્ટ અને વીઝાનું ક્લિયરન્સ મેળવવાનું હતું. પરંતુ, એરપોર્ટ સ્ટાફની ભૂલના કારણે તેમને સીધા ઇન્ટરનેશનલ ટ્રાન્સફર એરિયામાં મોકલી દેવાયા અને તેઓ તપાસ વિના જ વિમાનમાં બેસી ગયા.
ગૃહ મંત્રાલયે બોલાવી તાકીદની ઉચ્ચ સ્તરીય બેઠક
આ ગંભીર સુરક્ષા ચૂકને ધ્યાને રાખીને કેન્દ્રીય ગૃહ મંત્રાલયે તાત્કાલિક ધોરણે એક હાઇ-લેવલ "ડેમેજ કન્ટ્રોલ" બેઠક બોલાવી છે. આ મહત્વપૂર્ણ બેઠકની અધ્યક્ષતા કેન્દ્રીય ગૃહ સચિવ ગોવિંદ મોહન પોતે કરી રહ્યા છે. આ સમીક્ષા બેઠકમાં નાગરિક ઉડ્ડયન મંત્રાલયના સચિવ, બ્યુરો ઓફ ઇમિગ્રેશનના કમિશનર, એર ઇન્ડિયાના સીઈઓ (CEO) તેમજ દિલ્હી એરપોર્ટના વરિષ્ઠ અધિકારીઓ હાજર રહ્યા છે. સુરક્ષા પ્રોટોકોલમાં થયેલી આટલી મોટી ભૂલ માટે કોણ જવાબદાર છે અને ભવિષ્યમાં આવી ઘટના ન બને તે માટે આકરા પગલાં લેવાની તૈયારી ચાલી રહી છે.
નાગરિક ઉડ્ડયન મંત્રાલયે એર ઇન્ડિયા પાસે માગ્યો જવાબ
કેન્દ્રીય નાગરિક ઉડ્ડયન મંત્રાલયે આ ઘટના અંગે 12 સપ્ટેમ્બરે જ એર ઇન્ડિયાને કારણ દર્શાવો નોટિસ ફટકારી હતી અને વિવિધ પાસાઓ પર સ્પષ્ટતા માગી હતી. સુરક્ષા એજન્સીઓ માટે સૌથી મોટો સવાલ એ છે કે, આંતરરાષ્ટ્રીય ફ્લાઇટમાં બોર્ડિંગ કરતા પહેલાં જરૂરી એવાં સુરક્ષા તપાસનાં વિવિધ તબક્કામાંથી આ ત્રણ નાગરિકો કેવી રીતે કોઈના ધ્યાન પર આવ્યા વિના પસાર થઈ ગયા. આ ભૂલ માત્ર એક ટેકનિકલ ખામી છે કે માનવસર્જિત લાપરવાહી, તે દિશામાં પણ તપાસ તેજ કરી દેવામાં આવી છે.
શા માટે અનિવાર્ય છે ઇમિગ્રેશન ક્લિયરન્સ?
કોઈપણ દેશ માટે ઇમિગ્રેશન ક્લિયરન્સ એ તેની રાષ્ટ્રીય સુરક્ષાનો એક અત્યંત મહત્વપૂર્ણ હિસ્સો છે. આ એક એવી કાનૂની અને સુરક્ષા પ્રક્રિયા છે, જેમાં દેશમાં પ્રવેશતા કે બહાર જતા દરેક મુસાફરના પાસપોર્ટ, વીઝા અને પ્રવાસના દસ્તાવેજોની ઝીણવટભરી તપાસ કરવામાં આવે છે. આ તપાસનો મુખ્ય હેતુ એ સુનિશ્ચિત કરવાનો છે કે કોઈ ગેરકાયદેસર વ્યક્તિ, ગુનાહિત પૃષ્ઠભૂમિ ધરાવતો આરોપી કે વિઝા વગરનો મુસાફર દેશની સરહદ પાર ન કરી શકે. આંતરરાષ્ટ્રીય નિયમો મુજબ દરેક મુસાફરે આ પ્રક્રિયામાંથી પસાર થવું ફરજિયાત હોય છે.
