UP Assembly Elections 2027: ઉત્તર પ્રદેશની આગામી 2027ની વિધાનસભા ચૂંટણીમાં સતત ત્રીજી વખત સત્તા મેળવવા માટે ભારતીય જનતા પાર્ટીએ અત્યારથી જ પાયાનું કામ શરૂ કરી દીધું છે. 2024ની લોકસભા ચૂંટણીમાં ધાર્યા કરતાં ઓછી બેઠકો મળ્યા બાદ પાર્ટી હવે સંપૂર્ણપણે એક્ટિવ મોડમાં આવી ગઈ છે. મુખ્યમંત્રી યોગી આદિત્યનાથ એક તરફ જાહેરસભાઓ ગજવીને રાજકીય માહોલ બનાવી રહ્યા છે, તો બીજી તરફ સંગઠન સ્તરે એક ખાસ 'રિકવરી પ્લાન' પર કામ ચાલી રહ્યું છે. આ પ્લાન હેઠળ 2024માં જે વિધાનસભા વિસ્તારોમાં પાર્ટીને નુકસાન થયું હતું, તેના એક-એક પોલિંગ બૂથના ડેટાની ઊંડાણપૂર્વક તપાસ કરીને વિગતવાર રિપોર્ટ તૈયાર કરવામાં આવી રહ્યો છે.
18,900 બૂથો રણનીતિનું મુખ્ય કેન્દ્ર બની
ભાજપના આંતરિક સર્વે અને ડેટા વિશ્લેષણમાં એક મહત્વ બાબત સામે આવી છે. વર્ષ 2022ની વિધાનસભા ચૂંટણીમાં પાર્ટીએ જે 18,900 બૂથો પર જીત મેળવી હતી, તે જ બૂથો પર 2024ની લોકસભા ચૂંટણી દરમિયાન ભાજપના મતદાનમાં નોંધપાત્ર ઘટાડો જોવા મળ્યો હતો. હવે આ 18,900 બૂથો ભાજપની રણનીતિનું મુખ્ય કેન્દ્ર બની ગયા છે. પાર્ટી આ આંકડાને માત્ર રાજકીય હાર તરીકે નથી જોઈ રહી, પરંતુ આ બૂથો પર જ્યાં-જ્યાં ખામીઓ રહી ગઈ છે તેને ઓળખીને તુરંત સુધારાત્મક પગલાં ભરવાની દિશામાં આગળ વધી રહી છે.
80 ટકા નબળા બૂથો ગામડાઓ અને નાની વસાહતોમાં
બૂથ સ્તરે કરાયેલા આ વિશ્લેષણમાં સૌથી મહત્વની વાત એ સામે આવી છે કે ચિહ્નિત કરાયેલા 18,900 બૂથોમાંથી લગભગ 80 ટકા બૂથો ગ્રામીણ વિસ્તારોમાં આવેલા છે. નાના ગામડાઓ અને વણવિખરાયેલી વસાહતોમાં ભાજપનો વોટશેર ઘટ્યો છે, જ્યારે લખનૌ, વારાણસી, ગોરખપુર અને કાનપુર જેવા મોટા શહેરી કેન્દ્રોમાં ભાજપનો ગઢ અકબંધ રહ્યો છે. આ પરિસ્થિતિ સ્પષ્ટ કરે છે કે પાર્ટીએ ગ્રામીણ વિસ્તારોમાં પોતાનો જનાધાર પાછો મેળવવા માટે વિશેષ ધ્યાન આપવું પડશે. હવે ભાજપ સામે પડકાર માત્ર મોટો મેસેજ આપવાનો નથી, પરંતુ નારાજ થયેલા ગ્રામીણ સમુદાયો સુધી પહોંચીને તેમને ફરી પોતાની સાથે જોડવાનો છે.
પ્રદેશ પ્રભારી વિનોદ તાવડેનો વિસ્તૃત પ્રવાસ
ઉત્તર પ્રદેશમાં ભાજપની રણનીતિ માત્ર ડેટા એનાલિસિસ સુધી સીમિત નથી, પરંતુ જમીની સ્તરે સંગઠનને પુનઃજીવિત કરવાની છે. આ રિકવરી પ્લાનને યોગ્ય રીતે લાગુ કરવા માટે ભાજપના યુપી પ્રદેશ પ્રભારી વિનોદ તાવડે 16 થી 22 સપ્ટેમ્બર દરમિયાન ફરી ઉત્તર પ્રદેશના પ્રવાસે જઈ રહ્યા છે. આ પ્રવાસ દરમિયાન તેઓ નબળા બૂથોની સમીક્ષા કરશે અને સ્થાનિક કાર્યકર્તાઓ સાથે સીધો સંવાદ સાધશે. પાયાના કાર્યકર્તાઓમાં ઉત્સાહ ભરવા અને પંચાયત સ્તરેથી લઈને બૂથ સ્તર સુધીની ખામીઓ દૂર કરવા માટે કેન્દ્રીય નેતૃત્વ પોતે મેદાનમાં ઊતર્યું છે.
સામાજિક સમીકરણો અને બૂથ કમિટીઓનું નવેસરથી ગઠન
આ રિકવરી પ્લાન હેઠળ ભાજપ તમામ 18,900 નબળા બૂથો પર પોતાની બૂથ કમિટીઓની પુનઃરચના કરશે. જે વિસ્તારોમાં જાતિગત સમીકરણોને કારણે નુકસાન થયું હતું, ત્યાં સ્થાનિક સામાજિક નેતાઓને સાથે રાખીને સમીકરણો સુધારવામાં આવશે. દરેક બૂથ પર કલ્યાણકારી યોજનાઓના લાભાર્થીઓ સુધી પહોંચવા માટે વિશેષ ઝુંબેશ ચલાવવામાં આવશે. ભાજપનું માનવું છે કે 2027ની વિધાનસભા ચૂંટણી પહેલા દરેક એક-એક વોટ અને બૂથ પર પકડ મજબૂત કરીને જ સત્તામાં હેટ્રિક મેળવવાનું સ્વપ્ન સાકાર કરી શકાશે.
