ભાજપે રાજ્યોના નવા પ્રભારી-સહ પ્રભારીઓ જાહેર કર્યા! ગુજરાતની જવાબદારી તરુણ ચુઘને

BJP State In-Charges List: ભારતીય જનતા પાર્ટીએ સંગઠનાત્મક માળખામાં મોટો ફેરફાર કરતાં વિવિધ રાજ્યો અને કેન્દ્રશાસિત પ્રદેશો માટે નવા પ્રભારી અને સહ-પ્રભારીઓની નિમણૂક કરી છે. પાર્ટીના રાષ્ટ્રીય અધ્યક્ષ નીતિન નબીનની આગેવાની હેઠળ કરવામાં આવેલા આ સંગઠનાત્મક ફેરફારમાં ગુજરાતની જવાબદારી રાજ્યસભા સાંસદ અને ભાજપના રાષ્ટ્રીય મહાસચિવ તરુણ ચુઘને સોંપવામાં આવી છે. તેમની સાથે અજય મહાવર અને ગોમતી સાઈને સહ-પ્રભારી બનાવવામાં આવ્યા છે.

સ્મૃતિ ઈરાની અને સુનીલ બંસલને બે-બે રાજ્યોની જવાબદારી
નવી યાદીમાં સ્મૃતિ ઈરાનીને હરિયાણા અને છત્તીસગઢના પ્રભારી બનાવવામાં આવ્યા છે. જ્યારે સુનીલ બંસલને પશ્ચિમ બંગાળ અને તેલંગાણાની જવાબદારી સોંપવામાં આવી છે. ઉત્તર પ્રદેશમાં વિનોદ તાવડેને પ્રભારી બનાવવામાં આવ્યા છે અને તેમની સાથે જગદીશ પટેલને સહ-પ્રભારીની જવાબદારી આપવામાં આવી છે.

દિલ્હી સંગઠનમાં પણ ફેરફાર
દિલ્હી માટે ડૉ. વિનય સહસ્રબુદ્ધેને પ્રભારી બનાવવામાં આવ્યા છે. તેમની સાથે જામયાંગ ત્સેરિંગ નામગ્યાલ અને દર્શના જરદોશને સહ-પ્રભારી તરીકે નિયુક્ત કરવામાં આવ્યા છે. બીજી તરફ, રામ માધવને તમિલનાડુ અને ઉત્તરાખંડના પ્રભારી બનાવવામાં આવ્યા છે, જ્યારે ઉત્તરાખંડમાં બાંસુરી સ્વરાજને સહ-પ્રભારીની જવાબદારી આપવામાં આવી છે.

અનેક નેતાઓને એકથી વધુ રાજ્યોની જવાબદારી
ભાજપની નવી સંગઠનાત્મક યાદીમાં કેટલાક નેતાઓને એકથી વધુ રાજ્યોની જવાબદારી સોંપવામાં આવી છે. તેમાં સ્મૃતિ ઈરાનીને છત્તીસગઢ અને હરિયાણા, હરીશ દ્વિવેદીને બિહાર અને કર્ણાટક, સતીશ પૂનિયાને જમ્મુ-કાશ્મીર અને પંજાબ, રામ માધવને તમિલનાડુ અને ઉત્તરાખંડ તથા સુનીલ બંસલને તેલંગાણા અને પશ્ચિમ બંગાળનો પ્રભાર મળ્યો છે. અનિલ એન્ટનીને નાગાલેન્ડના પ્રભારી ઉપરાંત ગોવાના સહ-પ્રભારી બનાવવામાં આવ્યા છે.

ગુજરાત માટે નવી ટીમ
ગુજરાતમાં તરુણ ચુઘ પ્રભારી તરીકે પાર્ટીની સંગઠનાત્મક કામગીરી સંભાળશે. અજય મહાવર અને ગોમતી સાઈને સહ-પ્રભારી બનાવવામાં આવ્યા છે. ચુઘ અગાઉ પણ ભાજપના રાષ્ટ્રીય સંગઠનમાં મહત્વપૂર્ણ જવાબદારી સંભાળી ચૂક્યા છે અને ઓગસ્ટ 2026માં તેમને ગુજરાતના પ્રભારી તરીકે નિયુક્ત કરવામાં આવ્યા હતા.

અન્ય રાજ્યોની મહત્વની નિમણૂકો
મહારાષ્ટ્રમાં બૈજયંત જય પાંડા પ્રભારી રહેશે, જ્યારે અમિત માલવીય, સદાનંદ શેટ તાનાવડે અને કમલજીત સહરાવતને સહ-પ્રભારી બનાવવામાં આવ્યા છે. રાજસ્થાનમાં સંજય ભાટિયા, મધ્ય પ્રદેશમાં બિતુલ કુમાર દેબ, ઓડિશામાં ડી. પુરંદેશ્વરી, કેરળમાં પ્રો. એમ. નાગરાજા અને તમિલનાડુમાં રામ માધવને જવાબદારી સોંપવામાં આવી છે. આ નિમણૂકો સાથે ભાજપે વિવિધ રાજ્યોમાં પોતાની સંગઠનાત્મક ટીમનું પુનર્ગઠન કર્યું છે.