Bikaner Diggi Incident: રાજસ્થાનના બિકાનેર જિલ્લાના દેશનોક પોલીસ સ્ટેશન વિસ્તારમાં ખેતરમાં બનેલી ડિગ્ગીમાં ડૂબી જવાથી ત્રણ સગા ભાઈઓનાં કરુણ મોત થયા છે. એક બાળક પાણીમાં ડૂબવા લાગતા તેને બચાવવા માટે બીજા બે ભાઈઓ પણ પાણીમાં ઉતર્યા હતા. જો, કે પાણીની ઊંડાઈ વધુ હોવાથી ત્રણેય બાળકો ડૂબી ગયા હતા. ઘટનાની જાણ થતાં પરિવાર અને સમગ્ર વિસ્તારમાં શોકનો માહોલ છવાઈ ગયો છે.
એક ભાઈને બચાવવા જતાં ત્રણેય ડૂબ્યા
મૃતકોની ઓળખ પંકજ, ક્રિસ અને કાર્તિક તરીકે થઈ છે. ત્રણેય બાળકો હરિયાણાના હિસાર જિલ્લાના આદમપુર મંડી વિસ્તારના રહેવાસી હોવાનું જાણવા મળ્યું છે. પરિવાર દેશનોક વિસ્તારમાં ખેતરમાં કામ કરવા માટે આવ્યો હતો. આ દરમિયાન ત્રણેય બાળકો ખેતરમાં બનેલી ડિગ્ગી પાસે પહોંચ્યા હતા. આ દરમિયાન એક બાળક પાણીમાં ડૂબવા લાગ્યો હતો. તેને બચાવવા માટે બીજા બે ભાઈઓ પણ ડિગ્ગીમાં ઉતર્યા હતા. પાણીની ઊંડાઈ વધુ હોવાથી જોતજોતામાં ત્રણેય બાળકો ઊંડા પાણીમાં ડૂબી ગયા હતા.
સ્થાનિક લોકોએ બચાવવાનો પ્રયાસ કર્યો
દુર્ઘટનાની જાણ થતાં જ ઘટનાસ્થળે અફરાતફરી મચી ગઈ હતી. આસપાસ હાજર લોકો અને પરિવારના સભ્યોએ બાળકોને પાણીમાંથી બહાર કાઢવાનો પ્રયાસ કર્યો હતો. જોકે, તેમને બચાવી શકાયા નહોતા. માહિતી મળતાં દેશનોક પોલીસ સ્ટેશનનો કાફલો પણ ઘટનાસ્થળે પહોંચ્યો હતો અને સમગ્ર ઘટનાની માહિતી મેળવી હતી.
ખેતરમાં કામ કરવા આવ્યો હતો પરિવાર
પ્રાપ્ત માહિતી મુજબ, બાળકોનો પરિવાર હિસારના આદમપુર મંડી વિસ્તારનો રહેવાસી છે અને દેશનોક વિસ્તારમાં ખેતરમાં કામ કરવા માટે આવ્યો હતો. પરિવાર સાથે આવેલા ત્રણ બાળકોના એકસાથે મોત થતાં ઘટનાસ્થળે અને આસપાસના વિસ્તારમાં શોકનો માહોલ છવાઈ ગયો હતો. ઘટનાની જાણ થતાં મોટી સંખ્યામાં લોકો પણ ત્યાં એકઠા થઈ ગયા હતા.
પરિવારે પોસ્ટમોર્ટમ કરાવવાનો ઈનકાર કર્યો
દેશનોક પોલીસે ઘટનાસ્થળે પહોંચીને જરૂરી માહિતી એકઠી કરી હતી. પોલીસના જણાવ્યા મુજબ, પરિજનોએ ત્રણેય બાળકોના મૃતદેહનું પોસ્ટમોર્ટમ કરાવવાનો ઈનકાર કર્યો હતો. ત્યારબાદ પોલીસે અકસ્માતે મોતની નોંધ કરી અને જરૂરી કાર્યવાહી બાદ ત્રણેય મૃતદેહ પરિજનોને સોંપી દીધા હતા. દેશનોક થાણા અધિકારી સુમન શેખાવતના નેતૃત્વમાં પોલીસ સમગ્ર મામલાની તપાસ કરી રહી છે. પ્રાથમિક માહિતીમાં એક બાળકને બચાવવાના પ્રયાસમાં ત્રણેય ભાઈઓ ડિગ્ગીમાં ડૂબી ગયા હોવાનું સામે આવ્યું છે. પોલીસ તપાસ બાદ અકસ્માત અંગેના અન્ય તથ્યો સ્પષ્ટ થશે. ઘટનાને પગલે પરિવાર પર દુઃખનો પહાડ તૂટી પડ્યો છે અને ગામમાં પણ શોકનો માહોલ છે.
