Free ATM Cash Withdrawal During Bank Strike: સ્ટેટ બેંક ઓફ ઈન્ડિયા અને પંજાબ નેશનલ બેંક સહિત દેશની તમામ સરકારી બેંકોના એટીએમમાંથી આગામી ત્રણ દિવસ સુધી રોકડ રકમ ઉપાડવા બદલ ગ્રાહકો પાસે કોઈ પણ પ્રકારનો વધારાનો ચાર્જ વસૂલવામાં આવશે નહીં. અઠવાડિયામાં પાંચ દિવસ કામ કરવાની માંગણીને લઈને દેશભરના બેંક કર્મચારીઓ 28થી 30 સપ્ટેમ્બર સુધી હડતાળ પર ઉતરી રહ્યા છે. કર્મચારીઓની આ હડતાળને કારણે બેંકોની શાખાઓ સંપૂર્ણપણે બંધ રહેશે, જેને ધ્યાનમાં રાખીને બેંક વ્યવસ્થાપને આ દિવસો દરમિયાન માસિક મફત મર્યાદા પૂરી થઈ ગઈ હોવા છતાં એટીએમ ટ્રાન્ઝેક્શન ચાર્જ નાબૂદ કરવાનો મહત્વનો નિર્ણય લીધો છે.
5 વખતથી વધુ કેશ વિડ્રોઅલ પર પણ ₹23નો ચાર્જ માફ
હાલના રિઝર્વ બેંક ઓફ ઈન્ડિયાના નિયમો અનુસાર ગ્રાહકો પોતાની બેંકના એટીએમમાંથી મહિનામાં પાંચ વખત મફતમાં રોકડ ઉપાડી શકે છે. અન્ય બેંકોના એટીએમ ઉપયોગ માટે દિલ્હી અને મુંબઈ જેવા મેટ્રો શહેરોમાં મહિને ત્રણ વખત અને નાના શહેરોમાં પાંચ વખત ફ્રી ટ્રાન્ઝેક્શનની મર્યાદા નક્કી કરવામાં આવેલી છે. જો કોઈ ગ્રાહક આ મર્યાદા કરતાં વધુ વખત એટીએમમાંથી પૈસા ઉપાડે છે તો તેના ખાતામાંથી દર વખતે 23 રૂપિયા વત્તા જીએસટી જેટલો ચાર્જ કાપવામાં આવે છે. આ ઉપરાંત બેંકો પણ આંતરિક વ્યવહારો માટે એકબીજાને એટીએમ વપરાશ બદલ દર કેશ વિડ્રોઅલ પર 19 રૂપિયા અને બેલેન્સ ઈન્ક્વાયરી પર 7 રૂપિયા પ્રોસેસિંગ ફી ચૂકવતી હોય છે.
5-ડે વર્કિંગ સિસ્ટમ લાગુ કરવા બેંકોની દેશવ્યાપી હડતાળ
આ દેશવ્યાપી હડતાળમાં દેશની 7 મોટી બેંક યુનિયનો જોડાવા જઈ રહી છે, જેમાં સ્ટેટ બેંક અને અન્ય સરકારી બેંકોના 90 ટકાથી વધુ કર્મચારીઓ શામેલ છે. નાણાકીય સેવાઓ વિભાગ, ઈન્ડિયન બેંક એસોસિએશન અને વિવિધ બેંક પ્રબંધન દ્વારા હડતાળ ટાળવા માટે કરવામાં આવેલી અપીલને યુનિયનોએ ફગાવી દીધી છે. ઓલ ઈન્ડિયા બેંક એમ્પ્લોઈઝ એસોસિએશન સહિત વિવિધ યુનિયનોનું કહેવું છે કે જ્યાં સુધી સરકાર અઠવાડિયામાં 5-ડે વર્કિંગ સિસ્ટમ લાગુ કરવાની ચોક્કસ તારીખ જાહેર ન કરે ત્યાં સુધી તેમનો આ વિરોધ ચાલુ રહેશે. આ ઉપરાંત કર્મચારીઓ પર્ફોર્મન્સ લિંક્ડ ઈન્સેન્ટિવ યોજના પાછી ખેંચવાની પણ માંગ કરી રહ્યા છે.
ત્રણ દિવસની હડતાળના કારણે આવતીકાલે બેંકો ખુલી રહેશે
હડતાળના કારણે સોમવારથી બુધવાર સુધી બેંકો બંધ રહેવાની હોવાથી સામાન્ય જનતાને પૈસા ઉપાડવામાં કે ચેક ક્લિયરન્સમાં મુશ્કેલી ન પડે તે માટે નાણા મંત્રાલયે વિશેષ વ્યવસ્થા કરી છે. સરકારે રવિવાર, 27 સપ્ટેમ્બરના રોજ દેશની તમામ પબ્લિક સેક્ટર અને પ્રાદેશિક ગ્રામીણ બેંકોને ખુલ્લી રાખવાનો આદેશ આપ્યો છે. જોકે બીજી તરફ સરકારના સૂત્રોનું કહેવું છે કે પગાર સુધારણા અંગેની વાટાઘાટો દરમિયાન 5-ડે વર્કિંગ અંગે ક્યારેય કોઈ સત્તાવાર વાયદો કરવામાં આવ્યો ન હતો અને આ માંગણી માત્ર યુનિયનો તરફથી એકતરફી રીતે મૂકવામાં આવી હતી. અઠવાડિયામાં પાંચ દિવસ કામકાજ સિવાય બોનસ સંબંધિત પર્ફોર્મન્સ લિંક્ડ ઈન્સેન્ટિવ યોજનાના નવા નિયમો સામે પણ બેંક યુનિયનોએ સખત વાંધો ઉઠાવ્યો છે. સરકારે સ્કેલ-4 અને તેનાથી ઉપરના ઉચ્ચ અધિકારીઓ માટે શ્રેષ્ઠ કામગીરી બદલ 365 દિવસના બેઝિક પગાર જેટલું બોનસ આપવાની નવી નીતિ અમલમાં મૂકી છે. યુનિયનોનો આક્ષેપ છે કે આ યોજનાથી નીચલા સ્તરના કર્મચારીઓ સાથે અસમાનતા ઊભી થાય છે, જેને કારણે આ વિવાદ વધુ ઘેરો બન્યો છે.
