Agniveer data leak: દિલ્હી પોલીસની સ્પેશ્યલ સેલે એક 14 વર્ષના કિશોરની અટકાયત કરી છે. કિશોર પર આરોપ છે કે, તે અગ્નિવીર સાથે જોડાયેલા ડેટા કથિત રીતે ડાર્ક વેબ પર વેચવાનો પ્રયાસ કરી રહ્યો હતો. આરોપી મૂળ હરિયાણાના વલ્લભગઢનો રહેવાસી હોવાનું સામે આવ્યું છે.
ડેટા ચોરી માટે AI નો ઉપયોગ કરાયો
મળતી માહિતી મુજબ, અગ્નિવીરનો આ ડેટા કથિત રૂપે એક એવી વેબસાઇટમાંથી ચોરી કરવામાં આવ્યો હોત, જેને એક પૂર્વ અગ્નિવીરોના રજિસ્ટ્રેશન અને બીજા સરકારી વિભાગોમાં નોકરીની તક શોધનાર માટે તૈયાર કરવામાં આવ્યો હતો. અગ્નિવીરોનો ડેટા ચોરી કરવા માટે AI નો ઉપયોગ કરવામાં આવ્યો હતો. ત્યારબાદ ડાર્ક વેબ પર એક જાહેરાત પોસ્ટ કરવામાં આવી હતી. આ જાહેરાતમાં દાવો કરવામાં આવ્યો હતો કે, સંબંધિત શખ્સ પાસે 4 હજાર અગ્નિવીરોના ડેટા છે. આ ડેટાને વેચવા માટે 500 અમેરિકન ડૉલર (આશરે 46 હજાર રૂપિયા)ની માંગ કરવામાં આવી હતી.
પોલીસે ગૃહ મંત્રાલયમાં લખ્યો પત્ર
દિલ્હી પોલીસની IFSO યુનિટે કિશોરના ડિજીટલ ડિવાઇસમાંથી આ ડેટા મેળવી લીધા છે. પોલીસે અગ્નિવીરોના ડેટા માટે ગૃહ મંત્રાલયને પણ પત્ર લખ્યો છે.
હવે દિલ્હી પોલીસ શું કરશે?
હવે દિલ્હી પોલીસ ડિજીટલ ડિવાઇસમાંથી મેળવેલા ડેટાનો ગૃહ મંત્રાલય પાસેથી મેળવેલા ડેટા સાથે મેચ કરશે અને કન્ફર્મ કરશે. પોલીસે તપાસ બાદ કિશોરની અટકાયત કરી હતી અને બાદમાં તેને છોડી દીધો હતો.
ડાર્ક વેબ શું છે?
નોંધનીય છે કે, ડાર્ક વેબ એ ઇન્ટરનેટની દુનિયાનો એક એવો ભાગ છે, જ્યાં એવા સામાનને વેચવામાં આવે છે, જે અનેક દેશોની નજરમાં ગેરકાયદે છે. તેને સામાન્ય બ્રાઉઝરની મદદથી ઉપયોગ કરવું સરળ નથી. તેના ઉપયોગ માટે ખાસ બ્રાઉઝર અને સોફ્ટવેરની જરૂર પડે છે.








