India's First Bullet Train Project: ભારતમાં હાઈ-સ્પીડ રેલવે સેવાની શરૂઆત કરવા માટેનો મહત્ત્વાકાંક્ષી બુલેટ ટ્રેન પ્રોજેક્ટ હાલમાં પૂરઝડપે આગળ વધી રહ્યો છે. દેશવાસીઓ જેની આતુરતાપૂર્વક રાહ જોઈ રહ્યા છે તે ભારતની પ્રથમ બુલેટ ટ્રેન આગામી વર્ષ 2027ના અંતિમ ત્રિમાસિક ગાળામાં પાટા પર દોડતી થઈ જશે. રેલ મંત્રી અશ્વિની વૈષ્ણવ દ્વારા સોશિયલ મીડિયા પર શેર કરવામાં આવેલી વિગતો અનુસાર, 508 કિલોમીટર લાંબા આ અમદાવાદ-મુંબઈ હાઈ-સ્પીડ કોરિડોરનું કામ યુદ્ધના ધોરણે ચાલી રહ્યું છે. આ પ્રોજેક્ટ સાકાર થવાથી ગુજરાત અને મહારાષ્ટ્ર વચ્ચેનો પ્રવાસ સમય અત્યંત ટૂંકો થઈ જશે અને મુસાફરોને આધુનિક પરિવહનનો શાનદાર અનુભવ મળશે.
મુંબઈના BKCમાં જમીનથી 100 ફૂટ નીચે અંડરગ્રાઉન્ડ સ્ટેશન
આ પ્રોજેક્ટનું સૌથી મોટું એન્જિનિયરિંગ આશ્ચર્ય મુંબઈના જાણીતા બિઝનેસ હબ બાન્દ્રા કુર્લા કોમ્પ્લેક્સ (BKC) ખાતે જોવા મળી રહ્યું છે. અહીં જમીનથી અંદાજે 100 ફૂટ એટલે કે 10 માળની ઇમારત કરતાં પણ વધુ ઊંડાઈએ અંડરગ્રાઉન્ડ રેલવે સ્ટેશનનું નિર્માણ થઈ રહ્યું છે. આ સમગ્ર હાઈ-સ્પીડ કોરિડોર પર આ એકમાત્ર ભૂગર્ભ સ્ટેશન છે, જેનું સ્થાપત્ય અને ડિઝાઇન અત્યંત અદભુત છે. આ સ્ટેશન પર જમીનની અંદર ત્રણ અલગ-અલગ લેવલ તૈયાર કરવામાં આવ્યા છે, જેમાં પ્લેટફોર્મ, કોન્કોર્સ અને જરૂરી સર્વિસ એરિયાનો સમાવેશ થાય છે. આ સ્ટેશન પર 400 મીટરથી વધુ લંબાઈ ધરાવતા કુલ છ પ્લેટફોર્મ બનાવવામાં આવી રહ્યા છે, જે મુસાફરોની સુવિધા માટે અત્યાધુનિક સુવિધાઓથી સજ્જ હશે.
થાણે ક્રીક નીચે ભારતની પહેલી અંડર-સી ટનલનું નિર્માણ
મુંબઈના આ ભૂગર્ભ સ્ટેશનથી થોડા જ અંતરે એન્જિનિયરિંગનું બીજું અદભુત ઉદાહરણ જોવા મળે છે, જ્યાં સમુદ્રની અંદર ટનલ બનાવવામાં આવી રહી છે. મહારાષ્ટ્રમાં આ બુલેટ ટ્રેન રૂટ 21 કિલોમીટર લાંબી સુરંગમાંથી પસાર થશે, જેમાંથી 7 કિલોમીટરનો હિસ્સો થાણે ક્રીક નીચે સમુદ્રની અંદર તૈયાર થઈ રહ્યો છે. આ ભારતની સર્વપ્રથમ અંડર-સી રેલ સુરંગ હશે, જેમાંથી બુલેટ ટ્રેન પૂરપાટ ઝડપે પસાર થશે. આટલી જટિલ અને વિશાળ સુરંગના નિર્માણ માટે અતિ-આધુનિક ટનલ બોરિંગ મશીનોનો ઉપયોગ કરવામાં આવી રહ્યો છે, જે કઠિન ખડકોને કાપીને સુરક્ષિત અને મજબૂત રસ્તો તૈયાર કરી રહ્યા છે.
વિશાળ ટનલ બોરિંગ મશીનો અને એન્જિનિયરિંગ કમાલ
થાણે ક્રીક નીચે ચાલી રહેલા આ મસમોટા બાંધકામ પાછળ અત્યાધુનિક અને કદાવર મશીનોની મદદ લેવામાં આવી રહી છે. જુલાઈ 2026માં વિક્રોલી અને સાવલી ખાતેથી બે વિશાળ ટનલ બોરિંગ મશીનો લોન્ચ કરવામાં આવ્યા હતા, જે દેશમાં અત્યાર સુધી ઉપયોગમાં લેવાયેલા સૌથી મોટા મશીનોમાં સામેલ છે. આ દરેક મશીનનું કટરહેડ 13.6 મીટર વ્યાસ ધરાવે છે જે ચાર માળની ઇમારત જેટલું ઊંચું છે. આ એક-એક મશીનનું વજન 3,000 ટનથી વધુ છે, જે અંદાજે 500 એશિયન હાથીઓના વજનની બરાબર ગણાય છે. જ્યારે તેની લંબાઈ 96 મીટર એટલે કે આશરે પાંચ ક્રિકેટ પીચ જેટલી વિશાળ છે, જે આ પ્રોજેક્ટના ભવ્ય કદની સાક્ષી પૂરે છે.
320 કિલોમીટર પ્રતિ કલાકની ઝડપ અને 12 મુખ્ય સ્ટેશનો
આ હાઈ-સ્પીડ ટ્રેન જ્યારે સંપૂર્ણ ગતિમાં હશે ત્યારે તે પ્રતિ કલાક 320 કિલોમીટરની મહત્તમ ઝડપે દોડશે, જ્યારે અમદાવાદ અને મુંબઈ વચ્ચે તેની સરેરાશ સ્પીડ 300 કિલોમીટર પ્રતિ કલાકની આસપાસ રહેશે. આ આખો પ્રોજેક્ટ મહારાષ્ટ્ર, ગુજરાત અને દાદરા અને નગર હવેલીથી પસાર થઈને કૂલ 508 કિલોમીટરનું અંતર આવરી લેશે. આ સમગ્ર માર્ગ પર કૂલ 12 મુખ્ય સ્ટેશનો પર ટ્રેનનું સ્ટોપેજ નક્કી કરવામાં આવ્યું છે. જેમાં મુંબઈ (BKC), થાણે, વિરાર, બોઇસર, વાપી, બિલીમોરા, સુરત, ભરૂચ, વડોદરા, આણંદ, અમદાવાદ અને સાબરમતી સ્ટેશનનો સમાવેશ થાય છે, જેના કારણે આ તમામ શહેરો વચ્ચેનો વેપાર અને વ્યવહાર વધુ સરળ બનશે.
