India Visa Rules Update: કેન્દ્ર સરકારે પાસપોર્ટ અને વિઝા સંબંધિત નિયમોમાં ફેરફાર કરીને નવી નોટિફિકેશન જાહેર કરી છે. આ નિર્ણયની સીધી અસર અફઘાનિસ્તાન, પાકિસ્તાન અને બાંગ્લાદેશથી આવેલા છ બિન-મુસ્લિમ સમુદાયોના લોકો પર પડશે. નવા નિયમો મુજબ, નિર્ધારિત શરતો હેઠળ ભારતમાં રહેતા આવા લોકોએ હવે વસવાટ માટે યોગ્ય શ્રેણીનો વિઝા મેળવવો ફરજિયાત રહેશે. આ ઉપરાંત નેપાળ અને ભૂતાનના રસ્તે મુસાફરી કરતા નાગરિકો માટે પણ મુસાફરીના નિયમો વધુ કડક બનાવવામાં આવ્યા છે.
કયા છ સમુદાયો માટે વિઝા ફરજિયાત બન્યો?
કેન્દ્ર સરકારના નવા નિયમોમાં હિન્દુ, સિખ, બૌદ્ધ, જૈન, પારસી અને ખ્રિસ્તી સમુદાયોનો સમાવેશ કરવામાં આવ્યો છે. આ નિયમ ખાસ કરીને અફઘાનિસ્તાન, પાકિસ્તાન અને બાંગ્લાદેશથી ધાર્મિક ઉત્પીડન અથવા તેના ભયને કારણે 31 ડિસેમ્બર 2024 સુધીમાં ભારતમાં આવેલા લોકો પર લાગુ પડશે. જે લોકો પાસે કાયદેસરના મુસાફરી દસ્તાવેજો નહોતા અથવા તેમના દસ્તાવેજોની મુદત પૂરી થઈ ગઈ હતી, તેમણે હવે ભારતમાં રહેવા માટે નિયમ મુજબ યોગ્ય શ્રેણીનો વિઝા મેળવવો પડશે. બુધવારે જાહેર કરાયેલા નોટિફિકેશનમાં આ ફેરફારની જાણ કરવામાં આવી છે. અગાઉ સપ્ટેમ્બર 2025ના આદેશ હેઠળ આ છ સમુદાયોને પાસપોર્ટ અને વિઝાની શરતોમાંથી મુક્તિ આપવામાં આવી હતી.
નેપાળ અને ભૂતાન થઈને મુસાફરી કરનારાઓ માટે નવા નિયમો
કેન્દ્ર સરકારે ભારત, નેપાળ અને ભૂતાન વચ્ચે મુસાફરી કરતા નાગરિકો માટે પણ નિયમો સ્પષ્ટ અને કડક બનાવ્યા છે. હવે આ દેશોના નાગરિકોએ એકબીજાના દેશમાં આવવા-જવા માટે 'વિઝા મેન્યુઅલ' હેઠળ નિર્ધારિત માન્ય ઓળખકાર્ડ રજૂ કરવાનું રહેશે. જો કોઈ ભારતીય નાગરિક નેપાળ અથવા ભૂતાન થઈને ત્રીજા દેશમાં મુસાફરી કરી રહ્યો હોય, તો તેની પાસે માન્ય પાસપોર્ટ હોવો જરૂરી રહેશે. આ ઉપરાંત તેણે મુસાફરી માટે નક્કી કરાયેલા ચેકપોઈન્ટ્સનો જ ઉપયોગ કરવો પડશે.
ચીન અને પાકિસ્તાન થઈને ભારત આવતા લોકો પર પણ નિયંત્રણ
નવા નિયમો મુજબ, નેપાળ અને ભૂતાનના નાગરિકો જો ચીન, પાકિસ્તાન, હોંગકોંગ અથવા મકાઉ થઈને ભારત આવી રહ્યા હોય, તો તેમણે માન્ય પાસપોર્ટ અને વિઝા રજૂ કરવા ફરજિયાત રહેશે. જોકે, કેન્દ્ર સરકારે ભારતમાં રહેતા શ્રીલંકન તમિલ શરણાર્થીઓ અને તિબેટીયન નાગરિકો માટે પાસપોર્ટ તથા વિઝા સંબંધિત કાનૂની છૂટછાટો યથાવત રાખી છે.
