Brij Bhushan Sharan Singh Unnao Elon Musk CJP Protest: ઉત્તર પ્રદેશના ઉન્નાવ ખાતે પહોંચેલા ભારતીય જનતા પાર્ટીના વરિષ્ઠ નેતા અને પૂર્વ સાંસદ બ્રિજભૂષણ શરણ સિંહે કોકરોચ જનતા પાર્ટી (CJP) દ્વારા ચલાવવામાં આવી રહેલા 'લહેરા દો તિરંગા' વિરોધ પ્રદર્શન અંગે અમેરિકી ઉદ્યોગપતિ એલોન મસ્ક પર આકરા પ્રહારો કર્યા છે. તેમણે અત્યંત ગંભીર આરોપ લગાવતા કહ્યું કે આ આખું આંદોલન ભારત વિરુદ્ધ એલોન મસ્કના ઇશારે ચલાવવામાં આવી રહ્યું છે. તેમણે ઉમેર્યું હતું કે આ આપણા દેશ સામેનું એક મોટું આંતરરાષ્ટ્રીય ષડયંત્ર છે, જેમાં ભારતની સરખામણી પાકિસ્તાન અને બાંગ્લાદેશ જેવા અસ્થિર દેશો સાથે કરવાનો પ્રયાસ થઈ રહ્યો છે.
"પ્રથમવાર સુપ્રીમ કોર્ટને ડરાવવાના ઈરાદાથી માર્ચ યોજાયો": ભાજપ નેતા
બ્રિજભૂષણ શરણ સિંહે મીડિયા સમક્ષ આક્રોશ વ્યક્ત કરતા જણાવ્યું હતું કે, "આપણા દેશના ઈતિહાસમાં પ્રથમ વખત દેશની સુપ્રીમ કોર્ટને ડરાવવા-ધમકાવવાના અને ન્યાયપાલિકા પર દબાણ ઊભું કરવાના ઈરાદાથી આવો માર્ચ યોજવામાં આવ્યો છે. ભૂતકાળમાં આવું ક્યારેય બન્યું નથી. જે વિદેશી ઉદ્યોગપતિઓ ભારતમાં માત્ર પોતાની મનસ્વી શરતો પર વેપાર કરવા માંગે છે, તેઓ જ આ પ્રકારના આંદોલનોને પાછળથી હવા આપીને દેશમાં અરાજકતા ફેલાવવાનું ષડયંત્ર રચી રહ્યા છે."
સ્ટારલિંકને લઈને એલોન મસ્ક અને ભારત સરકાર વચ્ચે વિવાદ
અત્રે નોંધનીય છે કે, એલોન મસ્કની સેટેલાઇટ ઇન્ટરનેટ સેવા 'સ્ટારલિંક'ને ભારતમાં વ્યાવસાયિક મંજૂરી મળવામાં વિલંબ થઈ રહ્યો હોવાથી વિવાદ ચાલી રહ્યો છે. મસ્કે સોશિયલ મીડિયા પ્લેટફોર્મ X પર ભારતની ટેલિકોમ નીતિઓ અને કોમ્પિટિશન પર સવાલો ઉઠાવતા આરોપ લગાવ્યો હતો કે, કેટલાક મોટા ભારતીય કારોબારી હિતોના કારણે તેમની સેવા રોકવામાં આવી રહી છે. તેમણે રિલિઅન્સ ઇન્ડસ્ટ્રીઝના ચેરમેન મુકેશ અંબાણી પર પણ તંજ કસ્યો હતો. મસ્કના મતે, સ્ટારલિંકની મંજૂરીથી ભારતના ગ્રામીણ અને દૂરદૂરના વિસ્તારોમાં હાઈ-સ્પીડ ઇન્ટરનેટ પહોંચાડી શકાશે.
ભારત સરકાર અને રિલાયન્સ ઇન્ડસ્ટ્રીઝનું સ્પષ્ટ વલણ
મસ્કના આક્ષેપોને ફગાવતા કેન્દ્રીય સંચાર મંત્રી જ્યોતિરાદિત્ય સિંધિયા અને દૂરસંચાર મંત્રાલયે સ્પષ્ટતા કરી હતી કે વિદેશી કંપનીઓને ભારતમાં સેવા શરૂ કરવા માટે રાષ્ટ્રીય સુરક્ષા અને સ્પેક્ટ્રમ ફાળવણીના તમામ કાનૂની માપદંડો પૂર્ણ કરવા પડશે. બીજી તરફ, રિલિઅન્સ ઇન્ડસ્ટ્રીઝે પણ ખુલાસો કર્યો હતો કે તેમને કોઈ સ્પર્ધાથી ડર નથી અને તેઓ સ્ટારલિંકનું સ્વાગત કરે છે, પરંતુ કોઈપણ વિદેશી સંસ્થાએ ભારતના બંધારણ અને નિયમોનું સંપૂર્ણ પાલન કરવું પડશે.
રાહુલ ગાંધીના રીટ્વીટ અને વિપક્ષી માર્ચ પર ઊભા થયેલા કાનૂની સવાલો
બ્રિજભૂષણ સિંહે આંદોલનની ટાઇમિંગ સામે પણ સવાલો ઉઠાવતા કહ્યું હતું કે એલોન મસ્કનું નિવેદન આવે છે અને વિપક્ષી નેતાઓ તેને તુરંત રીટ્વીટ કરીને દેશનું વાતાવરણ ડહોળવાનો પ્રયાસ કરે છે. તેમણે કહ્યું કે જંતર-મંતર પર વિરોધ પ્રદર્શનોના નામે સામાન્ય નાગરિકો, વેપારીઓ અને વિદ્યાર્થીઓની આજીવિકા ખોરવાઈ રહી છે, તેથી સરકારે આવા આંદોલનો માટે દિલ્હીની બહાર યોગ્ય સ્થાન નિયત કરવું જોઈએ. આ મામલે રાજકીય ગરમાવો ચરમસીમાએ પહોંચ્યો છે.
