London-Dhaka Flight Fight: લંડનથી ઢાકા જઈ રહેલી બિમાન બાંગ્લાદેશ એરલાઇન્સની ફ્લાઇટમાં બે મુસાફરો વચ્ચે બોલાચાલી બાદ મારામારી થઈ ગઈ હતી. બંને મુસાફરોએ એકબીજા પર મુક્કા માર્યા હતા, જેમાં એક મુસાફરનું ટી-શર્ટ પણ ફાટી ગયું હતું. આસપાસના મુસાફરો અને કેબિન ક્રૂએ દરમિયાનગીરી કરીને બંનેને અલગ કર્યા હતા. ઘટનાનો વીડિયો હવે સોશિયલ મીડિયા પર વાયરલ થઈ રહ્યો છે.
દલીલ બાદ અચાનક હાથાપાઈ શરૂ થઈ
વાયરલ વીડિયોમાં બંને મુસાફરો શરૂઆતમાં એકબીજા સાથે ઉગ્ર દલીલ કરતા જોવા મળે છે. થોડી જ ક્ષણોમાં મામલો એટલો વણસી ગયો કે બંને એકબીજા પર હુમલો કરવા લાગ્યા હતા. મારામારી દરમિયાન આસપાસ બેઠેલા મુસાફરોમાં ગભરાટ ફેલાયો હતો. ફ્લાઇટમાં બાળકો અને વૃદ્ધ મુસાફરો પણ હાજર હોવાનું જણાવાયું છે.
ક્રૂ અને મુસાફરોએ બંનેને અલગ કર્યા
બંને વચ્ચે મારામારી વધી જતાં કેટલાક મુસાફરો અને કેબિન ક્રૂના સભ્યો તરત જ તેમની વચ્ચે પહોંચી ગયા હતા. તેમણે બંનેને અલગ કરીને પરિસ્થિતિ કાબૂમાં લેવાનો પ્રયાસ કર્યો હતો. વીડિયોમાં અન્ય મુસાફરો પણ ઝઘડો રોકવા માટે વચ્ચે પડતા જોવા મળે છે. જોકે, બંને વચ્ચે કયા મુદ્દે વિવાદ શરૂ થયો હતો તે હજુ સ્પષ્ટ થયું નથી.
એરલાઇનને ઘટનાની જાણકારી નહોતી
બિમાન બાંગ્લાદેશ એરલાઇન્સના જનરલ મેનેજર (પબ્લિક રિલેશન્સ) મહબૂબુદ્દીન અહમદે ઢાકા ટ્રિબ્યુનને જણાવ્યું હતું કે તેમને આ ઘટનાની જાણકારી નહોતી. તેમણે કહ્યું હતું કે, “મને હાલમાં આ મામલે કોઈ જાણકારી નથી. હું તેની માહિતી મેળવી રહ્યો છું.” એરલાઇને હજુ સુધી બંને મુસાફરો વચ્ચે વિવાદનું ચોક્કસ કારણ શું હતું અથવા તેમની સામે કોઈ કાર્યવાહી કરવામાં આવશે કે નહીં તે અંગે સત્તાવાર માહિતી આપી નથી.
