Jharkhand man murder: ઝારખંડના બોકારો જિલ્લામાંથી એક અત્યંત ચોંકાવનારી ઘટના સામે આવી છે, જ્યાં મોર્નિંગ વોક પર નીકળેલા 65 વર્ષીય નિવૃત્ત કર્મચારીની એક નશાખોર યુવકે પથ્થરથી માથું કચડીને નિર્મમ હત્યા કરી દીધી છે. આ લોહિયાળ ઘટના શનિવારે વહેલી સવારે આશરે 5:15 વાગ્યે હરલા પોલીસ સ્ટેશન વિસ્તારના સેક્ટર-9માં આવેલી સરદાર પટેલ સ્કૂલ પાસે ઘટી હતી.
ભરત સિંહ દરરોજની જેમ સવારે ચાલવા નીકળ્યા હતા
પોલીસના જણાવ્યા અનુસાર, સ્ટીલ ઓથોરિટી ઓફ ઈન્ડિયા (SAIL)માંથી નિવૃત્ત થયેલા ભરત સિંહ દરરોજની જેમ સવારે ચાલવા નીકળ્યા હતા. આ દરમિયાન પંકજ સાવ ઉર્ફે પંકજ વર્મા નામના એક માથાભારે યુવકે નશો કરવા માટે તેમની પાસે જબરદસ્તીથી પૈસા માગ્યા હતા. વૃદ્ધે પૈસા આપવાની ના પાડતા, આરોપીએ તેમનો મોબાઈલ ફોન છીનવવાનો પ્રયાસ કર્યો હતો. ભરત સિંહે આ લૂંટનો પ્રતિકાર કરતા ઉશ્કેરાયેલા નશાખોર યુવકે રસ્તા કિનારે પડેલો એક મોટો પથ્થર ઉપાડીને તેમના માથા પર ઉપરાછાપરી ઘા ઝીંકી દીધા હતા, જેના કારણે તેમનું ઘટનાસ્થળે જ કમકમાટીભર્યું મોત નીપજ્યું હતું.
આરોપી પંકજ સાવને સેક્ટર-9ના વૈશાલી વળાંક પાસેથી દબોચી લીધો
આ અમાનુષી હત્યાકાંડ બાદ મૃતકના પુત્રની ફરિયાદના આધારે હરલા પોલીસે તાત્કાલિક કાનૂની કાર્યવાહી હાથ ધરી હતી. પોલીસે ગણતરીના કલાકોમાં જ આરોપી પંકજ સાવને સેક્ટર-9ના વૈશાલી વળાંક પાસેથી દબોચી લીધો હતો. આ સાથે જ પોલીસે ઘટનાસ્થળેથી હત્યામાં વપરાયેલો પથ્થર, લોહીથી ખરડાયેલું શર્ટ, ધાબળો, મૃતકનો મોબાઈલ અને તેમના તૂટેલા ચશ્માં પણ જપ્ત કર્યા છે. આ ઘટનાથી મૃતકના પરિવારમાં ભારે આક્રંદ છવાઈ ગયું છે અને સ્થાનિક લોકોમાં રોષ જોવા મળી રહ્યો છે.
