3.5-Year-Old Child Abused at Delhi Play School: દિલ્હીના મૌજપુર વિસ્તારમાંથી એક હૃદયદ્રાવક અને ચોંકાવનારી ઘટના સામે આવી છે. અહીં એક ખાનગી પ્લે સ્કૂલમાં ભણતા માત્ર સાડા ત્રણ વર્ષના માસૂમ બાળક સાથે નિર્દયતા અને શારીરિક પ્રતાડના આચરવામાં આવી હોવાનો સનસનાટીભર્યો આરોપ સામે આવ્યો છે. સ્કૂલમાં લાગેલા સીસીટીવી કેમેરામાં બાળકના કાન ખેંચવા, તેને થપ્પડ તથા લાત મારવી અને ખુરશી સાથે બાંધી રાખવાની ભયાનક તસવીરો કેદ થતાં સમગ્ર વિસ્તારના વાલીઓમાં ભારે રોષ વ્યાપી ગયો છે.
માસૂમના શરીર પર ઈજા અને ડૉક્ટરનો ચોંકાવનારો ખુલાસો
ઘટનાની વિગત મુજબ, 18 ઓગસ્ટે જ્યારે માસૂમ બાળક શાળાએથી ઘરે પરત ફર્યો ત્યારે તેની સ્થિતિ અત્યંત દયનીય હતી. બાળકની આંખો અને કાન પર ગંભીર સોજો હતો અને તેને સતત ઉલટીઓ થઈ રહી હતી. બાળકે કાનમાં અસહ્ય દર્દની ફરિયાદ કરતા પરિવારજનો તેને તાત્કાલિક ડૉક્ટર પાસે લઈ ગયા હતા. તપાસ બાદ ડૉક્ટરે ખુલાસો કર્યો હતો કે બાળકના કાનના પડદામાં ભારે સોજો છે, જે કોઈ આકરા મારના કારણે થયો હોઈ શકે છે. આ ખુલાસા બાદ પરિજનોને શાળામાં કંઈક ગંભીર બન્યું હોવાની આશંકા ગઈ હતી.
CCTV ફૂટેજ જોતા જ પરિજનોના પગ તળેથી જમીન સરકી ગઈ
શરૂઆતમાં શાળા પ્રશાસને આવી કોઈ પણ ઘટના બની હોવાનો સ્પષ્ટ ઈનકાર કરી દીધો હતો. પરંતુ જ્યારે પરિવારજનોએ સીસીટીવી કેમેરાનું એકસેસ મેળવી 16, 17 અને 18 ઓગસ્ટના ફૂટેજ ચકાસ્યા ત્યારે સત્ય સામે આવ્યું હતું. ફૂટેજમાં દેખાયું કે માસૂમ બાળકને તેના જ એપ્રન વડે કલાકો સુધી ખુરશી સાથે બાંધી રાખવામાં આવતો હતો. એટલું જ નહીં, શાળાની મેડ અને અન્ય કર્મચારીઓ દ્વારા તેને થપ્પડ-લાત મારવામાં આવતી હતી અને તેના કાન ખેંચીને માનસિક તથા શારીરિક યાતના આપવામાં આવતી હતી.
પોલીસે હાથ ધરી કડક કાર્યવાહી, મેડની અટકાયત
આ ખૌફનાક દ્રશ્યો સામે આવ્યા બાદ પીડિત પરિવારે તાત્કાલિક દિલ્હીના જાફરાબાદ પોલીસ સ્ટેશનમાં લેખિત ફરિયાદ નોંધાવી હતી. પોલીસે મામલાની ગંભીરતા જોઈને ત્વરિત એફઆઈઆર દર્જ કરી છે અને POCSO એક્ટ સહિતની સખત કલમો હેઠળ ગુનો નોંધ્યો છે. પોલીસે કાર્યવાહી કરતા શાળામાં કામ કરતી મેડની અટકાયત કરી લીધી છે, જ્યારે ઘોર બેદરકારી દાખવનાર શિક્ષકો અને અન્ય સ્ટાફની ભૂમિકા અંગે ઊંડાણપૂર્વક તપાસ હાથ ધરી છે.
વાલીઓના મનમાં સુરક્ષા સામે ઊભા થયા ગંભીર સવાલો
જે ઉંમરે બાળક રમત-ગમતમાં નવી વસ્તુઓ શીખવા માટે શાળાએ જતું હોય છે, તે જ જગ્યાએ તેની સાથે થયેલા આવા અમાનવીય વ્યવહારે શિક્ષણ જગતને શર્મસાર કર્યું છે. પીડિત પરિવારે શાળામાં બાળકોની સુરક્ષાને લઈને ગંભીર સવાલો ઉઠાવ્યા છે. હાલમાં પોલીસ સીસીટીવી ફૂટેજ કબજે કરીને કાનૂની પુરાવા એકઠા કરી રહી છે, જેથી દોષિતો સામે આકરી કાર્યવાહી કરી માસૂમ બાળકને ન્યાય અપાવી શકાય.
