Nidhi Tiwari Death Case: મધ્ય પ્રદેશના સિંગરૌલી જિલ્લાના મોરવા પોલીસ સ્ટેશન વિસ્તાર હેઠળ આવેલ વિસ્તારમાં એક હૃદયદ્રાવક ઘટના સામે આવી છે. 16 લાખથી વધુ ફોલોઅર્સ ધરાવતી જાણીતી સોશિયલ મીડિયા ઇન્ફ્લુએન્સર 30 વર્ષીય નિધિ તિવારીએ પોતાના જ ઘરના ઉપરના રૂમમાં ગળાફાંસો ખાઈને આત્મહત્યા કરી લીધી છે. સોશિયલ મીડિયા પર પોતાના ડાન્સ રીલ્સ અને અનોખા અંદાજ માટે જાણીતી નિધિના અચાનક અવસાનથી તેના લાખો ચાહકો અને પરિવારજનો ભારે આઘાતમાં સરી પડ્યા છે. ઘટનાની જાણ થતાં જ સ્થાનિક પોલીસે સ્થળ પર પહોંચીને મૃતદેહને કબજે લીધો હતો અને મામલાની ઊંડાણપૂર્વક તપાસ હાથ ધરી છે.
મોત પહેલાંનો એ જ રાતનો ખૌફનાક ફોન કોલ
આ સમગ્ર ઘટનામાં શનિવારે રાત્રે આશરે 8.20 વાગ્યે આવેલો એક ફોન કોલ સૌથી મહત્વનો વળાંક સાબિત થયો છે. નિધિની માતા હેમલતા તિવારીના મોબાઈલ પર સોનુ સિંહ નામના યુવકનો ફોન આવ્યો હતો. સોનુએ ફોન પર ગભરાયેલા અવાજે નિધિની માતાને સૂચના આપી હતી કે નિધિ ઉપરના રૂમમાં આત્મહત્યા કરવા જઈ રહી છે અને તરત જ ત્યાં પહોંચો. આ સાંભળીને હેમલતાજી તેમની પુત્રીઓ સાથે દોડીને ઉપરના માળે પહોંચ્યા હતા, પરંતુ રૂમનો દરવાજો અંદરથી બંધ હતો. ત્યારબાદ આસપાસના સંબંધીઓને બોલાવીને દરવાજો તોડવામાં આવ્યો ત્યારે નિધિ પંખા સાથે લટકતી હાલતમાં મળી આવી હતી. તેને તુરંત એનસીએલ હોસ્પિટલ લઈ જવાયી હતી, જ્યાં ડોક્ટરોએ તેને મૃત જાહેર કરી હતી.
કોણ છે સોનુ સિંહ? કેસનો મુખ્ય શંકાસ્પદ ચહેરો
પોલીસ તપાસ દરમિયાન સામે આવ્યું છે કે સોનુ સિંહ મૂળ પંજાબનો વતની છે. તે સિંગરૌલી સ્થિત નોર્ધર્ન કોલફિલ્ડ્સ લિમિટેડ (NCL) માં કામ કરતી એક આઉટસોર્સિંગ કંપનીમાં એન્જિનિયર તરીકે ફરજ બજાવતો હતો. નોકરીના સિલસિલામાં તેનું સિંગરૌલી આવવા-જવાનું રહેતું હતું અને આ દરમિયાન જ તેની ઓળખાણ નિધિ તિવારી સાથે થઈ હતી. સમય જતાં બંને વચ્ચે અવારનવાર વાતચીત શરૂ થઈ હતી. નિધિના આત્મઘાતી પગલાં પાછળ સોનુ સાથે થયેલી છેલ્લી વાતચીત અને બોલાચાલી જવાબદાર હોવાની શક્યતા વ્યક્ત કરવામાં આવી રહી છે.
ઘટના બાદથી જ સોનુ ગાયબ, ફોન પણ સ્વિચ ઓફ
નિધિ તિવારીના મોત બાદથી જ આ કેસમાં એક નવું રહસ્ય ઘેરાયું છે. ઘટનાના તુરંત બાદથી એન્જિનિયર સોનુ સિંહનો મોબાઈલ ફોન સતત સ્વિચ ઓફ આવી રહ્યો છે અને તે પોલીસની પહોંચથી બહાર ગાયબ થઈ ગયો છે. બનાવની જાણ થતાં જ પોલીસે ઘટનાસ્થળેથી ડિજિટલ પુરાવાઓ એકત્રિત કર્યા છે અને સોનુના લોકેશનને શોધવા માટે કોલ ડિટેલ રેકોર્ડ (CDR) નો સહારો લઈ રહી છે. સોનુનું આ રીતે અચાનક ગાયબ થઈ જવું આ કેસમાં તેની સંડોવણી પર અનેક સવાલો ઊભા કરે છે.
પરિવારમાં અગાઉ પણ બનેલી કરૂણ ઘટનાઓ
નિધિના પિતા અશોક તિવારી મૂળ ઉત્તર પ્રદેશના મૈનપુરી જિલ્લાના વતની છે અને હિન્ડાલ્કો પાવર પ્લાન્ટમાં નોકરી કરતા હતા. તેમણે મોરવા ખાતે ઘર બનાવ્યું હતું. નિવૃત્તિ બાદ પિતા ગામડે જતા રહ્યા હતા જ્યારે નિધિ તેની માતા અને બહેનો સાથે સિંગરૌલીના ઘરમાં રહેતી હતી. ઉલ્લેખનીય છે કે, પરિવાર માટે આ આઘાત નવો નથી; આશરે પાંચ વર્ષ પહેલાં નિધિની એક મોટી બહેને પણ આ જ રીતે આત્મહત્યા કરી લીધી હતી. જ્યારે નાની બહેન શીતલના લગ્ન સિંગરૌલીમાં જ થયા છે. એક જ પરિવારની બીજી દીકરીના રહસ્યમય મોતથી સમગ્ર વિસ્તારમાં શોકનો માહોલ છવાઈ ગયો છે.
પોલીસ તપાસ અને અણઉકેલાયેલા સવાલો
હાલમાં મોરવા પોલીસ આ સમગ્ર કેસમાં જુદા જુદા એંગલથી તપાસ કરી રહી છે. નિધિ અને સોનુ વચ્ચે અગાઉ કેવા સંબંધો હતા? ઘટનાની રાત્રે બંને વચ્ચે શું વાતચીત થઈ હતી? અને સોનુને નિધિના આત્મહત્યાના કદમ વિશે અગાઉથી કેવી રીતે ખબર પડી? આ તમામ સવાલોના જવાબ મેળવવા પોલીસ સોનુ સિંહની શોધખોળ ઝડપી બનાવી રહી છે. આ ઉપરાંત, નિધિના સોશિયલ મીડિયા એકાઉન્ટ્સ, ખાનગી ચેટ્સ અને છેલ્લા વીડિયો સ્ટેટસની પણ ટેકનિકલ તપાસ કરવામાં આવી રહી છે જેથી મોતનું સાચું કારણ બહાર આવી શકે.
