Sheohar Crime News: બિહારના શિવહર જિલ્લાના તરયાની છપરા પોલીસ સ્ટેશન વિસ્તારમાં પ્રતિશોધની એક એવી ઘટના સામે આવી છે જેણે સમગ્ર પંથકને હચમચાવી દીધો છે. હોળીના પર્વને હવે એક દિવસ જ બાકી છે, ત્યારે એક કળિયુગી પુત્રએ પોતાના પિતાના 10 વર્ષ જૂના મૃત્યુનો બદલો લેવા માટે પાડોશી યુવકની છરીના ઘા મારી કરપીણ હત્યા કરી નાખી છે. આરોપી યુવાન છેલ્લા એક દાયકાથી મનમાં વેરની અગ્નિ લઈને જીવતો હતો અને તક મળતા જ તેણે આ જઘન્ય અપરાધને અંજામ આપ્યો હતો.
મિત્રતાના નામે ઘરેથી બોલાવ્યો અને ખેતરમાં ખેલ ખેલ્યો
મૃતકની ઓળખ ગંગા ધરમપુર ગામના 35 વર્ષીય વિનોદ રાય તરીકે થઈ છે. મૃતકના ભાઈ સુબોધ રાયના જણાવ્યા અનુસાર, સોમવારે સાંજે આશરે 4 વાગ્યાની આસપાસ આરોપી અરુણ કુમાર વિનોદના ઘરે આવ્યો હતો. તેણે વિનોદને 'હોલિકા દહન'ની તૈયારીઓ કરવા માટે અને લાકડાં ભેગા કરવાના બહાને ખેતરમાં સાથે આવવા લલચાવ્યો હતો. વિનોદને જરા પણ અંદાજ નહોતો કે જે વ્યક્તિ સાથે તે જઈ રહ્યો છે, તે તેની કબર ખોદવા તૈયાર બેઠો છે. ખેતરમાં લઈ ગયા બાદ નશામાં ધૂત અરુણે છરી કાઢી વિનોદ પર એકપછી એક અનેક ઘા ઝીંકી દીધા હતા, જેના કારણે વિનોદનું ઘટનાસ્થળે જ મોત નીપજ્યું હતું.
10 વર્ષ જૂનું વેર: વીજ કરંટ અને પિતાનું મોત
પોલીસ તપાસમાં આ હત્યા પાછળનું જે કારણ બહાર આવ્યું છે તે અત્યંત ચોંકાવનારું છે. એસડીપીઓ (SDPO) સુશીલ કુમારે જણાવ્યું હતું કે, આશરે 10 વર્ષ પહેલાં આરોપી અરુણના પિતાનું વિનોદ રાયના ખેતરમાં વીજ કરંટ લાગવાથી મોત થયું હતું. વિનોદે પોતાના પાકને જંગલી પશુઓથી બચાવવા માટે ખેતરની ફરતે વીજળીના તારની વાડ કરી હતી, જેમાં અજાણતા અરુણના પિતાનો સંપર્ક થતા તેમનું કરુણ મૃત્યુ નીપજ્યું હતું. જોકે તે સમયે આ એક અકસ્માત હતો, પરંતુ અરુણના મનમાં એ વાત ઘર કરી ગઈ હતી કે તેના પિતાના મોત માટે વિનોદ જ જવાબદાર છે.
સવારે લોહીલુહાણ હાલતમાં મળ્યો મૃતદેહ
મંગળવારે સવારે જ્યારે ગામના લોકો ખેતરો તરફ ગયા ત્યારે વિનોદ રાયનો લોહીલુહાણ મૃતદેહ મળી આવતા ગામમાં ભારે ખળભળાટ મચી ગયો હતો. ઘટનાની જાણ થતાં જ એસડીપીઓ સુશીલ કુમારની આગેવાની હેઠળની પોલીસ ટીમ ડોગ સ્ક્વોડ અને ફોરેન્સિક નિષ્ણાતો સાથે ઘટનાસ્થળે પહોંચી હતી. પોલીસે ત્વરિત કાર્યવાહી હાથ ધરી શંકાના આધારે અરુણ કુમારની તેના ઘરેથી ધરપકડ કરી હતી. પ્રાથમિક પૂછપરછમાં જ આરોપીએ પોતાનો ગુનો કબૂલી લેતા જણાવ્યું હતું કે, તે વર્ષોથી આ તકની રાહ જોઈ રહ્યો હતો.
ગામમાં આતંક
પોલીસે ગુનામાં વપરાયેલ હથિયાર કબજે કર્યું છે અને મૃતદેહને પોસ્ટમોર્ટમ માટે શિવહર સદર હોસ્પિટલ મોકલી આપ્યો છે. હોળીના તહેવાર પૂર્વે બનેલી આ ઘટનાથી ગંગા ધરમપુર ગામમાં શોક અને દહેશતનો માહોલ છે. હાલમાં પોલીસ આ કેસમાં અન્ય કોઈની સંડોવણી છે કે કેમ તે દિશામાં પણ તપાસ કરી રહી છે.








