Commonwealth Kabaddi Championship 2026: ગુજરાતના અમદાવાદમાં યોજાયેલી પ્રથમ કોમનવેલ્થ કબડ્ડી ચેમ્પિયનશિપ 2026માં ભારતીય ખેલાડીઓએ શાનદાર પ્રદર્શન કરીને દેશનું ગૌરવ વધાર્યું છે. ટૂર્નામેન્ટની ફાઇનલમાં ભારતની પુરુષ અને મહિલા બંને ટીમોએ જીત મેળવીને ગોલ્ડ મેડલ પોતાના નામે કર્યા છે. પુરુષ ટીમે શ્રીલંકાને 54-20થી હરાવી ચેમ્પિયન બનવાનો ખિતાબ મેળવ્યો હતો, જ્યારે મહિલા ટીમે યુગાન્ડાને 35-15થી હરાવી ગોલ્ડ મેડલ જીત્યો હતો. આમ, પ્રથમ જ કોમનવેલ્થ કબડ્ડી ચેમ્પિયનશિપમાં ભારતે બંને વિભાગમાં ચેમ્પિયન બનીને શાનદાર સિદ્ધિ મેળવી છે.
પુરુષ ટીમે શ્રીલંકાને 34 પોઇન્ટથી હરાવ્યું
31 ઓક્ટોબરના રોજ અમદાવાદના વીર સાવરકર સ્પોર્ટ્સ કોમ્પ્લેક્સ ખાતે રમાયેલી પુરુષોની ફાઇનલમાં ભારતીય ટીમે શરૂઆતથી જ શ્રીલંકા પર દબદબો જાળવી રાખ્યો હતો. ભારતીય ખેલાડીઓએ રેડિંગ અને ડિફેન્સ બંનેમાં શાનદાર રમત બતાવી હતી. ભારતે કુલ 54 પોઇન્ટ મેળવ્યા હતા, જ્યારે શ્રીલંકાની ટીમ માત્ર 20 પોઇન્ટ સુધી જ પહોંચી શકી હતી. આ સાથે ભારતે 34 પોઇન્ટના મોટા અંતરથી જીત મેળવીને ટૂર્નામેન્ટનો પ્રથમ પુરુષ ચેમ્પિયન બનવાનો ગૌરવ મેળવ્યો હતો.
આદિત્ય શિંદે અને ભરત હૂડાનું શાનદાર પ્રદર્શન
ફાઇનલમાં ભારતીય ટીમ તરફથી આદિત્ય શિંદેએ સૌથી વધુ 10 રેડ પોઇન્ટ મેળવ્યા હતા. તેણે ચાર બોનસ પોઇન્ટ સાથે સુપર-10 પણ પૂર્ણ કર્યું હતું. ભરત હૂડાએ બીજા હાફમાં આઠ રેડ પોઇન્ટ મેળવીને ટીમની જીતમાં મહત્ત્વનું યોગદાન આપ્યું હતું. પંકજ મોહિતેએ છ અને ઉપકપ્તાન નવીન કુમારે પાંચ પોઇન્ટ મેળવ્યા હતા. બીજી તરફ, ડિફેન્સમાં યોગેશ દહિયાએ પાંચમાંથી પાંચ સફળ ટેકલ કરીને હાઇ-5 નોંધાવ્યો હતો. ભારતીય ટીમે મેચ દરમિયાન ચાર વખત શ્રીલંકાને ઓલઆઉટ કરીને પોતાની મજબૂત રમતનો પરિચય આપ્યો હતો.
મહિલા ટીમે પણ યુગાન્ડાને હરાવી ગોલ્ડ જીત્યો
પુરુષ ટીમની જીત પહેલાં જ ભારતીય મહિલા ટીમે પણ ફાઇનલમાં શાનદાર પ્રદર્શન કર્યું હતું. ભારતે યુગાન્ડાને 35-15થી હરાવી મહિલા વિભાગનો ખિતાબ જીત્યો હતો. ભારતીય મહિલા ખેલાડીઓએ શરૂઆતથી જ મેચ પર પકડ બનાવી રાખી હતી. પ્રથમ હાફમાં ભારતે 22-7ની મજબૂત સરસાઈ મેળવી હતી. બીજા હાફમાં પણ ટીમે પોતાનું પ્રદર્શન જાળવી રાખ્યું હતું. ભારતે મેચ દરમિયાન બે વખત યુગાન્ડાની ટીમને ઓલઆઉટ કરીને જીત વધુ મજબૂત બનાવી હતી.
સાક્ષી બની ફાઇનલની સૌથી સફળ ખેલાડી
મહિલા ફાઇનલમાં સાક્ષીએ ભારત તરફથી સૌથી વધુ નવ રેડ પોઇન્ટ મેળવ્યા હતા. તેણે પોતાની 10 રેડમાંથી નવમાં પોઇન્ટ મેળવ્યા હતા. આ ઉપરાંત અનુ સેને છ અને કેપ્ટન નિધિ શર્માએ પાંચ પોઇન્ટનું યોગદાન આપ્યું હતું. ડિફેન્સમાં રિતુ મિથરવાલ અને સુમન સાહુએ ચાર-ચાર ટેકલ પોઇન્ટ મેળવીને ટીમને મજબૂતી આપી હતી. સાક્ષીએ સમગ્ર ટૂર્નામેન્ટમાં છ મેચ રમીને કુલ 52 પોઇન્ટ મેળવ્યા હતા અને ફાઇનલમાં પણ ટીમ માટે મહત્ત્વપૂર્ણ ભૂમિકા ભજવી હતી.
બંને ભારતીય ટીમોની ટૂર્નામેન્ટમાં અપરાજિત સફર
આ ચેમ્પિયનશિપમાં ભારતીય પુરુષ અને મહિલા બંને ટીમોએ શરૂઆતથી જ પોતાનો દબદબો જાળવી રાખ્યો હતો. પુરુષ ટીમે ગ્રુપ-Aમાં છમાંથી છ મેચ જીતીને પ્રથમ સ્થાન મેળવ્યું હતું. આ દરમિયાન ભારતે ઇંગ્લેન્ડને 46-26, યુગાન્ડાને 44-30, મલેશિયાને 37-23, નાઇજીરિયાને 50-23, તાન્ઝાનિયાને 48-20 અને શ્રીલંકાને 45-24થી હરાવ્યું હતું. ત્યારબાદ સેમિફાઇનલમાં બાંગ્લાદેશને 56-27થી હરાવી ફાઇનલમાં પ્રવેશ કર્યો હતો. અંતે શ્રીલંકાને હરાવી ભારતે સતત આઠમી જીત સાથે ખિતાબ પોતાના નામે કર્યો હતો.
મહિલા ટીમે પણ એકપણ મેચ ગુમાવી નહીં
ભારતીય મહિલા ટીમે પણ સમગ્ર ટૂર્નામેન્ટમાં અપરાજિત રહીને ચેમ્પિયનશિપ પૂર્ણ કરી હતી. ભારતે ગ્રુપ-Aમાં મલેશિયાને 73-13, સિંગાપોરને 32-16, યુગાન્ડાને 41-18 અને નાઇજીરિયાને 38-10થી હરાવ્યું હતું. ગ્રુપમાં પ્રથમ સ્થાન મેળવ્યા બાદ સેમિફાઇનલમાં શ્રીલંકાને 39-14થી હરાવી ફાઇનલમાં જગ્યા બનાવી હતી. ત્યારબાદ ફાઇનલમાં યુગાન્ડાને 35-15થી હરાવી છમાંથી છ મેચ જીતીને ગોલ્ડ મેડલ પર કબજો કર્યો હતો.
અમદાવાદના દર્શકોના સમર્થનથી ખેલાડીઓ ખુશ
ખિતાબ જીત્યા બાદ ભારતીય ખેલાડીઓએ અમદાવાદના દર્શકો તરફથી મળેલા સમર્થનને પણ યાદ કર્યું હતું. પુરુષ ટીમના આદિત્ય શિંદેએ કહ્યું હતું કે, અમદાવાદમાં સતત આવી આંતરરાષ્ટ્રીય સ્પર્ધાઓ યોજાવાથી સ્થાનિક લોકોને પણ રમતનો આનંદ માણવાની તક મળે છે. દર્શકો તરફથી મળેલા પ્રેમ અને સમર્થન બદલ તેણે આભાર વ્યક્ત કર્યો હતો. મહિલા ટીમની સાક્ષીએ પણ ગોલ્ડ મેડલ જીતવાની ખુશી વ્યક્ત કરતાં કહ્યું હતું કે, આવી આંતરરાષ્ટ્રીય સ્પર્ધાઓથી કબડ્ડી રમતનો વિકાસ થશે અને યુવા ખેલાડીઓને ઘણું શીખવા મળશે.
અમદાવાદમાં યોજાયેલી ચેમ્પિયનશિપ બની ભારતીય કબડ્ડી માટે યાદગાર
23થી 31 ઓક્ટોબર દરમિયાન અમદાવાદમાં યોજાયેલી આ પ્રથમ કોમનવેલ્થ કબડ્ડી ચેમ્પિયનશિપમાં પુરુષ વિભાગમાં 13 અને મહિલા વિભાગમાં 10 ટીમોએ ભાગ લીધો હતો. નવ દિવસ સુધી ચાલેલી આ સ્પર્ધામાં ભારતીય ખેલાડીઓએ સતત શ્રેષ્ઠ પ્રદર્શન કર્યું હતું. બંને ફાઇનલમાં જીત મેળવીને ભારતે પુરુષ અને મહિલા બંને વિભાગમાં ગોલ્ડ મેડલ જીત્યા છે. આમ, અમદાવાદની ધરતી પર ભારતીય કબડ્ડી ટીમોએ બેવડી જીત સાથે ટૂર્નામેન્ટને યાદગાર બનાવી દીધી છે.
