આંતરરાષ્ટ્રીય રમતગમતના નકશા પર અમદાવાદની છલાંગ! વર્લ્ડ વેઇટલિફ્ટિંગ ચેમ્પિયનશિપની યજમાની મળી

Ahmedabad World Weightlifting Championship 2029: અમદાવાદે આંતરરાષ્ટ્રીય રમતગમતના ક્ષેત્રમાં વધુ એક મોટી સિદ્ધિ મેળવી છે. ઇન્ટરનેશનલ વેઇટલિફ્ટિંગ ફેડરેશન (IWF) દ્વારા વર્ષ 2029ની સિનિયર વર્લ્ડ વેઇટલિફ્ટિંગ ચેમ્પિયનશિપની યજમાની અમદાવાદને સોંપવામાં આવી છે. આ સાથે જ ભારત પ્રથમ વખત આ પ્રતિષ્ઠિત સિનિયર વર્લ્ડ ચેમ્પિયનશિપનું આયોજન કરશે. IWFના એક્ઝિક્યુટિવ બોર્ડે 25 ઑક્ટોબર, 2026ના રોજ ચીનના નિંગબોમાં યોજાયેલી બેઠકમાં આ નિર્ણય લીધો હતો. ગુજરાતના નાયબ મુખ્યમંત્રી અને રમતગમત મંત્રી હર્ષ સંઘવીએ સોશિયલ મીડિયા પ્લેટફોર્મ X પર આ સમાચારની જાહેરાત કરતાં ખુશી વ્યક્ત કરી હતી. અમદાવાદને આ યજમાની મળતાં ગુજરાતના રમતગમત ક્ષેત્રે આંતરરાષ્ટ્રીય સ્તરે વધુ એક મહત્ત્વપૂર્ણ પગલું ભર્યું છે.

રશિયા અને વેનેઝુએલાની દાવેદારી વચ્ચે ભારતને સફળતા
2029ની વર્લ્ડ ચેમ્પિયનશિપની યજમાની મેળવવા માટે ભારતની સાથે રશિયા અને વેનેઝુએલાએ પણ દાવેદારી કરી હતી. જોકે, IWFના એક્ઝિક્યુટિવ બોર્ડે અમદાવાદની પસંદગી કરી હતી. આ જ બેઠકમાં રશિયાની રાજધાની મોસ્કોને 2030ની સિનિયર વર્લ્ડ વેઇટલિફ્ટિંગ ચેમ્પિયનશિપની યજમાની સોંપવામાં આવી છે. જ્યારે વેનેઝુએલાના કારાકાસમાં 2028ની વર્લ્ડ જુનિયર ચેમ્પિયનશિપ યોજાશે.

અગાઉ પણ અમદાવાદમાં યોજાઈ ચૂકી છે આંતરરાષ્ટ્રીય સ્પર્ધાઓ
અમદાવાદમાં વર્ષ 2025માં કોમનવેલ્થ વેઇટલિફ્ટિંગ ચેમ્પિયનશિપનું આયોજન થયું હતું. ત્યારબાદ મે 2026માં ગુજરાતમાં એશિયન સિનિયર વેઇટલિફ્ટિંગ ચેમ્પિયનશિપ યોજાઈ હતી. હવે 2029માં વિશ્વભરના શ્રેષ્ઠ વેઇટલિફ્ટર્સ અમદાવાદમાં પોતાની તાકાત અને કૌશલ્યનું પ્રદર્શન કરશે. આ સ્પર્ધાથી ભારતીય ખેલાડીઓને ઘરઆંગણે વિશ્વસ્તરના ખેલાડીઓ સામે સ્પર્ધા કરવાની તક મળશે. સાથે જ રમતગમતના માળખા, સ્થાનિક વ્યવસાયો અને પ્રવાસન ક્ષેત્રને પણ લાભ થવાની સંભાવના છે.

2030 કોમનવેલ્થ ગેમ્સ પહેલાં અમદાવાદ માટે મહત્ત્વપૂર્ણ આયોજન
અમદાવાદને 2030ની કોમનવેલ્થ ગેમ્સની યજમાની પણ મળેલી છે. આવી સ્થિતિમાં 2029ની વર્લ્ડ વેઇટલિફ્ટિંગ ચેમ્પિયનશિપ શહેર માટે આંતરરાષ્ટ્રીય રમતગમતના આયોજનનો અનુભવ વધારશે. ભારતીય વેઇટલિફ્ટિંગ ફેડરેશનના પ્રમુખ સહદેવ યાદવે પણ આ નિર્ણયને ભારતીય વેઇટલિફ્ટિંગ માટે મહત્ત્વપૂર્ણ ગણાવ્યો હતો. અહેવાલો અનુસાર, 2029ની આ ચેમ્પિયનશિપ 2030 કોમનવેલ્થ ગેમ્સ માટે ક્વોલિફાઇંગ ઇવેન્ટ તરીકે પણ કામ કરશે. જોકે, ક્વોલિફિકેશનના નિયમો અને માપદંડો સંબંધિત સત્તાવાર વિગતોને આધારે ખેલાડીઓની પસંદગી નક્કી થશે. આ યજમાની સાથે અમદાવાદમાં આંતરરાષ્ટ્રીય રમતગમતના મોટા આયોજનોની યાદીમાં વધુ એક પ્રતિષ્ઠિત સ્પર્ધાનો ઉમેરો થયો છે. હવે 2029માં વિશ્વભરના વેઇટલિફ્ટર્સ અમદાવાદના મંચ પર પોતાની પ્રતિભા બતાવશે.