Will petrol get costlier: પેટ્રોલમાં ઈથેનોલ મિશ્રણને લઈને દેશમાં ચર્ચા ચાલી રહી છે ત્યારે હવે પેટ્રોલ-ડીઝલના ભાવને લઈને પણ સામાન્ય લોકોને ચિંતા વધારી શકે તેવા સંકેતો મળી રહ્યા છે. આંતરરાષ્ટ્રીય બજારમાં ક્રૂડ ઓઈલના ભાવ સતત વધી રહ્યા છે. જો ક્રૂડ ઓઈલનો ભાવ પ્રતિ બેરલ 95થી 100 ડોલરથી ઉપર પહોંચે છે, તો ભારતમાં પેટ્રોલ અને ડીઝલના ભાવમાં વધારો થવાની શક્યતા ઊભી થઈ શકે છે.
પ્રતિ બેરલના ક્રૂડ ભાવ સુધી બ્રેક-ઈવન સ્તરે કામગીરી
ઇન્ડિયન ઓઈલ, ભારત પેટ્રોલિયમ અને હિન્દુસ્તાન પેટ્રોલિયમ જેવી સરકારી ઓઈલ કંપનીઓ લગભગ 85થી 90 ડોલર પ્રતિ બેરલના ક્રૂડ ભાવ સુધી બ્રેક-ઈવન સ્તરે કામગીરી કરી શકે છે. તેથી હાલના ભાવ સ્તરે પેટ્રોલ અને ડીઝલના ભાવમાં તાત્કાલિક વધારો કરવાની જરૂરિયાત દેખાતી નથી. જોકે, 2 સપ્ટેમ્બરે ક્રૂડ ઓઈલના ભાવ લગભગ 95 ડોલર પ્રતિ બેરલ આસપાસ હતા અને છેલ્લા બે દિવસમાં તેમાં 4 ડોલરથી વધુનો વધારો નોંધાયો છે.
ડીઝલના ભાવમાં આશરે 7.5 રૂપિયા પ્રતિ લિટર
આવી જ સ્થિતિ મે મહિનામાં પણ સર્જાઈ હતી, જ્યારે લગભગ ચાર વર્ષ બાદ ઓઈલ કંપનીઓએ પેટ્રોલ અને ડીઝલના ભાવમાં આશરે 7.5 રૂપિયા પ્રતિ લિટરનો વધારો કર્યો હતો. તે સમયે અમેરિકન-ઈરાન સંઘર્ષને કારણે ભારતીય ક્રૂડ બાસ્કેટનો ભાવ વધીને પ્રતિ બેરલ 106.23 ડોલર સુધી પહોંચ્યો હતો. જેના કારણે ક્રૂડની કિંમત 100 ડોલરની સપાટીથી ઉપર ગઈ હતી.
રિફાઈનરીઓ પાસેથી ડીઝલ ખરીદવામાં થોડું નુકસાન
કંપનીઓ પોતાની રિફાઈનરીમાં ઉત્પાદિત ડીઝલના વેચાણમાં 85થી 90 ડોલર પ્રતિ બેરલના ક્રૂડ ભાવ સુધી વળતર મેળવી શકે છે, જોકે સ્વતંત્ર રિફાઈનરીઓ પાસેથી ડીઝલ ખરીદવામાં થોડું નુકસાન થઈ શકે છે. ICRAના અંદાજ પ્રમાણે હાલમાં પેટ્રોલના વેચાણ પર ઓઈલ કંપનીઓનું માર્કેટિંગ માર્જિન આશરે 5 રૂપિયા પ્રતિ લિટર છે, જ્યારે ડીઝલ પર માર્કેટિંગ માર્જિન નકારાત્મક 15 રૂપિયા પ્રતિ લિટર હોવાનું જણાવાયું છે.
