TRAI News about Recharge: ટેલિકોમ રેગ્યુલેટરી ઓથોરિટી ઓફ ઇન્ડિયા (TRAI)એ મોબાઇલ ગ્રાહકોના હિતમાં મહત્વપૂર્ણ નિર્ણય લીધો છે. TRAIએ 22 સપ્ટેમ્બર 2026ના રોજ ‘Telecom Consumers Protection (13th Amendment) Regulations, 2026’ જાહેર કર્યા છે. આ નિયમો હેઠળ વોઇસ કોલિંગ અને SMSની જરૂરિયાત ધરાવતા ગ્રાહકો માટે ડેટા વગરના ‘Voice and SMS Only’ પ્લાન ઉપલબ્ધ કરાવવાની જોગવાઈ કરવામાં આવી છે. TRAIની સત્તાવાર માહિતી મુજબ આવા પ્લાનમાં ડેટા સામેલ હોતો નથી અને તેની વેલિડિટી 365 દિવસ સુધી હોઈ શકે છે.
દર મહિને એક જ તારીખે રિચાર્જનો વિકલ્પ
નવા નિયમોમાં ગ્રાહકો માટે રિચાર્જને વધુ અનુકૂળ બનાવવાના પ્રાવધાન પણ કરવામાં આવ્યા છે. 30 દિવસ સુધીની વેલિડિટી ધરાવતા પ્લાન માટે વોઇસ અને SMS આધારિત વિકલ્પ ઉપલબ્ધ કરાવવાનો નિયમ છે. સાથે જ ગ્રાહકોને દર મહિને એક નિશ્ચિત તારીખે રિચાર્જ રિન્યૂ કરી શકાય તેવો વિકલ્પ આપવાનો હેતુ છે. TRAIની માહિતી અનુસાર સેવા પ્રદાતાઓએ 30 દિવસનો પ્લાન અને દર મહિને એક જ તારીખે રિન્યૂ થઈ શકે તેવો પ્લાન ઉપલબ્ધ કરાવવાનો છે.
લાંબી વેલિડિટી માટે પણ Voice-SMS Only પ્લાન
30 દિવસથી વધુની વેલિડિટી ઇચ્છતા ગ્રાહકો માટે પણ ડેટા વગરના માત્ર વોઇસ અને SMS પ્લાનની જોગવાઈ કરવામાં આવી છે. આવા પ્લાન ખાસ કરીને એવા ગ્રાહકો માટે ઉપયોગી બની શકે છે જેમને મોબાઇલ ઇન્ટરનેટની જરૂરિયાત નથી અને તેઓ માત્ર કોલિંગ તથા મેસેજિંગ માટે સિમનો ઉપયોગ કરે છે. TRAIએ આવા પ્લાનને અલગથી ‘Voice and SMS Only Packs’ તરીકે વ્યાખ્યાયિત કર્યા છે.
ફીચર ફોન અને ડેટાનો ઉપયોગ ન કરતા ગ્રાહકોને ફાયદો
આ નિયમથી ફીચર ફોનનો ઉપયોગ કરતા તેમજ મોબાઇલ ડેટાની જરૂરિયાત ન ધરાવતા ગ્રાહકોને રાહત મળી શકે છે. ખાસ કરીને વરિષ્ઠ નાગરિકો અને એવા ગ્રાહકો કે જેઓ મુખ્યત્વે કોલિંગ અને SMS માટે મોબાઇલ કનેક્શન રાખે છે, તેમને પોતાની જરૂરિયાત મુજબનો પ્લાન પસંદ કરવાની વધુ તક મળશે. TRAIની પ્રક્રિયા દરમિયાન રજૂ થયેલા ગ્રાહક સંગઠનોના અભિપ્રાયોમાં પણ ફીચર ફોન, વરિષ્ઠ નાગરિકો અને ઓછી આવક ધરાવતા ગ્રાહકો માટે આવા પ્લાનની જરૂરિયાત પર ભાર મૂકાયો હતો.
ગ્રાહકો અને નિષ્ણાતોના સૂચનો બાદ અંતિમ નિયમ
TRAIએ એપ્રિલ 2026માં આ સુધારા માટે ડ્રાફ્ટ જાહેર કર્યો હતો અને તેના પર 5 મે સુધી સૂચનો મંગાવવામાં આવ્યા હતા. વિવિધ ટેલિકોમ કંપનીઓ, ગ્રાહક સંગઠનો, ઉદ્યોગ સંગઠનો અને વ્યક્તિઓએ આ પ્રક્રિયામાં પોતાના અભિપ્રાયો રજૂ કર્યા હતા. ત્યારબાદ TRAIએ 22 સપ્ટેમ્બર 2026ના રોજ 13મો સુધારો સત્તાવાર રીતે જાહેર કર્યો છે.
