Switzerland Tops Global Ranking in Monthly Take-Home Pay: દરેક નોકરીયાત વ્યક્તિનું સપનું હોય છે કે તેને મહિને સારું વેતન મળે અને કપાત થયા બાદ હાથમાં આવતી રકમ (Take-Home Pay) વધારે હોય. સામાન્ય રીતે લોકો કમાણી અને ભવ્ય જીવનશૈલી માટે અમેરિકા કે બ્રિટન જેવા દેશોની વાત કરતા હોય છે, પરંતુ તાજેતરના વૈશ્વિક આંકડાઓએ એક નવો જ ધડાકો કર્યો છે. ઇન-હેન્ડ સેલરી અને નેટ બચતના મામલે સ્વિટ્ઝરલેન્ડે સમગ્ર વિશ્વમાં પ્રથમ સ્થાન પ્રાપ્ત કર્યું છે. આ મામલે તેણે અમેરિકા અને યુરોપના અનેક ધનાઢ્ય દેશોને ઘણા મોટા માર્જિનથી પાછળ છોડી દીધા છે.
સ્વિટ્ઝરલેન્ડમાં દર મહિને હાથમાં કેટલા રૂપિયા આવે છે?
ઓઈસીડી (OECD) અને ગ્લોબલ રેન્કિંગ ગણતરી મુજબ, સ્વિટ્ઝરલેન્ડમાં કામ કરતા કર્મચારીઓની સરેરાશ ગ્રોસ મંથલી સેલરી આશરે $10,112 (અંદાજે 8.4 લાખ રૂપિયાથી વધુ) હોય છે. ટેક્સ અને સોશિયલ સિક્યોરિટી જેવી તમામ કપાત (આશરે $1,830) બાદ કર્યા પછી પણ કર્મચારીના બેંક એકાઉન્ટમાં દર મહિને સરેરાશ $8,282 (આશરે 6.9 લાખથી 7 લાખ રૂપિયા) જેટલી તોતિંગ 'ટેક-હોમ સેલરી' આવે છે. વિશ્વના અન્ય કોઈપણ દેશમાં કપાત પછી હાથમાં આવતી રકમ આટલી વધારે નથી.
અમેરિકા અને બ્રિટન જેવા મોટા દેશો ક્યાં ફેંકાયા?
મોટાભાગના લોકો અમેરિકા જઈને કમાવાની ઘેલછા ધરાવતા હોય છે, પરંતુ જ્યારે હાથમાં બચતી ચોખ્ખી સેલરીની વાત આવે ત્યારે અમેરિકા આ ગ્લોબલ લિસ્ટમાં છઠ્ઠા ક્રમે ધકેલાઈ ગયું છે. યુનાઇટેડ સ્ટેટ્સમાં સરેરાશ ટેક-હોમ સેલરી દર મહિને આશરે $4,638 (આશરે 3.87 લાખ રૂપિયા) જેટલી રહે છે, જે સ્વિટ્ઝરલેન્ડ કરતાં લગભગ અડધી છે. આ યાદીમાં આઈસલેન્ડ બીજા સ્થાને ($5,873) અને લક્ઝમબર્ગ ત્રીજા સ્થાને ($5,013) છે. આ સિવાય યુનાઇટેડ કિંગડમ ચોથા અને નેધરલેન્ડ પાંચમા ક્રમે આવે છે.
ઓછો ટેક્સ અને ઊંચો પગાર: સ્વિટ્ઝરલેન્ડની આ સફળતાનું રહસ્ય શું છે?
સ્વિટ્ઝરલેન્ડમાં ઊંચી ઇન-હેન્ડ સેલરી મળવા પાછળનું મુખ્ય કારણ ત્યાંનું આર્થિક માળખું અને ટેક્સ સિસ્ટમ છે. અન્ય યુરોપિયન દેશો જેમ કે જર્મની કે ફ્રાન્સમાં કર્મચારીઓના ગ્રોસ પગારમાંથી 30% થી 40% જેટલો ભાગ ટેક્સ અને સોશિયલ કપાતમાં જતો રહે છે. જ્યારે સ્વિટ્ઝરલેન્ડમાં ટેક્સના દર પ્રમાણમાં અનુકૂળ અને ઓછા છે. ઉપરાંત, ત્યાં આઈટી, ફાઈનાન્સ, બેન્કિંગ અને ફાર્માસ્યુટિકલ જેવા ક્ષેત્રોમાં વિશ્વની ટોચની કંપનીઓ કાર્યરત છે, જે તેમના કર્મચારીઓને વૈશ્વિક સ્તરે સૌથી પ્રીમિયમ પેકેજ ઓફર કરે છે.
મોંઘવારીનો પડકાર: વધારે પગાર હોવા છતાં ખર્ચ કેટલો?
જોકે, આ સિક્કાની બીજી બાજુ પણ સમજવી જરૂરી છે. સ્વિટ્ઝરલેન્ડ જેટલો ઊંચો પગાર આપે છે, તેટલું જ ત્યાં રહેવું મોંઘું પણ છે. ઝ્યુરિચ અને જીનિવા જેવા શહેરોમાં મકાનનું ભાડું, હેલ્થ ઈન્સ્યોરન્સ અને દૈનિક જીવનજરૂરી ચીજવસ્તુઓનો ખર્ચ વિશ્વમાં સૌથી વધુ ગણાય છે. તેમ છતાં, નિષ્ણાતોનું માનવું છે કે તમામ મોટા ખર્ચાઓ પૂરા કર્યા પછી પણ સ્વિટ્ઝરલેન્ડમાં રહેતો સામાન્ય કર્મચારી મહિનાના અંતે જેટલી ચોખ્ખી બચત કરી શકે છે, તેટલી બચત વિશ્વના અન્ય કોઈ ખૂણે કરવી શક્ય બનતી નથી.
