PPF Withdrawal Rules: પબ્લિક પ્રોવિડન્ટ ફંડ (PPF) એ સુરક્ષિત અને લાંબા ગાળાના રોકાણ માટેનો અત્યંત પ્રિય અને રોકાણકારોનો ભરોસાપાત્ર વિકલ્પ માનવામાં આવે છે. સામાન્ય રીતે લોકોમાં એવી ગેરસમજ પ્રવર્તે છે કે PPF નો લોક-ઇન પિરિયડ 15 વર્ષનો હોવાથી તે પહેલાં ખાતામાંથી એક પણ રૂપિયો ઉપાડી શકાતો નથી. જોકે, આ બાબત સંપૂર્ણપણે સાચી નથી. કેન્દ્ર સરકારના નિયમો અનુસાર, જો તમને અચાનક નાણાકીય જરૂરિયાત ઊભી થાય, તો તમે મેચ્યોરિટી સમયગાળો પૂર્ણ થતાં પહેલાં પણ નિયમોને આધીન રહીને તમારા PPF ખાતામાંથી આંશિક રકમ ઉપાડી શકો છો.
આંશિક ઉપાડ (Partial Withdrawal) ની સુવિધા ક્યારથી મળે છે?
PPF ખાતામાંથી ગમે ત્યારે પૈસા ઉપાડવાની છૂટ હોતી નથી, કારણ કે આ એક બચત યોજના છે. નિયમ મુજબ, ખાતું ખોલાવ્યા પછીના સાતમા નાણાકીય વર્ષથી તમે આંશિક ઉપાડ માટે હકદાર બનો છો. સરળ ભાષામાં કહીએ તો, જે વર્ષે ખાતું ખોલાવ્યું હોય તે વર્ષ પૂરું થયા બાદ વધુ પાંચ નાણાકીય વર્ષ પૂર્ણ થાય એટલે આંશિક રકમ ઉપાડી શકાય છે. દાખલા તરીકે, જો તમે નાણાકીય વર્ષ 2020-21 માં ખાતું ખોલાવ્યું હોય, તો તમે 2026-27ના નાણાકીય વર્ષથી પૈસા ઉપાડવા માટે પાત્ર બનશો.
ઉપાડની રકમ નક્કી કરવાની ગણતરી અને મર્યાદા
તમે PPF ખાતામાંથી ઇચ્છો એટલી રકમ ઉપાડી શકતા નથી, પરંતુ તેના માટે ચોક્કસ મર્યાદા નક્કી કરવામાં આવી છે. ઉપાડની રકમ ગણવા માટે બે બેલેન્સની સરખામણી કરવામાં આવે છે: (1) અગાઉના નાણાકીય વર્ષના અંતે રહેલું બેલેન્સ અને (2) ઉપાડના વર્ષથી ચાર વર્ષ પહેલાંના નાણાકીય વર્ષના અંતે રહેલું બેલેન્સ. આ બેમાંથી જે રકમ ઓછી હોય તેના 50 ટકા સુધીની જ રકમ ઉપાડી શકાય છે. આ સાથે એ ખાસ ધ્યાનમાં રાખવું જરૂરી છે કે એક નાણાકીય વર્ષમાં માત્ર એક જ વાર આંશિક ઉપાડ કરી શકાય છે.
15 વર્ષની મેચ્યોરિટી પછી રોકાણકારો પાસે કયા વિકલ્પો છે?
PPF ની મૂળ મુદત 15 વર્ષની હોય છે, જેની ગણતરી ખાતું ખોલ્યાના નાણાકીય વર્ષના અંતથી થાય છે. 15 વર્ષ પૂરા થયા પછી ખાતાધારક વ્યાજ સહિત પૂરેપૂરી રકમ ઉપાડીને ખાતું બંધ કરી શકે છે. જોકે, જો તે સમયે તમને નાણાંની તુરંત જરૂર ન હોય, તો તમારી પાસે બે ઉત્તમ વિકલ્પો ઉપલબ્ધ રહે છે: પ્રથમ, કોઈ પણ નવું રોકાણ કર્યા વિના ખાતું ચાલુ રાખવું અને તેના પર નિયમિત વ્યાજ મેળવતા રહેવું. બીજો વિકલ્પ, 5-5 વર્ષના બ્લોકમાં ખાતાની મુદત લંબાવીને રોકાણ ચાલુ રાખવું.
કટોકટીના સમયે 15 વર્ષ પહેલાં ખાતું બંધ (Premature Closure) કરવાની જોગવાઈ
નિયમ પ્રમાણે PPF ખાતું સમય પહેલાં સંપૂર્ણપણે બંધ કરી શકાતું નથી, પરંતુ ખાસ પરિસ્થિતિઓમાં ખાતું ખોલ્યાના 5 વર્ષ પૂરા થયા બાદ તેને બંધ કરવાની મંજૂરી મળે છે. ગંભીર કે અસાધ્ય બીમારીની સારવાર માટે, બાળકોના ઉચ્ચ શિક્ષણ માટે અથવા ખાતાધારક Non-Resident Indian (NRI) બને તેવા કિસ્સામાં ખાતું પ્રી-મેચ્યોર બંધ કરી શકાય છે. જોકે, મુદત પહેલાં ખાતું બંધ કરવા બદલ સરકાર દ્વારા મળવાપાત્ર કુલ વ્યાજદરમાં 1 ટકાનો દંડ/ઘટાડો કરવામાં આવે છે.
અણધારી ઘટના અને નોમિનીના હક અંગેના નિયમો
દુર્ભાગ્યવશ જો 15 વર્ષની મેચ્યોરિટી પહેલાં ખાતાધારકનું અવસાન થાય, તો 15 વર્ષ પૂરા થવાની રાહ જોવાની જરૂર રહેતી નથી. આવી પરિસ્થિતિમાં ખાતામાં જમા થયેલી સમગ્ર રકમ અને વ્યાજ તેમના દ્વારા નિમાયેલા નોમિની (વારસદાર) કે કાયદેસરના વારસદારને સોંપી દેવામાં આવે છે. ટૂંકમાં, PPF એ રોજિંદા ઉપયોગ માટેનું બચત ખાતું નથી પરંતુ દીર્ઘકાલીન નાણાકીય સુરક્ષા આપતું કવચ છે, જે મુશ્કેલીના સમયે રોકાણકારને શ્રેષ્ઠ નાણાકીય ટેકો પૂરો પાડે છે.
