PM Modi at global fintech fest 2026: વડાપ્રધાન નરેન્દ્ર મોદી મંગળવારે મુંબઈમાં આયોજિત ગ્લોબલ ફિનટેક ફેસ્ટ 2026માં ઉપસ્થિત રહ્યા હતા. કાર્યક્રમને સંબોધતા તેમણે વર્તમાન વૈશ્વિક પરિસ્થિતિનો ઉલ્લેખ કરતાં કહ્યું કે દુનિયા હાલમાં સંઘર્ષ અને અનિશ્ચિતતાના સમયમાંથી પસાર થઈ રહી છે. ક્રૂડ ઓઇલ સહિતના મુદ્દાઓને લઈને આંતરરાષ્ટ્રીય સ્તરે પડકારો છે અને ખાસ કરીને એપ્રિલથી જૂનનો ત્રિમાસિક સમયગાળો મુશ્કેલ રહ્યો છે. આવી પ્રતિકૂળ સ્થિતિ વચ્ચે પણ ભારતે 7.8 ટકાનો GDP ગ્રોથ નોંધાવ્યો છે, જેનાથી વૈશ્વિક સ્તરે ભારત પ્રત્યેનો વિશ્વાસ વધુ મજબૂત થાય છે.
સતત ત્રીજા વર્ષે તેમની હાજરી બીજી હેટ્રિક
PM મોદીએ પોતાના સંબોધનમાં ‘હેટ્રિક’નો પણ ખાસ ઉલ્લેખ કર્યો હતો. તેમણે કહ્યું કે વર્ષ 2024માં સતત ત્રીજી વખત સરકાર બનવી એક હેટ્રિક હતી, જ્યારે ગ્લોબલ ફિનટેક ફેસ્ટમાં સતત ત્રીજા વર્ષે તેમની હાજરી બીજી હેટ્રિક છે. તેમના મતે આ સતત હાજરી દર્શાવે છે કે વિકસિત ભારતના નિર્માણમાં ફિનટેક ક્ષેત્ર અને તેમાં કાર્યરત લોકોની ભૂમિકા કેટલી મહત્વપૂર્ણ છે. તેમણે ઉમેર્યું કે દર વર્ષે આ મંચ પર યુવાનોની સંખ્યા, નવી ઊર્જા અને નવી તકો વધતી જોવા મળે છે. ભારતીય યુવાનોમાં જોખમ લેવાની ક્ષમતા અને મોટા સપના જોવાનો આત્મવિશ્વાસ વધી રહ્યો છે, જેના કારણે વિકસિત ભારતના ભવિષ્ય અંગે તેમનો વિશ્વાસ વધુ દ્રઢ બન્યો છે.
બેંકિંગ વ્યવસ્થા સાથે જોડવામાં મહત્વપૂર્ણ ભૂમિકા
વડાપ્રધાને UPIને ભારતીય ફિનટેક ક્ષેત્રની સૌથી મોટી સફળતાઓમાંથી એક ગણાવી હતી. તેમણે કહ્યું કે UPIએ દેશના કરોડો સામાન્ય નાગરિકોને ઔપચારિક બેંકિંગ વ્યવસ્થા સાથે જોડવામાં મહત્વપૂર્ણ ભૂમિકા ભજવી છે. ફ્રાન્સના રાષ્ટ્રપતિ ઇમેન્યુઅલ મેક્રોને પણ તેની પ્રશંસા કરી હોવાનો તેમણે ઉલ્લેખ કર્યો હતો. PM મોદીના જણાવ્યા મુજબ ડિજિટલ ટેકનોલોજીના ક્ષેત્રમાં ભારત હવે માત્ર અન્ય દેશોના મોડલ અપનાવતું નથી, પરંતુ પોતાના નિયમો અને વૈશ્વિક માપદંડો નક્કી કરવાની દિશામાં આગળ વધી રહ્યું છે.
ભારતના બેંકિંગ અને નાણાકીય ક્ષેત્રમાં મોટો પરિવર્તન
આ પ્રસંગે RBIના ગવર્નર સંજય મલ્હોત્રાએ જણાવ્યું હતું કે છેલ્લા એક દાયકામાં ફિનટેક ક્રાંતિએ ભારતના બેંકિંગ અને નાણાકીય ક્ષેત્રમાં મોટો પરિવર્તન લાવ્યો છે. બેંકિંગ સેવાઓ હવે શાખાઓ પૂરતી મર્યાદિત ન રહેતા સીધી સામાન્ય નાગરિકોના હાથ સુધી પહોંચી છે. નાના શહેરોના વેપારીઓ, અંતરિયાળ ગામોના ખેડૂતો અને મેટ્રો શહેરોના પ્રોફેશનલ્સ UPI, આધાર-સક્ષમ પેમેન્ટ સિસ્ટમ (AEPS) અને જન ધન ઇકોસિસ્ટમ મારફતે ડિજિટલ પેમેન્ટ, બચત અને ધિરાણ જેવી સેવાઓ મેળવી રહ્યા છે. તેમના મતે ફિનટેકે નાણાકીય સમાવેશને માત્ર સરકારી નીતિ નહીં, પરંતુ કરોડો ભારતીયોના રોજિંદા જીવનનો હિસ્સો બનાવી દીધો છે.
