Maruti Suzuki Rail Dispatch: કારને ફેક્ટરીથી ગ્રાહક સુધી પહોંચાડવાની લોજિસ્ટિક્સ વ્યવસ્થામાં મારુતિ સુઝુકીએ વધુ એક મહત્વનું પગલું ભર્યું છે. કંપનીએ માનેસરથી 120 કારનો પહેલો કન્સાઇનમેન્ટ ટ્રેન મારફતે તમિલનાડુના પોલ્લાચી રેલવે ટર્મિનલ સુધી મોકલ્યો છે. ખાસ વાત એ છે કે પોલ્લાચી વિસ્તારમાં આ પ્રથમ ઓટોમોબાઈલ રેલ શિપમેન્ટ છે.
પહેલીવાર પોલ્લાચી પહોંચ્યો કારનો મોટો જથ્થો
અત્યાર સુધી પોલ્લાચી અને આસપાસના વિસ્તારો માટે રેલ દ્વારા મોકલવામાં આવતી કારને અન્ય ટર્મિનલ પર ઉતાર્યા બાદ ટ્રક મારફતે અહીં પહોંચાડવી પડતી હતી. તેનું મુખ્ય કારણ પોલ્લાચીમાં NMG/MMG જેવા વિશિષ્ટ ઓટોમોબાઈલ રેકમાંથી સીધી કાર ઉતારવાની જરૂરી સુવિધાનો અભાવ હતો. હવે સ્ટેશનના પુનર્વિકાસ અને જરૂરી ટર્મિનલ ઇન્ફ્રાસ્ટ્રક્ચર ઉપલબ્ધ થતાં મારુતિ સુઝુકીએ અહીંથી સીધી રેલ લોજિસ્ટિક્સની શરૂઆત કરી છે. આ પગલું દક્ષિણ ભારતમાં કારની ડિલિવરી વ્યવસ્થાને વધુ સરળ બનાવવાની દિશામાં મહત્વપૂર્ણ માનવામાં આવી રહ્યું છે.
120 કારથી શરૂ થઈ નવી રેલ લોજિસ્ટિક્સ યાત્રા
પોલ્લાચીથી શરૂ થયેલી આ સેવા માત્ર 120 કાર સુધી મર્યાદિત રહેવાની નથી. ભવિષ્યમાં અહીંથી વાર્ષિક આશરે 70 ઓટોમોબાઈલ રેક ચલાવવાની યોજના છે, જેના મારફતે દર વર્ષે 11,000થી વધુ વાહનોનું રેલ પરિવહન થઈ શકે છે. મારુતિ સુઝુકીએ 2014-15માં રેલ દ્વારા કાર મોકલવાની શરૂઆત કરી હતી. કંપનીના કુલ ડિસ્પેચમાં રેલ પરિવહનનો હિસ્સો ત્યારે માત્ર 5% હતો, જે હવે નાણાકીય વર્ષ 2025-26માં 26.5% સુધી પહોંચ્યો છે. કંપનીના જણાવ્યા મુજબ અત્યાર સુધીમાં 32 લાખથી વધુ વાહનો રેલ દ્વારા મોકલવામાં આવ્યા છે.
રોડ કરતાં રેલ કેમ બની રહી છે પસંદગી?
કારને રેલ મારફતે મોકલવાથી લોજિસ્ટિક્સ ખર્ચ ઘટાડવાની સાથે ડીઝલનો વપરાશ અને કાર્બન ઉત્સર્જન પણ ઘટાડી શકાય છે. સાથે જ મોટા ટ્રક દ્વારા થતી લાંબા અંતરની હેરફેરમાં ઘટાડો થતાં શહેરોમાં ટ્રાફિકનો બોજ પણ ઓછો થઈ શકે છે. પોલ્લાચી ટર્મિનલની શરૂઆતથી ખાસ કરીને કેરળ અને દક્ષિણ ભારતના અન્ય વિસ્તારોમાં તહેવારોની સિઝન દરમિયાન વધતી કારની માંગ પૂરી કરવામાં કંપનીને મદદ મળી શકે છે.
મોટા કન્સાઇનમેન્ટમાં ખર્ચ પણ ઘટે છે
રેલ પરિવહનમાં કન્સાઇનમેન્ટનું કદ પણ મહત્વનું છે. 120 કાર ધરાવતા એક રેક માટે નૂર ખર્ચ આશરે ₹30 લાખ હોવાનું જણાવવામાં આવ્યું છે, જ્યારે 260 કારના રેક માટે ખર્ચ આશરે ₹45 લાખ રહેવાનો અંદાજ છે. એટલે કે એક જ ટ્રેનમાં વધુ કાર મોકલવાથી પ્રતિ કાર પરિવહન ખર્ચમાં નોંધપાત્ર ઘટાડો થઈ શકે છે. પોલ્લાચીમાં જરૂરી સુવિધા શરૂ થતાં હવે મારુતિ સહિત અન્ય ઓટોમોબાઈલ કંપનીઓ માટે પણ આ ટર્મિનલ દક્ષિણ ભારતના કાર સપ્લાય નેટવર્કમાં મહત્વની ભૂમિકા ભજવી શકે છે.
