Indias economy strengthens: અમેરિકા-ઈરાન વચ્ચેના યુદ્ધ અને વૈશ્વિક સ્તરે ચાલી રહેલી અનિશ્ચિતતા વચ્ચે પણ ભારતીય અર્થતંત્રની ગતિ અટકી નથી. નાણાકીય વર્ષ 2026-27ના પ્રથમ ત્રિમાસિક ગાળામાં ભારતની અર્થવ્યવસ્થાએ 7.8 ટકાની મજબૂત વૃદ્ધિ નોંધાવી છે. સોમવારે જાહેર થયેલા સરકારી આંકડા પ્રમાણે એપ્રિલથી જૂન 2026 દરમિયાન દેશની રિયલ GDP ગ્રોથ 7.8 ટકા રહી છે. જ્યારે આ સમયગાળામાં નોમિનલ GDP ગ્રોથ 10.3 ટકા નોંધાઈ છે.
તમામ અંદાજોને પાછળ છોડી ભારતની ઈકોનોમી
ભારતની 7.8 ટકાની GDP ગ્રોથ અર્થશાસ્ત્રીઓના અંદાજ કરતાં પણ વધુ રહી છે. એપ્રિલ-જૂનના ત્રિમાસિક ગાળામાં GDP ગ્રોથ 7.1થી 7.2 ટકા રહેવાનો અંદાજ વ્યક્ત કરવામાં આવી રહ્યો હતો. જોકે, જાહેર થયેલા આંકડામાં ભારતે આ તમામ અંદાજોને પાછળ છોડી દીધા છે. ગયા વર્ષના સમાન ત્રિમાસિક ગાળામાં ભારતની અર્થવ્યવસ્થા 6.9 ટકાની ઝડપે વધી હતી. એટલે કે આ વખતે GDP ગ્રોથમાં વધુ મજબૂતી જોવા મળી છે.
મેન્યુફેક્ચરિંગ અને કન્સ્ટ્રક્શનથી મળ્યો મોટો સપોર્ટ
જૂન ત્રિમાસિક ગાળામાં મેન્યુફેક્ચરિંગ અને કન્સ્ટ્રક્શન સેક્ટરે અર્થતંત્રને મજબૂત ટેકો આપ્યો છે. આ ઉપરાંત સ્થાનિક માગ, સરકારી મૂડી ખર્ચ અને નિકાસ જેવી બાબતો પણ આર્થિક વૃદ્ધિ માટે મહત્વપૂર્ણ રહી છે. વૈશ્વિક સ્તરે તેલની કિંમતો, સપ્લાય ચેઇન અને વેપારને લઈને અનિશ્ચિતતા હોવા છતાં દેશમાં સ્થાનિક વપરાશ અને આર્થિક પ્રવૃત્તિઓ ચાલુ રહી છે. જેના કારણે ભારતની GDP ગ્રોથને મોટો સપોર્ટ મળ્યો છે.
PM મોદીએ કહ્યું- 'નિરાશાવાદીઓ નિષ્ફળ રહ્યા'
GDPના આંકડા જાહેર થયા બાદ વડાપ્રધાન નરેન્દ્ર મોદીએ પણ આ અંગે પ્રતિક્રિયા આપી હતી. તેમણે કહ્યું કે વૈશ્વિક અનિશ્ચિતતાઓ, વધેલા તેલના ભાવ અને સપ્લાય ચેઇનની સમસ્યાઓ વચ્ચે ભારતે 7.8 ટકાની મજબૂત GDP ગ્રોથ હાંસલ કરી છે. PM મોદીએ કહ્યું કે દેશના લોકોની સામૂહિક શક્તિના કારણે ભારત આટલો વિકાસ હાંસલ કરી શક્યું છે અને 'નિરાશાવાદીઓ નિષ્ફળ રહ્યા અને ભારત ફરી એકવાર ખીલી ઉઠ્યું.'
હવે આગામી ત્રિમાસિક ગાળામાં શું થશે?
FY27ની શરૂઆતના આ આંકડા ભારતીય અર્થતંત્ર માટે મજબૂત શરૂઆત દર્શાવે છે. જોકે, આવનારા ત્રિમાસિક ગાળામાં આ ગતિ કેટલી જળવાઈ રહે છે તે મહત્વનું રહેશે. ખાસ કરીને ખાનગી રોકાણ, લોકોનો વપરાશ, નિકાસ અને વૈશ્વિક સ્થિતિ ભારતની આગળની GDP ગ્રોથ પર મોટી અસર કરી શકે છે. જો આ ક્ષેત્રોમાં મજબૂતી જળવાઈ રહેશે તો ભારતીય અર્થતંત્રની વૃદ્ધિની ઝડપ આગળ પણ જળવાઈ રહેવાની શક્યતા છે.
GDP એટલે શું?
GDP એટલે Gross Domestic Product, જેને ગુજરાતીમાં કુલ ઘરેલુ ઉત્પાદન કહેવામાં આવે છે. કોઈ દેશની અંદર ચોક્કસ સમયગાળા દરમિયાન ઉત્પાદિત થતી તમામ અંતિમ વસ્તુઓ અને સેવાઓનું કુલ નાણાકીય મૂલ્ય એટલે GDP. GDPનો ગ્રોથ વધે તેનો સામાન્ય અર્થ એ થાય કે દેશમાં ઉત્પાદન અને આર્થિક પ્રવૃત્તિ વધી રહી છે. જ્યારે GDP ગ્રોથમાં ઘટાડો થાય તો અર્થતંત્રની ગતિ ધીમી પડી રહી હોવાનો સંકેત મળી શકે છે.
