Buy Vegetables Directly From Farmers: ભારત સરકારે ખેડૂતોની આવક વધારવા અને પુરવઠા શૃંખલાને વધુ પારદર્શક બનાવવા તરફ એક મોટું પગલું ભર્યું છે. કૃષિ સચિવ દેવેશ ચતુર્વેદીએ સોમવારે દેશભરના હોટલ અને રેસ્ટોરન્ટ માલિકોને ખેડૂત ઉત્પાદક સંગઠનો (FPO) પાસેથી સીધા ફળો, શાકભાજી અને અન્ય ખાદ્ય પદાર્થો ખરીદવા અપીલ કરી. તેમણે કહ્યું કે આનાથી વચેટિયાઓની ભૂમિકા દૂર થશે અને ખેડૂતોને તેમના ઉત્પાદન માટે વાજબી ભાવ મળશે તેની ખાતરી થશે.
GI ટૅગવાળા ઉત્પાદનોને પ્રોત્સાહન
ચતુર્વેદીએ એવું પણ જણાવ્યું હતું કે હોસ્પિટાલિટી ઉદ્યોગે ભારતીય ભોજનની સાચી ઓળખ, GI-ટેગવાળા ઉત્પાદનોને તેમના મેનુમાં પ્રોત્સાહન આપવું જોઈએ. આનાથી ટ્યુરિસ્ટ ભારતના અલગ-અલગ ભોજનનો અનુભવ કરી શકશે અને હોટલોને તેમની વાનગીઓની ગુણવત્તા અને પ્રામાણિકતા વધારવામાં મદદ મળશે. કૃષિ મંત્રાલય અને હોટેલ અને રેસ્ટોરન્ટ એસોસિએશન ઓફ નોર્ધન ઈન્ડિયા દ્વારા આયોજિત એક કાર્યક્રમમાં બોલતા, તેમણે કહ્યું કે જો હોટલો તાજા શાકભાજી, ફળો, મસાલા અને અન્ય ઉત્પાદનો સીધા મેળવવા માટે સ્થાનિક ખેડૂતો સાથે ભાગીદારી કરે છે, તો તે ખેડૂતો અને ઉદ્યોગ બંને માટે ફાયદાકારક રહેશે.
વેબ પ્લેટફોર્મ ટૂંક સમયમાં થશે ઉપલબ્ધ
ચતુર્વેદીએ જણાવ્યું કે હાલમાં, દેશમાં 35,000 થી વધુ FPO સક્રિય છે, જેમાંથી 10,000 સરકાર સમર્થિત યોજનાઓ હેઠળ બનાવવામાં આવ્યા છે. કૃષિ મંત્રાલય ટૂંક સમયમાં એક વેબ-આધારિત પ્લેટફોર્મ શરૂ કરશે જેના પર FPO તેમના વધારાના સ્ટોકની યાદી બનાવી શકશે જેથી હોટલ અને રેસ્ટોરન્ટ્સ તેમની પાસેથી સીધી ખરીદી કરી શકે. તેમણે ઉમેર્યું કે હાલમાં, હોટલ અને રેસ્ટોરન્ટ્સ, શાકમાર્કેટ અથવા રિટેલ ચેઇનમાંથી માલ ખરીદે છે. તેમણે કહ્યું 'અમે ફક્ત ઇચ્છીએ છીએ કે તેઓ તેમની નજીકના FPO સાથે ડાયરેક્ટ સોર્સિંગ શરૂ કરે.'
તેમણે કૃષિ ક્ષેત્રના પડકારો
ચતુર્વેદીએ જણાવ્યું કે કૃષિ દેશના GDPમાં 18% ફાળો આપે છે અને 46% લોક આનાથી જોડાયેલા છે, જે આવકની અસમાનતાનું સૂચક છે. તેમણે ઉમેર્યું કે ખેડૂતો બે મુખ્ય સમસ્યાઓનો સામનો કરે છે: નાની અને છૂટાછવાયા જમીન ધારણાઓ અને તેમના ઉત્પાદન માટે તેમને મળતા ભાવ અને બજાર ભાવ વચ્ચે નોંધપાત્ર તફાવત. સીધી ખરીદી પ્રણાલી આ ભાવ તફાવત ઘટાડવામાં મદદ કરી શકે છે. તેમણે સમજાવ્યું કે દેશમાં ઓર્ગેનિક અને જંતુનાશક મુક્ત ખોરાકની માંગ ઝડપથી વધી રહી છે. તેથી, કુદરતી ખેતી કરતા ખેડૂત જૂથો પ્રમાણિત ઓર્ગેનિક ઉત્પાદનો પૂરા પાડવા માટે હોટેલ ચેન સાથે ભાગીદારી કરી શકે છે.
GI ઉત્પાદનો ભારતની ઓળખ વધારશે
તેમણે કહ્યું કે બાસમતી ઉપરાંત, ભારતમાં ઘણા GI-ટેગવાળા ઉત્પાદનો છે - અનાજ, ફળો, શાકભાજી, મસાલા અને પ્રોસેસ્ડ ફૂડ - જેનો હોટલોએ પ્રચાર કરવો જોઈએ. GI ઉત્પાદનોનો ઉપયોગ કરવાથી તમારું મેનુ અનોખું બનશે અને ટ્યુરિસ્ટ ભારતના અધિકૃત ખાદ્ય વારસાને ઓળખી શકશે.
પર્યટન મંત્રાલયે પણ આ પહેલને મંજૂરી આપી
પ્રવાસન મંત્રાલયના અધિક સચિવ સુમન બિલ્લાએ જણાવ્યું હતું કે કૃષિ અને પર્યટન - બંને ક્ષેત્રો માટે ડાયરેક્ટ સોર્સિંગ ફાયદાકારક છે. તેમણે ઉમેર્યું હતું કે પ્રવાસીઓ સૌથી ઉપર અધિકૃત અનુભવો શોધે છે, અને જ્યારે ઘટકો તાજા અને સ્થાનિક હોય ત્યારે ખોરાક ખરેખર સ્વાદિષ્ટ બને છે.
હોટેલ ઉદ્યોગ FPOs સાથે સીધા જોડાશે
ફેડરેશન ઓફ હોટેલ એન્ડ રેસ્ટોરન્ટ એસોસિએશન ઓફ ઈન્ડિયાએ જાહેરાત કરી છે કે તે દેશભરના FPOs ની યાદી, તેમના ઉત્પાદનો અને સંપર્ક વિગતો ધરાવતી એક બુકલેટ બહાર પાડશે. હોટેલ ઉદ્યોગને FPOs સાથે સીધા જોડવા માટે એક ખાસ સેલ બનાવવામાં આવશે.
