Gold and Silver Rate Today (September 08, 2026): ભારતીય બુલિયન માર્કેટમાં સોના-ચાંદીના ભાવમાં સતત ઉતાર-ચઢાવ જોવા મળી રહ્યો છે. 4 સપ્ટેમ્બર 2026ના રોજ 24 કેરેટ સોનું ₹15,666 પ્રતિ ગ્રામની મહિનાની ઊંચી સપાટીએ પહોંચ્યું હતું. ત્યારબાદ ભાવમાં ઘટાડો નોંધાઈ રહ્યો છે. આજે એટલે કે 8 સપ્ટેમ્બરે 24 કેરેટ સોનાના ભાવમાં પ્રતિ ગ્રામ ₹1નો ઘટાડો થયો છે, જ્યારે ગઈકાલે ₹65નો ઘટાડો નોંધાયો હતો. આજે દેશમાં 24 કેરેટ સોનું ₹1,54,140 અને 22 કેરેટ સોનું ₹1,41,290 પ્રતિ 10 ગ્રામ છે.
ગુજરાતના મુખ્ય શહેરોમાં સોનાનો ભાવ
અમદાવાદ, સુરત, વડોદરા અને રાજકોટમાં આજે 24 કેરેટ સોનાનો ભાવ ₹1,54,190 પ્રતિ 10 ગ્રામ છે, જ્યારે 22 કેરેટ સોનાનો ભાવ ₹1,41,340 પ્રતિ 10 ગ્રામ છે. 18 કેરેટ સોનાનો ભાવ ₹1,15,650 છે. દિલ્હીમાં 24K સોનું ₹1,54,290 અને 22K સોનું ₹1,41,440 પ્રતિ 10 ગ્રામ છે. મુંબઈ, કોલકાતા, બેંગલુરુ, હૈદરાબાદ અને ચેન્નાઈમાં 24K સોનું ₹1,54,140 અને 22K સોનું ₹1,41,290 પ્રતિ 10 ગ્રામ છે.
છેલ્લા 10 દિવસમાં સોનાના ભાવમાં શું થયું?
છેલ્લા 10 દિવસના ટ્રેન્ડ પર નજર કરીએ તો 3 સપ્ટેમ્બરે 24K સોનું ₹15,535 પ્રતિ ગ્રામ હતું. 4 સપ્ટેમ્બરે તેમાં ₹131નો વધારો થતાં ભાવ ₹15,666 થયો હતો. ત્યારબાદ 5 સપ્ટેમ્બરે ₹186નો ઘટાડો થયો હતો. 7 સપ્ટેમ્બરે ફરી ₹65નો ઘટાડો નોંધાયો અને આજે 24K સોનું ₹15,414 પ્રતિ ગ્રામ છે. આમ, મહિનાની શરૂઆતની સરખામણીમાં ભાવમાં મામૂલી વધારો હોવા છતાં તાજેતરમાં ઘટાડાનો ટ્રેન્ડ જોવા મળી રહ્યો છે.
22K અને 24K સોનામાં શું તફાવત છે?
24 કેરેટ સોનું સામાન્ય રીતે 99.9 ટકા શુદ્ધ માનવામાં આવે છે. જોકે, તે નરમ હોવાથી જ્વેલરી બનાવવા માટે તેનો ઉપયોગ મર્યાદિત હોય છે. બીજી તરફ, 22 કેરેટ સોનામાં આશરે 91.6 ટકા સોનું હોય છે અને તેમાં અન્ય ધાતુઓ ભેળવવામાં આવે છે. તેથી 22K સોનું વધુ મજબૂત હોય છે અને ઘરેણાં બનાવવા માટે તેનો વધુ ઉપયોગ થાય છે. સોનું ખરીદતી વખતે BIS હોલમાર્ક અને શુદ્ધતાનો માર્ક જરૂર તપાસવો જોઈએ. સામાન્ય રીતે 24K માટે 999, 22K માટે 916 અને 18K માટે 750 ફાઇનનેસ માર્ક જોવા મળે છે.
ચાર દિવસની સ્થિરતા બાદ ચાંદીના ભાવમાં ઘટાડો
સોનાની સાથે આજે ચાંદીના ભાવમાં પણ ઘટાડો થયો છે. આ મહિનાની શરૂઆતમાં 1 અને 2 સપ્ટેમ્બરે એક કિલો ચાંદીના ભાવમાં દરરોજ ₹5,000નો ઘટાડો થયો હતો, જ્યારે 3 સપ્ટેમ્બરે ₹5,000નો વધારો નોંધાયો હતો. ત્યારબાદ ચાર દિવસ સુધી ભાવ સ્થિર રહ્યા હતા. હવે આજે દિલ્હીમાં એક કિલો ચાંદીનો ભાવ ₹100 ઘટીને ₹2,49,900 થયો છે. મુંબઈ અને કોલકાતામાં પણ ચાંદીનો ભાવ ₹2,49,900 પ્રતિ કિલો છે. જોકે, ચેન્નાઈમાં એક કિલો ચાંદીનો ભાવ ₹2,54,900 છે, જે ચાર મુખ્ય મહાનગરોમાં સૌથી વધુ છે.
US-Iran તણાવ અને Fedની FOMC મિનિટ્સ પર નજર
ભૂરાજકીય મોરચે US-Iran તણાવ કિંમતી ધાતુઓના બજાર માટે મહત્વનું પરિબળ છે. જોકે, હાલમાં રોકાણકારોની નજર મુખ્યત્વે આ અઠવાડિયે જાહેર થનારી US Federal Reserveની FOMC બેઠકની મિનિટ્સ પર છે. ફેડની વ્યાજદર નીતિ અંગેના સંકેતો, ડોલરની ચાલ અને વૈશ્વિક ભૂરાજકીય સ્થિતિ આગામી દિવસોમાં સોના-ચાંદીના ભાવને અસર કરી શકે છે.
મિસ્ડ કોલથી જાણી શકશો સોના-ચાંદીનો ભાવ
સોના-ચાંદીના લેટેસ્ટ ભાવ જાણવા માટે ગ્રાહકો 8955664433 નંબર પર મિસ્ડ કોલ કરી શકે છે. મિસ્ડ કોલ બાદ SMS દ્વારા ભાવની માહિતી મળવાની સુવિધા ઉપલબ્ધ છે. આ ઉપરાંત સત્તાવાર બુલિયન રેટ્સ માટે ibjarates.com પર પણ માહિતી મેળવી શકાય છે.
નોંધ: સોના-ચાંદીના ભાવ બજારની સ્થિતિ પ્રમાણે સતત બદલાતા રહે છે. જ્વેલરી ખરીદતી વખતે સોનાના મૂળ ભાવ ઉપરાંત મેકિંગ ચાર્જ, GST અને અન્ય લાગુ ચાર્જ પણ ચૂકવવાના રહે છે.
