Gold and Silver Price Crash: વૈશ્વિક બજારમાં ડોલર, બોન્ડ યીલ્ડ, વ્યાજદર અને ક્રૂડ ઓઈલના ભાવમાં થયેલા ફેરફારોની અસર સોના-ચાંદીના ભાવ પર જોવા મળી રહી છે. વાયદા બજારમાં ભારે વેચવાલીના દબાણ વચ્ચે બંને કિંમતી ધાતુઓના ભાવમાં મોટો ઘટાડો નોંધાયો છે. છેલ્લા એક અઠવાડિયામાં સોના અને ચાંદી બંનેમાં 6 ટકાથી વધુનો ઘટાડો જોવા મળ્યો છે.
MCXમાં ઓપનિંગ સાથે જ સોના-ચાંદીમાં કડાકો
MCX વાયદા બજારમાં આજે સોનું અને ચાંદી ભારે ઘટાડા સાથે ખુલ્યા હતા. Gold October Futureનો અગાઉનો બંધ ભાવ ₹1,51,729 હતો, જ્યારે આજે તે ₹1,50,033 પર ખુલ્યો હતો. ટ્રેડિંગ દરમિયાન સોનું ઘટીને ₹1,49,665ના સ્તરે પહોંચ્યું હતું. આમ, દિવસ દરમિયાન સોનાના ભાવમાં ₹2,000થી વધુનો ઘટાડો જોવા મળ્યો હતો. બીજી તરફ, Silver December Futureનો અગાઉનો બંધ ભાવ ₹2,35,441 હતો. ચાંદી આજે ₹2,32,536ના સ્તરે ખુલ્યા બાદ ઘટીને ₹2,31,914 સુધી પહોંચી હતી. આ રીતે ચાંદીના ભાવમાં ₹3,500થી વધુનો કડાકો નોંધાયો હતો.
સોના-ચાંદીના ભાવ કેમ ઘટ્યા?
ડોલર અને અમેરિકન બોન્ડ યીલ્ડમાં વધારો: અમેરિકન ડોલર ઇન્ડેક્સ 99ની ઉપર પહોંચ્યો છે, જ્યારે 10 વર્ષીય યુએસ ટ્રેઝરી બોન્ડ યીલ્ડ 4.80 ટકાને વટાવી ગઈ છે. બોન્ડ યીલ્ડ વધવાથી રોકાણકારો માટે વ્યાજ આપતી એસેટ્સ વધુ આકર્ષક બને છે, જેના કારણે સોના-ચાંદી જેવી નોન-યીલ્ડિંગ એસેટ્સ પર દબાણ આવે છે.
ક્રૂડ ઓઈલ મોંઘું થતાં ફુગાવાની ચિંતા: પશ્ચિમ એશિયામાં વધતા તણાવ વચ્ચે ક્રૂડ ઓઈલના ભાવમાં વધારો થયો છે. WTI ક્રૂડ $96 પ્રતિ બેરલને પાર જતાં વૈશ્વિક ફુગાવાને લઈને ચિંતા વધી છે. મોંઘવારી વધવાની આશંકા પણ કિંમતી ધાતુઓના ભાવ પર અસર કરી રહી છે.
વ્યાજદરમાં ઘટાડાની આશા નબળી પડી: ફુગાવો ઊંચો રહેવાની શક્યતાને કારણે અમેરિકી ફેડરલ રિઝર્વ સહિતની મધ્યસ્થ બેંકો વ્યાજદરમાં ઝડપથી ઘટાડો નહીં કરે તેવી ધારણા મજબૂત બની છે. ઊંચા વ્યાજદર લાંબા સમય સુધી રહેવાની આશંકાથી સોના-ચાંદીમાં વેચવાલી વધી છે.
મજબૂત ડોલર સામે સેફ-હેવન માગ પણ નબળી: ભૌગોલિક તણાવ વધે ત્યારે સામાન્ય રીતે સોનાની સેફ-હેવન માગ વધે છે. જોકે, હાલ મજબૂત ડોલર અને ઊંચી બોન્ડ યીલ્ડનો પ્રભાવ એટલો વધારે છે કે સેફ-હેવન ખરીદી પણ સોના-ચાંદીના ભાવને ઘટાડાથી બચાવી શકી નથી.
આગળ ભાવની દિશા પર રહેશે નજર
આંતરરાષ્ટ્રીય બજારમાં ડોલરની ચાલ, અમેરિકન બોન્ડ યીલ્ડ, ફેડના વ્યાજદર અંગેના સંકેતો અને પશ્ચિમ એશિયાની સ્થિતિ આગામી દિવસોમાં સોના-ચાંદીના ભાવ માટે મહત્વપૂર્ણ રહેશે. ખાસ કરીને ક્રૂડ ઓઈલમાં વધુ તેજી અને વ્યાજદર અંગેના કડક સંકેતો કિંમતી ધાતુઓ પર વધુ દબાણ લાવી શકે છે.
