Gold Silver Price Crash: સોના અને ચાંદીના ભાવમાં સતત તેજી બાદ શુક્રવારે અચાનક મોટો ઘટાડો જોવા મળ્યો હતો. અમેરિકી ફેડરલ રિઝર્વના વ્યાજદર અંગેના સંકેતો વચ્ચે વૈશ્વિક બજારમાં કિંમતી ધાતુઓમાં ભારે વેચવાલી જોવા મળી. તેની સીધી અસર ભારતીય વાયદા બજાર એટલે કે MCX પર પણ પડી હતી. સોનું તેના તાજેતરના રેકોર્ડ સ્તરથી ₹4,000થી વધુ અને ચાંદી ₹9,000થી વધુ નીચે આવી ગઈ હતી.
MCX પર સોના-ચાંદીમાં મોટો ઘટાડો
શુક્રવારે શરૂઆતના કારોબારમાં સોના-ચાંદીના ભાવમાં ભારે કડાકો જોવા મળ્યો હતો. જો, કે દિવસના અંત સુધીમાં બંને કિંમતી ધાતુઓમાં થોડી રિકવરી પણ જોવા મળી હતી.
સોનું: 5 ઓક્ટોબરના વાયદા કોન્ટ્રાક્ટમાં સોનું ₹2,596 એટલે કે 1.63% ઘટીને ₹1,56,400 પ્રતિ 10 ગ્રામ પર બંધ થયું હતું.
ચાંદી: 4 સપ્ટેમ્બરના વાયદા કોન્ટ્રાક્ટમાં ચાંદી ₹4,000 એટલે કે 1.66% ઘટીને ₹2,36,651 પ્રતિ કિલો પર આવી ગઈ હતી.
દિલ્હીના બજારમાં પણ સોનામાં મોટો ઘટાડો
બુલિયન માર્કેટમાં પણ સોનાના ભાવમાં નોંધપાત્ર ઘટાડો થયો છે. ગુરુવારે 24 કેરેટ સોનું ₹1,65,700 પ્રતિ 10 ગ્રામ હતું, જે શુક્રવારે ₹3,300 ઘટીને ₹1,62,400 પર પહોંચી ગયું હતું. આ સાથે માત્ર ત્રણ દિવસમાં સોનાના ભાવમાં કુલ ₹4,700નો ઘટાડો નોંધાયો છે. એટલે કે ટૂંકા ગાળામાં સોનામાં લગભગ 3%નું કરેક્શન જોવા મળ્યું છે. ચાંદીમાં પણ વેચવાલી જોવા મળી હતી. અગાઉના સત્રમાં ₹2,50,500 પ્રતિ કિલો રહેલી ચાંદી ₹5,000 ઘટીને ₹2,45,500 પ્રતિ કિલો પર આવી ગઈ હતી.
આંતરરાષ્ટ્રીય બજારમાં સોના-ચાંદીમાં પણ કડાકો
ભારતીય બજારની સાથે વૈશ્વિક બુલિયન માર્કેટમાં પણ ભારે ઘટાડો નોંધાયો હતો.
સોનું: 3.43% ઘટીને $4,504.10 પ્રતિ ઔંસ
ચાંદી: 4.57% ઘટીને $66.255 પ્રતિ ઔંસ
વૈશ્વિક બજારમાં ડોલરની મજબૂતી અને અમેરિકી વ્યાજદર અંગેની અપેક્ષાઓને કારણે રોકાણકારોએ કિંમતી ધાતુઓમાં નફો બુક કર્યો હોવાનું માનવામાં આવે છે.
ફેડના વ્યાજદર સંકેતથી કેમ ગભરાયું બજાર?
સોના-ચાંદીમાં અચાનક આવેલી વેચવાલી પાછળ અમેરિકી ફેડરલ રિઝર્વના વ્યાજદર અંગેના સંકેતોને મહત્વનું કારણ માનવામાં આવી રહ્યું છે. બજારમાં એવી ચર્ચા છે કે અમેરિકામાં વ્યાજદર અંગેનું વલણ કડક બની શકે છે. સામાન્ય રીતે વ્યાજદર વધવાની શક્યતા હોય ત્યારે રોકાણકારો બોન્ડ અને અન્ય વ્યાજ આપતી સંપત્તિઓ તરફ વળી શકે છે. તેની અસર સોના જેવી નોન-યીલ્ડિંગ એસેટ્સની માંગ પર પડી શકે છે.
આગળ સોના-ચાંદીના ભાવનું શું થશે?
હાલનો ઘટાડો રોકાણકારોની પ્રોફિટ બુકિંગ, ડોલરની ચાલ અને અમેરિકી વ્યાજદર અંગેની અપેક્ષાઓ સાથે જોડાયેલો છે. આગામી દિવસોમાં ફેડના નિર્ણયો, અમેરિકાના આર્થિક ડેટા, બોન્ડ યીલ્ડ અને વૈશ્વિક ભૂ-રાજકીય સ્થિતિ સોના-ચાંદીની દિશા નક્કી કરવામાં મહત્વની ભૂમિકા ભજવી શકે છે. સોના અને ચાંદીના ભાવ બજાર દરમિયાન સતત બદલાતા રહે છે. ઉપરોક્ત આંકડા આપેલા બજાર ડેટા પર આધારિત છે.
