Gold rate drops: સોમવારે સોના અને ચાંદીના બજારમાં ભારે અસ્થિરતા જોવા મળી હતી. વૈશ્વિક બજારમાં ચાલતા ઉતાર-ચઢાવ અને વધતા ભૂ-રાજકીય તણાવના કારણે ભારતીય કોમોડિટી માર્કેટમાં કિંમતી ધાતુઓના વાયદા ભાવમાં નોંધપાત્ર ઘટાડો નોંધાયો છે. ટ્રેડિંગના પ્રારંભિક કલાકોમાં જ સોનાના ભાવમાં 1 ટકા કરતાં વધુનો ઘટાડો નોંધાયો હતો. નિષ્ણાતોના મત અનુસાર, અમેરિકામાં વ્યાજ દર ઘટાડવાની સંભાવનાઓ ઓછી થવા અને વૈશ્વિક સ્તરે વધતા તણાવને કારણે રોકાણકારો સાવચેતીપૂર્વક વલણ અપનાવી રહ્યા છે. વિશેષ કરીને અમેરિકા અને ઈરાન વચ્ચે વધતા સંઘર્ષને કારણે વૈશ્વિક અર્થતંત્રમાં ફુગાવો વધવાની શક્યતા વ્યક્ત થઈ રહી છે. આ પરિસ્થિતિથી આર્થિક વૃદ્ધિ ધીમી પડવાની ભીતિ ઉભી થઈ છે, જેના પરિણામે રોકાણકારોમાં અનિશ્ચિતતા વધી છે અને કિંમતી ધાતુઓના ભાવ પર તેની અસર જોવા મળી રહી છે.
MCX પર સોનામાં ₹1800નો ઘટાડો
ભારતમાં કોમોડિટી ટ્રેડિંગ માટેનું મુખ્ય પ્લેટફોર્મ મલ્ટી કોમોડિટી એક્સચેન્જ ઓફ ઇન્ડિયા (MCX) પર એપ્રિલ ડિલિવરીવાળા સોનાના વાયદા ભાવમાં ભારે ઘટાડો નોંધાયો હતો. સોનાની કિંમત લગભગ ₹1800 ઘટીને ₹1,56,655 પ્રતિ 10 ગ્રામ સુધી પહોંચી ગઈ. બીજી તરફ ચાંદીના ભાવમાં પણ નોંધપાત્ર ગાબડું આવ્યું હતું. મે ડિલિવરીવાળી ચાંદીના વાયદા ભાવમાં ₹4300થી વધુનો ઘટાડો થઈ ₹2,55,101 પ્રતિ કિલો સુધી પહોંચ્યા. આંતરરાષ્ટ્રીય બજારમાં પણ કિંમતી ધાતુઓ પર દબાણ જોવા મળી રહ્યું છે. વૈશ્વિક બજારમાં સોનાના સ્પોટ ભાવમાં ઘટાડો નોંધાયો છે. સિંગાપુરના માર્કેટમાં સ્પોટ ગોલ્ડ આશરે 0.7 ટકા ઘટીને 5,000 ડૉલરના સ્તરથી નીચે સરક્યું હોવાનું નોંધાયું છે. વૈશ્વિક સ્તરે રોકાણકારો સુરક્ષિત રોકાણના વિકલ્પો પર ફરી વિચાર કરી રહ્યા છે, જેના કારણે બજારમાં અસ્થિરતા વધતી જોવા મળી રહી છે.
ક્રૂડ ઓઇલના ભાવમાં ઉછાળો
મિડલ ઈસ્ટમાં વધતા તણાવને કારણે ઓઇલ ઇન્ફ્રાસ્ટ્રક્ચરને નિશાન બનાવવામાં આવતા ક્રૂડ ઓઇલના ભાવમાં તેજી આવી છે. ક્રૂડ ઓઇલના વધતા ભાવોનો સીધો પ્રભાવ વૈશ્વિક કોમોડિટી માર્કેટ પર પડે છે, જેના કારણે સોના અને ચાંદીના ભાવમાં પણ ઉથલ-પાથલ જોવા મળી રહી છે.
સરકારના નિર્ણયથી મળી શકે રાહત
આ વચ્ચે ભારત સરકારે એક મહત્વપૂર્ણ નિર્ણય લીધો છે જે જ્વેલર્સ અને ગ્રાહકો માટે થોડી રાહત લાવી શકે છે. કેન્દ્ર સરકારે સોનાની ઈમ્પોર્ટ માટે નક્કી કરવામાં આવેલી આધાર કિંમતમાં ઘટાડો કર્યો છે. અગાઉ 1664 ડૉલર પ્રતિ 10 ગ્રામ રાખવામાં આવેલી આયાત આધાર કિંમત હવે ઘટાડીને 1652 ડૉલર પ્રતિ 10 ગ્રામ કરવામાં આવી છે. આ પગલાથી સોનાના ઈમ્પોર્ટ્સના ખર્ચમાં ઘટાડો થશે, જેનો લાભ સ્થાનિક બજારમાં સોનાના ભાવમાં ઘટાડા રૂપે ગ્રાહકોને મળી શકે છે. બીજી તરફ ચાંદીની ઈમ્પોર્ટ કિંમતમાં પ્રતિ કિલો 20 ડૉલરનો વધારો કરવામાં આવ્યો છે. તેના કારણે ભવિષ્યમાં ચાંદીના સ્થાનિક ભાવ પર થોડો વધારો જોવા મળી શકે છે. વૈશ્વિક આર્થિક પરિસ્થિતિ, ભૂ-રાજકીય તણાવ અને ક્રૂડ ઓઇલના ભાવોમાં થતા ફેરફારોને કારણે આગામી દિવસોમાં સોના અને ચાંદીના બજારમાં અસ્થિરતા યથાવત રહેવાની સંભાવના વ્યક્ત કરવામાં આવી રહી છે. રોકાણકારો માટે બજારના આવા ઉતાર-ચઢાવ વચ્ચે સાવચેત રહેવું જરૂરી હોવાનું નિષ્ણાતો સૂચવે છે.
