Diwali Dry Fruit Price Hike 2026:દિવાળીનો તહેવાર નજીક આવી રહ્યો છે ત્યારે દેશભરના બજારોમાં મોસમી ખરીદીનો માહોલ જામ્યો છે. ખાસ કરીને પ્રકાશના આ પર્વ પર એકબીજાને ભેટ આપવા માટે અને મીઠાઈઓ બનાવવા માટે ડ્રાયફ્રૂટ એટલે કે સૂકામેવાની માગ મોટા પ્રમાણમાં વધતી હોય છે. પરંતુ આ વર્ષે તહેવાર પહેલા જ ડ્રાયફ્રૂટ બજારમાં મોંઘવારીનો મોટો ઝટકો લાગ્યો છે, જેના કારણે ગ્રાહકોના ખિસ્સા પર વધારાનો બોજ પડવાની પૂરી શક્યતા છે.
પિસ્તા અને બદામના ભાવમાં નોંધપાત્ર ઉછાળો
બજારના વેપારી વર્ગના જણાવ્યા અનુસાર, આ વર્ષે વિવિધ સૂકામેવાના ભાવોમાં તોતિંગ વધારો જોવા મળ્યો છે. મુખ્યત્વે સૌથી વધુ વપરાશમાં લેવાતા પિસ્તા અને બદામના ભાવ ઊંચકાાયા છે. પિસ્તાના ભાવમાં અંદાજે 30 થી 40 ટકા સુધીનો મોટો વધારો થયો છે, જ્યારે બદામના ભાવમાં પણ 20 ટકા જેટલી વૃદ્ધિ નોંધાઈ છે. આ સિવાય અન્ય કેટલીક ડ્રાયફ્રૂટની આઈટમોના ભાવ પણ વધ્યા હોવાનું જાણવા મળ્યું છે.
ભાવ વધારા પાછળ વૈશ્વિક પરિબળો અને સપ્લાયની અછત જવાબદાર
આંતરરાષ્ટ્રીય સ્તરે બદલાયેલા સમીકરણો અને યુદ્ધ જેવી પરિસ્થિતિઓને કારણે આયાત પર અસર પડી છે. વૈશ્વિક બજારમાં પિસ્તા અને બદામના ઉત્પાદનમાં ઘટાડો થયો છે. આ ઉપરાંત, ઈરાન સંઘર્ષ અને અન્ય આંતરરાષ્ટ્રીય પરિબળોને લીધે વિદેશથી આવતી સપ્લાય ઘટી છે તેમજ દરિયાઈ તથા હવાઈ ભાડામાં પણ મોટો વધારો થયો છે. આ તમામ કારણોસર સ્થાનિક બજારમાં સૂકામેવા મોંઘા થઈને પહોંચી રહ્યા છે.
ડ્રાયફ્રૂટ ગિફ્ટ બોક્સના સમીકરણો બદલાશે
બદામ અને પિસ્તા મોંઘા થવાના કારણે આ વર્ષે દિવાળી પર એકબીજાને આપવાના થતાં ડ્રાયફ્રૂટ ગિફ્ટ બોક્સ કે હેમ્પરની બનાવટમાં પણ ફેરફાર જોવા મળશે. ગિફ્ટ પેકેટમાં મોંઘા પિસ્તા અને બદામનું પ્રમાણ ઘટાડીને તેની જગ્યાએ સરખામણીએ સ્થિર રહેલા કાજુ, કિસમિસ તેમજ મખાના અને ખજૂરનું પ્રમાણ વધુ રાખવામાં આવે તેવી પૂરી સંભાવના છે.
અન્ય સૂકામેવાના ભાવ સામાન્ય સ્તરે જળવાયા
એક રાહતના સમાચાર એ છે કે કાજુ, અખરોટ, કિસમિસ અને મખાના જેવા સૂકામેવાના ભાવ ગયા વર્ષની સરખામણીએ મોટાભાગે જળવાઈ રહ્યા છે અને તેમાં કોઈ વિશેષ તોતિંગ વધારો થયો નથી. એકંદરે આખી ડ્રાયફ્રૂટ બાસ્કેટના સરેરાશ ભાવમાં 10 થી 15 ટકા સુધીનો ઓલઓવર ઉછાળો જોવા મળી શકે છે, છતાં તહેવારનો ઉત્સાહ જાળવી રાખવા માટે ગ્રાહકો દ્વારા ખરીદી તો ઉત્સાહપૂર્વક કરવામાં આવી રહી છે.
