Copper Price News: અત્યાર સુધી રોકાણકારો સોના અને ચાંદીને સૌથી મહત્વની કિંમતી ધાતુઓમાં ગણતા આવ્યા છે, પરંતુ હવે કોપર એટલે કે તાંબું ‘નવું ગોલ્ડ’ બનીને ઉભરી રહ્યું છે. તાંબાની વૈશ્વિક માગમાં સતત વધારો અને સપ્લાયને લઈને વધતી ચિંતાઓ વચ્ચે તેની કિંમત રેકોર્ડ સ્તરે પહોંચી ગઈ છે. કોપરના ભાવમાં તેજીની અસર હવે તેની સાથે જોડાયેલી કંપનીઓના શેરમાં પણ જોવા મળી રહી છે.
LMEમાં કોપરના ભાવે બનાવ્યો નવો રેકોર્ડ
લંડન મેટલ એક્સચેન્જ (LME)માં ત્રણ મહિનાના બેન્ચમાર્ક કોપર વાયદાના ભાવમાં 0.9%નો વધારો થયો હતો અને તે આશરે 14,510 ડોલર પ્રતિ મેટ્રિક ટનના સ્તરે ટ્રેડ થઈ રહ્યો હતો. સોમવારે કોપરની કિંમત વધીને 14,533 ડોલર પ્રતિ ટનના લાઈફટાઈમ હાઈ પર પહોંચી ગઈ હતી. કોપરની આ તેજી માત્ર છેલ્લા કેટલાક દિવસોની ઘટના નથી. આ વર્ષે અત્યાર સુધીમાં તેની કિંમતમાં આશરે 16%નો વધારો નોંધાયો છે. ખાસ વાત એ છે કે કોપરનો વર્તમાન ભાવ અનેક બ્રોકરેજ હાઉસના અગાઉના અનુમાનો કરતાં પણ ઉપર પહોંચી ગયો છે.
બ્રોકરેજના અંદાજ કરતાં ઘણો ઉપર પહોંચ્યો ભાવ
કોપરના ભાવમાં આવેલા જોરદાર ઉછાળાએ બજારના અગાઉના અનુમાનોને પણ પાછળ છોડી દીધા છે. રિપોર્ટ્સ અનુસાર, ગોલ્ડમેન સૅક્સે 2026ના ચોથા ક્વાર્ટર માટે કોપરની કિંમત આશરે 11,200 ડોલર પ્રતિ ટન રહેવાનો અંદાજ લગાવ્યો હતો. તે જ રીતે ડ્યુશ બેન્કે એક વર્ષ માટે કોપરની સરેરાશ કિંમત આશરે 12,125 ડોલર પ્રતિ ટન રહેવાની અપેક્ષા વ્યક્ત કરી હતી. જોકે, વાસ્તવિક બજાર ભાવ આ સ્તરોથી ઘણો ઉપર પહોંચી ગયો છે.
કોપરના ભાવ કેમ વધી રહ્યા છે? જાણો 3 મોટા કારણો:
અમેરિકન ટેરિફની આશંકા
કોપરના ભાવમાં તેજીનું એક મોટું કારણ અમેરિકાની સંભવિત ટેરિફ નીતિ છે. અમેરિકી રાષ્ટ્રપતિ ડોનાલ્ડ ટ્રમ્પ દ્વારા રિફાઈન્ડ કોપરની આયાત પર ટેરિફ વધારવામાં આવે તેવી આશંકા વચ્ચે વેપારીઓ દ્વારા અમેરિકામાં મોટા પ્રમાણમાં કોપર મોકલવામાં આવી રહ્યું છે. 2026ના પ્રથમ છ મહિનામાં અમેરિકાએ આશરે 8.85 લાખ ટન કોપરની આયાત કરી હોવાનું જણાવાયું છે. તેના કારણે વૈશ્વિક કોપર સ્ટોકનો મોટો હિસ્સો અમેરિકામાં કેન્દ્રિત થયો છે, જ્યારે લંડન મેટલ એક્સચેન્જના નેટવર્કમાં ઉપલબ્ધ ભંડારમાં ઘટાડો જોવા મળ્યો છે.ખાણોમાં સપ્લાયની સમસ્યા
કોપરના બજારમાં લાંબા સમયથી સપ્લાય અને ડિમાન્ડ વચ્ચેનું અસંતુલન જોવા મળી રહ્યું છે. જૂની થઈ રહેલી મોટી ખાણો વધતી વૈશ્વિક માગ પ્રમાણે ઉત્પાદન વધારવામાં મુશ્કેલી અનુભવી રહી છે. બીજી તરફ, અનેક મોટા ઉત્પાદકો ઓપરેશનલ પડકારોનો સામનો કરી રહ્યા છે. ચિલી તેનું મોટું ઉદાહરણ છે. કોપરના ભાવમાં વધારો થયો હોવા છતાં ઓગસ્ટમાં ચિલીનું કોપર શિપમેન્ટ એક વર્ષથી વધુ સમયના નીચલા સ્તરે પહોંચી ગયું હોવાનું રિપોર્ટ્સમાં જણાવાયું છે.AI અને ડેટા સેન્ટરની વધતી માગ
આર્ટિફિશિયલ ઇન્ટેલિજન્સ (AI) ઇન્ફ્રાસ્ટ્રક્ચરના ઝડપી વિસ્તરણથી પણ કોપરની માગ વધી રહી છે. ડેટા સેન્ટરની વીજળી વ્યવસ્થા, નેટવર્કિંગ સાધનો અને અન્ય ઇલેક્ટ્રિકલ ઇન્ફ્રાસ્ટ્રક્ચરમાં કોપરનો મોટા પ્રમાણમાં ઉપયોગ થાય છે. આ ઉપરાંત, રિન્યુએબલ એનર્જી, વીજળીના ગ્રિડ અને બેટરી સ્ટોરેજમાં વૈશ્વિક સ્તરે વધી રહેલા રોકાણને કારણે પણ આગામી સમયમાં કોપરની માગ વધવાની અપેક્ષા છે.
કોપરના ભાવ વધ્યા તો શેરોમાં પણ તેજી
કોપરના ભાવમાં આવેલી તેજીની અસર કોપર અને મેટલ કંપનીઓના શેર પર પણ જોવા મળી રહી છે. મંગળવારે ભારતીય શેરબજારમાં એકંદરે ઘટાડાનો માહોલ હોવા છતાં હિન્દુસ્તાન કોપરનો શેર લગભગ 5% વધ્યો હતો. આ ઉપરાંત વેદાંતા અને હિન્ડાલ્કો ઇન્ડસ્ટ્રીઝના શેર પણ તેજી સાથે ગ્રીન ઝોનમાં ટ્રેડ કરી રહ્યા હતા. કોપરના ભાવમાં લાંબા સમય સુધી તેજી જળવાઈ રહે તો કોપરનું ઉત્પાદન, પ્રોસેસિંગ અને મેટલ બિઝનેસ સાથે જોડાયેલી કંપનીઓ માટે તે સકારાત્મક બની શકે છે.
કોપર કેમ બની રહ્યું છે 'નવું ગોલ્ડ'?
કોપર માત્ર એક ઔદ્યોગિક ધાતુ નથી રહ્યું. ઇલેક્ટ્રિક વાહનો, રિન્યુએબલ એનર્જી, પાવર ગ્રિડ, ડેટા સેન્ટર અને AI ઇન્ફ્રાસ્ટ્રક્ચર જેવા ભવિષ્યના ક્ષેત્રોમાં તેની જરૂરિયાત વધી રહી છે. બીજી તરફ નવી ખાણો શરૂ કરવા અને જૂની ખાણોમાં ઉત્પાદન વધારવામાં સમય લાગે છે. આ જ કારણોસર વધતી માગ સામે મર્યાદિત સપ્લાય કોપરના ભાવને લાંબા ગાળે ટેકો આપી શકે છે. જોકે, કોમોડિટી અને મેટલ કંપનીઓના શેરમાં રોકાણ કરતા પહેલાં વૈશ્વિક ભાવ, સપ્લાય, કરન્સી, ટેરિફ અને કંપનીના નાણાકીય પરિણામો જેવા પરિબળો ધ્યાનમાં લેવા જરૂરી છે.
