8th Pay Commission Updates: કેન્દ્રીય કર્મચારીઓ હાલમાં બે મોટા અપડેટની રાહ જોઈ રહ્યા છે. એક તરફ આઠમું પગાર પંચ ચર્ચામાં છે, તો બીજી તરફ જુલાઈ 2026 માટે મોંઘવારી ભથ્થામાં થનારા વધારા પર નજર છે. આ વર્ષે જાન્યુઆરીમાં સરકારે DAમાં 2 ટકાનો વધારો કરીને તેને 60 ટકા કર્યો હતો. હવે જુલાઈના બીજા વધારા અંગે વિવિધ અહેવાલોમાં 3થી 4 ટકાના વધારાનું અનુમાન વ્યક્ત કરવામાં આવી રહ્યું છે. જો DA 4 ટકા વધીને 64 ટકા થાય છે, તો કર્મચારીઓના પગારમાં નોંધપાત્ર વધારો થઈ શકે છે.
જાન્યુઆરીમાં 2% વધારો, હવે 64% DAની ચર્ચા
સરકાર વર્ષમાં બે વખત કેન્દ્રીય કર્મચારીઓના મોંઘવારી ભથ્થામાં ફેરફાર કરે છે. પ્રથમ વધારો જાન્યુઆરી અને બીજો જુલાઈથી લાગુ થાય છે. 2026ના પહેલા વધારામાં 58 ટકાના DAમાં 2 ટકાનો વધારો કરીને તેને 60 ટકા કરવામાં આવ્યો હતો, જે 1 જાન્યુઆરીથી લાગુ થયો હતો. હવે જુલાઈ 2026 માટે DAમાં વધુ વધારો થવાની અપેક્ષા છે અને જો 4 ટકાનો વધારો થાય તો તે 64 ટકા સુધી પહોંચી શકે છે.
3થી 4 ટકા સુધી વધી શકે છે DA
જુલાઈ-ડિસેમ્બર સમયગાળા માટે DAમાં થનારો વધારો ઔદ્યોગિક કામદારો માટેના અખિલ ભારતીય ગ્રાહક ભાવાંક (AICPI-IW)ના આધારે નક્કી કરવામાં આવે છે. સરકાર તરફથી જુલાઈના DA વધારા અંગે હજુ સત્તાવાર જાહેરાત કરવામાં આવી નથી. જોકે, ઉપલબ્ધ AICPI-IW આંકડાઓના આધારે DAમાં અંદાજે 3થી 4 ટકાનો વધારો થવાની શક્યતા વ્યક્ત કરવામાં આવી રહી છે.
64% DA થશે તો કેટલો વધશે પગાર?
જો DA 60 ટકાથી વધીને 64 ટકા થાય, તો બેઝિક પેના આધારે કર્મચારીઓને મળતા DAમાં વધારો થશે. ઉદાહરણ તરીકે, રૂ.18,000ના બેઝિક પે પર હાલ 60 ટકા પ્રમાણે રૂ.10,800 DA મળે છે, જે 64 ટકા પ્રમાણે રૂ.11,520 થઈ શકે છે. તેવી જ રીતે રૂ.25,500ના બેઝિક પે પર DA રૂ.15,300થી વધીને રૂ.16,320 થઈ શકે છે. રૂ.35,400ના બેઝિક પે પર DA રૂ.21,240થી વધીને રૂ.22,656 થઈ શકે છે, જ્યારે રૂ.44,000ના બેઝિક પે પર તે રૂ.26,940થી વધીને રૂ.28,736 થઈ શકે છે. એટલે DAમાં 4 ટકાનો વધારો થાય તો બેઝિક પે જેટલું વધારે હશે, તેટલી જ DAની રકમમાં વધુ વૃદ્ધિ જોવા મળશે.
આઠમા પગાર પંચ અંગે શું અપડેટ?
DA વધારા ઉપરાંત કેન્દ્રીય કર્મચારીઓની નજર આઠમા પગાર પંચ પર પણ છે. આયોગને લઈને પરામર્શની પ્રક્રિયા ચાલી રહી છે અને કર્મચારી સંગઠનો તરફથી અનેક માંગણીઓ કરવામાં આવી રહી છે. તેમાં ફિટમેન્ટ ફેક્ટરને 2.57થી વધારીને 3.83 કરવાની માંગ પણ સામેલ છે. જો આ માંગ સ્વીકારવામાં આવે તો નવા પગારના માળખામાં મોટો ફેરફાર થઈ શકે છે.
લઘુત્તમ બેઝિક સેલેરી કેટલી થઈ શકે?
નવા પગારની ગણતરીમાં ફિટમેન્ટ ફેક્ટર મહત્વની ભૂમિકા ભજવે છે. સામાન્ય રીતે વર્તમાન બેઝિક પેને ફિટમેન્ટ ફેક્ટરથી ગુણવાથી નવા બેઝિક પેની ગણતરી કરવામાં આવે છે. સાતમા પગાર પંચમાં 2.57ના ફિટમેન્ટ ફેક્ટર બાદ લઘુત્તમ બેઝિક સેલેરી રૂ.7,000થી વધીને રૂ.18,000 થઈ હતી. હવે જો આઠમા પગાર પંચમાં 3.833નો ફિટમેન્ટ ફેક્ટર લાગુ થાય, તો રૂ.18,000ના હાલના લઘુત્તમ બેઝિક પે પરથી ગણતરી આશરે રૂ.68,940 સુધી પહોંચી શકે છે. જોકે, આ માગ અને સંભવિત ગણતરી છે; સરકાર દ્વારા અંતિમ ફિટમેન્ટ ફેક્ટર અથવા નવો બેઝિક પે જાહેર કરવામાં આવ્યો નથી. આઠમા પગાર પંચની રચના 3 નવેમ્બર 2025ના રોજ કરવામાં આવી હતી અને તેને અહેવાલ રજૂ કરવા માટે 18 મહિનાનો સમય આપવામાં આવ્યો છે, જે મે 2027માં પૂર્ણ થવાનો છે.
