Rising Inflation in Gujarat: વર્તમાન સમયમાં દૈનિક જીવનજરૂરી ચીજવસ્તુઓની કિંમતોમાં અસાધારણ અને સતત વધારો થતાં સામાન્ય તથા મધ્યમ વર્ગના પરિવારો માટે ઘર ચલાવવું અત્યંત મુશ્કેલ બની ગયું છે. એક તરફ લોકોની આવક મર્યાદિત રહી છે અથવા તો સ્થિર છે, ત્યારે બીજી તરફ મોંઘવારી રાક્ષસી રૂપ ધારણ કરીને સામાન્ય માણસના ખિસ્સા પર સીધો પ્રહાર કરી રહી છે. સંગ્રહખોરો અને નફાખોરી કરતા વચેટિયાઓ પર કોઈ મજબૂત અંકુશ ન હોવાને કારણે બજારમાં અરાજકતા જેવો માહોલ સર્જાયો છે. આ સમગ્ર પરિસ્થિતિ વચ્ચે વહીવટી તંત્રનું મૌન સામાન્ય જનતાની ચિંતામાં સતત વધારો કરી રહ્યું છે.
ખાંડ, દાળ અને લોટના ભાવ આસમાને
વર્ષ 2013ના આંકડાઓ સાથે સરખામણી કરીએ તો નિત્ય વપરાશની વસ્તુઓના ભાવમાં આંખો પહોળી થઈ જાય તેવો તોતિંગ ઉછાળો આવ્યો છે. દાયકા પહેલાં આશરે રૂ. 37પ્રતિ કિલો મળતી ખાંડ આજે વધીને રૂ.84 સુધી પહોંચી ગઈ છે, જેમાં 127 ટકાનો સીધો વધારો નોંધાયો છે. એ જ રીતે, ગરીબ અને મધ્યમ વર્ગના પ્રોટીનનો મુખ્ય સ્ત્રોત ગણાતી દાળોમાં પણ ભારે ભાવવધારો થયો છે; તુવેર દાળ રૂ. 74 થી વધીને રૂ. 160, અડદ દાળ રૂ. 71 થી વધીને રૂ. 160 અને ચણા દાળ રૂ.50 થી વધીને રૂ. 125 પ્રતિ કિલોના સ્તરે પહોંચી ગઈ છે. આ સિવાય ઘઉંનો લોટ રૂ. 21 થી રૂ. 69 અને ચોખા રૂ. 29 થી રૂ. 71 પ્રતિ કિલો વેચાઈ રહ્યા છે.
તેલ, દૂધ અને મસાલામાં ભડકો
રસોડાના મુખ્ય પાયારૂપ ગણાતા ખાદ્યતેલ અને દૂધના ભાવે પણ તમામ રેકોર્ડ તોડી નાખ્યા છે. સરસિયાનું તેલ પ્રતિ કિલો રૂ. 102 થી વધીને રૂ. 263 અને સિંગતેલ રૂ. 164 થી વધીને રૂ. 286 થઈ ગયું છે. બાળકો અને પરિવારના સ્વાસ્થ્ય માટે જરૂરી એવા દૂધનો ભાવ પણ રૂ. 36 પ્રતિ લિટરથી વધીને રૂ.85 સુધી પહોંચી ગયો છે, એટલે કે દૂધમાં 136 ટકાનો ધરખમ વધારો ઝીંકાયો છે. આ ઉપરાંત શાકભાજીમાં સ્વાદ ઉમેરતા મસાલાઓ જેવા કે જાયફળ, જીરું, લાલ મરચું અને હળદરના ભાવમાં પ્રતિ કિલોએ રૂ. 150 થી લઈને રૂ. 800 સુધીનો મોટો ઉછાળો આવ્યો છે. સામાન્ય શાકભાજીમાં વપરાતી ડુંગળી પણ મે 2013ના રૂ. 23ની સરખામણીએ આજે રૂ. 84 પ્રતિ કિલો વેચાઈ રહી છે, જે 217 ટકાનો ભાવવધારો દર્શાવે છે.
ખેડૂતો વંચિત અને વચેટિયાઓ માલામાલ
બજારમાં ગ્રાહકો પાસેથી ઉંચા ભાવ વસૂલવામાં આવી રહ્યા છે, પરંતુ દુઃખની વાત એ છે કે આ વધારાનો કોઈ આર્થિક લાભ મૂળ ઉત્પાદક એવા ખેડૂતો સુધી પહોંચતો નથી. પાયાનો ખેડૂત આજે પણ પોતાના પાકના યોગ્ય વળતર માટે સંઘર્ષ કરી રહ્યો છે, જ્યારે વચેટિયાઓ અને કાળાબજારિયાઓ વચ્ચેનો મોટો નફો સબડાવી રહ્યા છે. આ સાથે પેટ્રોલ, ડીઝલ, સીએનજી અને પીએનજી જેવા ઇંધણોના ભાવમાં સતત થતા વધારાને કારણે ટ્રાન્સપોર્ટેશનનો ખર્ચ ખૂબ વધી ગયો છે. ટ્રાન્સપોર્ટ ખર્ચ વધતાની સાથે જ દરેક વસ્તુની અંતિમ કિંમત વધી જાય છે, જેનો આખરી બોજ ગ્રાહક પર જ પડે છે.
રાંધણ ગેસનો ડામ અને જનતાની કડક કાનૂની કારવાઈની માંગ
ઇંધણના ભાવવધારા સાથે રાંધણ ગેસ સિલિન્ડરની કિંમતો પણ હવે આમ આદમીની પહોંચ બહાર જઈ રહી છે. સામાન્ય માણસ રોજીંદી જરૂરિયાતો પૂરી કરવામાં જ પીસાઈ રહ્યો છે, ત્યારે પ્રજામાં ભારે રોષ જોવા મળી રહ્યો છે. લોકમાંગ ઉઠી રહી છે કે સરકાર હવે મૌન તોડે અને સંગ્રહખોરી, કાળાબજારી તેમજ કૃત્રિમ અછત ઊભી કરતા તત્વો સામે તાત્કાલિક ધોરણે કડક કાનૂની પગલાં ભરે. જો બજાર પર યોગ્ય અંકુશ લાવવામાં નહીં આવે તો આવનારા દિવસોમાં સામાન્ય પરિવારો માટે જીવવું વધુ દુષ્કર બની જશે.
