LPG e-KYC અંગે મોટા સમાચાર: 5 મિનિટનું આ કામ નહીં કરો તો મોંઘા ભાવે ખરીદવો પડશે ગેસ સિલિન્ડર

LPG e-KYC Deadline Alert: ઘરેલુ ગેસ ગ્રાહકો માટે એક અત્યંત મહત્વપૂર્ણ અને જરૂરી સમાચાર સામે આવ્યા છે. Indane, Bharat Gas અને HP Gas ના લાખો ગ્રાહકો માટે LPG e-KYC પૂર્ણ કરવાની અંતિમ તારીખ 31 ઓગસ્ટ હતી. જો તમે હજુ સુધી તમારું e-KYC વેરિફિકેશન પૂરું નથી કર્યું, તો આવનારા દિવસોમાં રસોઈ ગેસ મેળવવામાં ભારે મુશ્કેલી પડી શકે છે અને તેનું સીધું નુકસાન તમારા ખિસ્સા પર પડશે.

ઘરેલુ રેટ પર સિલિન્ડર મેળવવામાં પડશે મુશ્કેલી
ઓઈલ અને ગેસ કંપનીઓએ સ્પષ્ટતા કરી છે કે e-KYC ન કરાવવાથી ગ્રાહકનું ગેસ કનેક્શન તાત્કાલિક રદ તો નહીં થાય, પરંતુ વેરિફિકેશન પૂરું ન થાય ત્યાં સુધી ગ્રાહક ઘરેલુ સબસિડી વાળા દર પર સિલિન્ડર મેળવવા માટે અયોગ્ય ઠરી શકે છે. કંપનીઓએ આ પ્રક્રિયા પૂર્ણ કરવા માટે અગાઉ બે વાર ડેડલાઈન લંબાવી હતી. આમ છતાં જે લોકો e-KYC કરવાનું ચૂકી ગયા છે, તેમણે હવે ઘરેલુ ભાવને બદલે કોમર્શિયલ દર ચૂકવવા પડી શકે છે.

રસોડાનું બજેટ ખોરવાઈ જવાની ભીતિ
ઘરેલુ અને કોમર્શિયલ સિલિન્ડરના ભાવ વચ્ચે મોટો તફાવત હોવાથી સામાન્ય નાગરિકોના રસોડાનું બજેટ બગડી શકે છે. હાલમાં 14.2 કિલોગ્રામના ઘરેલુ LPG સિલિન્ડરની કિંમત દિલ્હીમાં ₹942, મુંબઈમાં ₹941.50, કોલકાતામાં ₹968 અને ચેન્નાઈમાં ₹957.50 ની આસપાસ છે. તેની સરખામણીએ 19 કિલો વાળા કોમર્શિયલ સિલિન્ડરની કિંમત ₹2,600 થી ₹2,900 સુધી પહોંચી જાય છે. જો ઘરેલુ દરની પાત્રતા રદ થાય તો ગ્રાહકોને સિલિન્ડર દીઠ મોટો આર્થિક ફટકો પડી શકે છે.

તમે ઘરે બેઠા 5 મિનિટમાં જ e-KYC પ્રક્રિયા પૂર્ણ કરી શકો છો.

e-KYC કરવા માટે જરૂરી દસ્તાવેજ:

• આધાર કાર્ડ

• LPG કનેક્શન સાથે રજિસ્ટર્ડ હોય તેવો મોબાઈલ નંબર

• 17 અંકનો LPG ID / કન્ઝ્યૂમર નંબર

• મોબાઈલમાં ઇન્સ્ટોલ કરેલી UIDAI ની FaceRD એપ

તબક્કાવાર e-KYC કરવાની પ્રક્રિયા:

1. એપ ડાઉનલોડ કરો: તમારી ગેસ કંપની મુજબ નીચે આપેલી સત્તાવાર એપ પોતાના સ્માર્ટફોનમાં ડાઉનલોડ કરો:

   Indane Gas: 'IndianOil One' એપ

   Bharat Gas: 'Hello BPCL' એપ

   HP Gas: 'HP Pay' એપ

2. લોગ-ઈન કરો: ગેસ કનેક્શન સાથે લિંક થયેલા રજિસ્ટર્ડ મોબાઈલ નંબરથી એપમાં લોગ-ઈન અથવા સાઈન-અપ કરો.

3. LPG પ્રોફાઈલ અને e-KYC પસંદ કરો: તમારા એકાઉન્ટમાં LPG પ્રોફાઈલ ઓપન કરી તમારો LPG ID લિંક કરો અને 'e-KYC' અથવા 'Aadhaar Authentication' નો વિકલ્પ પસંદ કરો.

4. ઓથેન્ટિકેશન શરતો સ્વીકારો: સ્ક્રીન પર આવતી આધાર ઓથેન્ટિકેશન સંમતિ (Consent) સ્વીકારો.

5. ફેસ સ્કેન (Face RD) કરો: કેમેરા ઓપન થશે, જ્યાં 'FaceRD' એપની મદદથી તમારો ચહેરો યોગ્ય પ્રકાશમાં સ્કેન કરીને વેરિફાઈ કરો.

6. સબમિટ અને સ્ટેટસ: વેરિફિકેશન પૂર્ણ થયા બાદ રિક્વેસ્ટ સબમિટ કરી દો. થોડી વારમાં તમારું e-KYC સ્ટેટસ અપડેટ થઈ જશે.

જેમણે વેરિફિકેશન કરાવ્યું છે તેમને રાહત
ઓઈલ મંત્રાલયે સ્પષ્ટ કર્યું છે કે જે ગ્રાહકોએ અગાઉથી જ પોતાનું e-KYC સફળતાપૂર્વક પૂર્ણ કરી લીધું છે, તેમણે આ પ્રક્રિયા ફરીથી કરવાની જરૂર નથી. જોકે, જેમનું કામ બાકી છે તેઓ પોતાના નજીકના LPG ડિસ્ટ્રિબ્યુટરની મુલાકાત લઈને અથવા ગેસ ડિલિવરી બોયની મદદથી પણ વેરિફિકેશન કરાવી શકે છે, જેથી ભવિષ્યમાં સિલિન્ડર મેળવવામાં કોઈ અડચણ ન આવે.