8th Pay Commission: કેન્દ્ર સરકારના કર્મચારીઓ અને પેન્શનરોમાં 8મા પગાર પંચને લઈને સતત ઉત્સુકતા જોવા મળી રહી છે. કર્મચારીઓમાં ખાસ કરીને પગારમાં કેટલો વધારો થશે અને હાથમાં આવતી ચોખ્ખી રકમ કેટલી વધશે તે અંગે ચર્ચા ચાલી રહી છે. જો પગાર પંચની ભલામણોના અમલીકરણમાં વિલંબ થાય તો કર્મચારીઓને લાખો રૂપિયાનું એરિયર્સ એકસાથે મળી શકે છે. કેટલાક અહેવાલોમાં આ રકમ ₹17 લાખ સુધી પહોંચવાની શક્યતા દર્શાવવામાં આવી છે. જોકે, વાસ્તવિક એરિયર્સની રકમ અંતિમ ફિટમેન્ટ ફેક્ટર અને અમલીકરણની તારીખ પર નિર્ભર રહેશે.
8મું પગાર પંચ ક્યારે લાગુ થશે?
સામાન્ય રીતે 8મા પગાર પંચનો અમલ 1 જાન્યુઆરી, 2026થી થવાની અપેક્ષા છે. જોકે, પગાર પંચને પોતાનો અહેવાલ તૈયાર કરવામાં અને સરકાર દ્વારા ભલામણો લાગુ કરવામાં 18થી 24 મહિના જેટલો સમય લાગી શકે છે. જો અહેવાલ 2027ના મધ્યમાં આવે અને ત્યારબાદ અમલ થાય, તો 1 જાન્યુઆરી, 2026થી વાસ્તવિક અમલીકરણની તારીખ વચ્ચેના સમયગાળાનો વધારાનો પગાર એરિયર્સ તરીકે મળી શકે છે. આ ગણતરીમાં ફિટમેન્ટ ફેક્ટર મહત્વની ભૂમિકા ભજવશે. ફિટમેન્ટ ફેક્ટર જેટલું વધારે હશે, મૂળ પગારમાં વધારો અને સંભવિત એરિયર્સની રકમ પણ એટલી વધારે થઈ શકે છે.
લેવલ 6 અને 7ના કર્મચારીઓને કેટલું એરિયર્સ?
લેવલ 6ના કર્મચારીઓનો વર્તમાન મૂળ પગાર ₹35,400 છે. 2.15ના ફિટમેન્ટ ફેક્ટર મુજબ 20 મહિનાના વિલંબ માટે એરિયર્સ આશરે ₹8.14 લાખ અને 24 મહિના માટે લગભગ ₹9.77 લાખ થઈ શકે છે. જ્યારે 2.57ના ફિટમેન્ટ ફેક્ટર પર 20 મહિનાનું એરિયર્સ ₹11.12 લાખ અને 24 મહિનાના વિલંબમાં આશરે ₹13.34 લાખ થઈ શકે છે. લેવલ 7ના કર્મચારીઓનો મૂળ પગાર ₹44,900 છે. 2.15ના ફિટમેન્ટ ફેક્ટર પર 20 મહિનાનું એરિયર્સ આશરે ₹10.33 લાખ અને 24 મહિનાનું ₹12.39 લાખ થઈ શકે છે. 2.57ના ફિટમેન્ટ ફેક્ટર પર 24 મહિનાના વિલંબમાં આ રકમ વધીને આશરે ₹16.92 લાખ, એટલે કે લગભગ ₹17 લાખ થઈ શકે છે.
લેવલ 8 અને અન્ય ભથ્થાંની ગણતરી
લેવલ 8ના કર્મચારીઓનો વર્તમાન મૂળ પગાર ₹47,600 છે. 2.15ના ફિટમેન્ટ ફેક્ટર મુજબ 20 મહિનાનું એરિયર્સ આશરે ₹10.95 લાખ અને 24 મહિનાનું એરિયર્સ લગભગ ₹13.14 લાખ થઈ શકે છે. જોકે, આ તમામ આંકડા મૂળ પગારમાં સંભવિત વધારાને આધારે કરવામાં આવેલી ગણતરી છે. HRA મૂળ પગાર સાથે જોડાયેલું હોવાથી નવા પગાર માળખા બાદ તેમાં પણ ફેરફાર થઈ શકે છે. બીજી તરફ મોંઘવારી ભથ્થું અને પરિવહન ભથ્થાની ગણતરી અલગ નિયમો મુજબ થાય છે. તેથી દરેક ભથ્થાનું એરિયર્સ પણ આ જ સૂત્રથી નક્કી થશે એવું માનવું યોગ્ય નથી. અંતિમ રકમ માટે 8મા પગાર પંચનો ફિટમેન્ટ ફેક્ટર અને સરકારની સત્તાવાર જાહેરાત મહત્વની રહેશે.
