8th Pay Commission: કેન્દ્રીય કર્મચારીઓ અને પેન્શનરો માટે આગામી દિવસોમાં મોટી ખુશખબર આવી શકે છે. લેબર બ્યુરો દ્વારા જાહેર કરવામાં આવેલા તાજેતરના AICPI-IW (ઔદ્યોગિક કામદારો માટે ઓલ ઈન્ડિયા કન્ઝ્યુમર પ્રાઇસ ઇન્ડેક્સ)ના જુલાઈ મહિનાના આંકડા અનુસાર મોંઘવારી ભથ્થામાં નોંધપાત્ર ઉછાળો જોવા મળી રહ્યો છે. જુલાઈ દરમિયાન આ ઇન્ડેક્સમાં 1.3 ટકાનો વધારો નોંધાયો છે, જેના આધારે છેલ્લા 12 મહિનાની સરેરાશ ગણતરી કરતા ફુગાવાનો દર 64.38 ટકા સુધી પહોંચી ગયો છે. આ ગણતરી દર્શાવે છે કે સરકાર આગામી સમયમાં મોંઘવારી ભથ્થું વધારીને 64 ટકા સુધી કરી શકે છે.
ક્યારે થશે મોંઘવારી ભથ્થામાં વધારાની અધિકૃત જાહેરાત?
હાલમાં કેન્દ્રીય કર્મચારીઓને 60 ટકા લેખે મોંઘવારી ભથ્થું મળી રહ્યું છે. સામાન્ય રીતે કેન્દ્ર સરકાર વર્ષમાં બે વાર (જાન્યુઆરી અને જુલાઈ) મોંઘવારી ભથ્થામાં સુધારો કરતી હોય છે. જોકે, જુલાઈ મહિના માટેના વધારા અંગે સરકારે હજુ સુધી કોઈ સત્તાવાર જાહેરાત કરી નથી. નિષ્ણાતોના મતે, આ જાહેરાત દર વર્ષની જેમ સપ્ટેમ્બરથી નવેમ્બરની વચ્ચે એટલે કે ઓક્ટોબર મહિનામાં ઉત્સવોની સીઝન દરમિયાન થવાની પ્રબળ શક્યતા છે.
કેવી રીતે થાય છે મોંઘવારી ભથ્થાની ગણતરી?
કેન્દ્રીય કર્મચારીઓના મોંઘવારી ભથ્થાની ગણતરી લેબર બ્યુરો દ્વારા જાહેર કરવામાં આવતા AICPI-IW ઇન્ડેક્સના 12 મહિનાના સરેરાશ આંકડાના આધારે થાય છે. હાલમાં આ ગણતરી વર્ષ 2016 ને 'બેઝ યર' માનીને ફોર્મ્યુલા મુજબ કરવામાં આવે છે. જુલાઈ માટે ફુગાવાનો દર 153.2 નોંધાયો હતો, જેના કારણે ભથ્થું 64 ટકા સુધી પહોંચવાની સ્પષ્ટ શક્યતા દેખાઈ રહી છે.
લેવલ-1 થી લેવલ-7 સુધીના કર્મચારીઓના માસિક પગારમાં કેટલો ઉમેરો થશે?
જો મોંઘવારી ભથ્થું 60 ટકાથી વધીને 64 ટકા થાય છે, તો દરેક સ્તરના કર્મચારીઓના ટેક-હોમ સેલેરીમાં સારો એવો વધારો થશે:
લેવલ-1: જે કર્મચારીઓનો મૂળ પગાર (Basic Pay) ₹18,000 છે, તેમને 60% મુજબ ₹10,800 DA મળતું હતું, જે 64% થતાં ₹11,520 થશે. એટલે કે દર મહિને ₹૭૨૦ નો સીધો વધારો થશે.
લેવલ-5: આ લેવલના કર્મચારીઓના માસિક પગારમાં આશરે ₹1,168નો વધારો જોવા મળશે.
લેવલ-6: લેવલ-6 માં આવતા કર્મચારીઓને દર મહિને ₹1,400થી વધુ નો ફાયદો થશે.
લેવલ-7: ₹44,900નો મૂળ પગાર ધરાવતા લેવલ-7 ના કર્મચારીઓના માસિક પગારમાં ₹1,796નો વધારો થશે.
પેન્શનરોને પણ મળશે મોંઘવારી રાહતનો લાભ
કેન્દ્ર સરકાર કર્મચારીઓ માટે મોંઘવારી ભથ્થું (DA) અને નિવૃત્ત કર્મચારીઓ માટે મોંઘવારી રાહત (DR) સમાન દરે જાહેર કરતી હોય છે. તેથી આ નિર્ણયથી લાખો સરકારી કર્મચારીઓની સાથે સાથે દેશના લાખો પેન્શનરોની માસિક પેન્શન રકમમાં પણ વધારો થશે. ઓક્ટોબર મહિનામાં સરકાર તરફથી સત્તાવાર મંજૂરી મળતાં જ કર્મચારીઓ અને પેન્શનરોના ખાતામાં વધેલી રકમ આવવાની શરૂ થઈ જશે.
