કરમસદ પરીક્ષા કેન્દ્રમાં માસ કોપી કેસનો બનાવ : ધો. 12ની પરીક્ષા મામલે ૫૦ થી વધુનો સ્ટાફ સસ્પેન્ડ..
![top-news](https://www.gujaratvandan.com/public/uploads/images/newsimages/GujaratVandan13032024_072509_WhatsApp Image 2024-03-13 at 12.54.39 PM.jpeg)
- 13 Mar, 2024
લોહ પુરુષ સરદાર પટેલની કર્મભૂમિ કરમસદની શાળામાં માસ કોપી કેસની ઘટના પ્રકાશમાં આવતા જિલ્લા શિક્ષણાધિકારી તરત એક્શનમાં આવી ગયા અને તમણે કેન્દ્રના 50 લોકોના સ્ટાફને સસ્પેન્ડ કરી દીધા છે. ઉપરાંત આજના પેપર માટે નવા સ્ટાફની વ્યવસ્થા કરીને પરીક્ષા શરૂ કરી દેવામાં આવી છે.હાલ રાજ્યમાં ધોરણ ૧૦-૧૨ની ગુજરાત બોર્ડની પરીક્ષા ચાલી રહી છે. એવામાં આણંદની કરમસદ પરીક્ષા કેન્દ્રમાં ધોરણ 12ની પરીક્ષા દરમિયાન માસ કોપી કેસની ઘટના સામે આવી છે.
બનાવની વિગત મુજબ આણંદના કરમસદના સરદાર પટેલ વિદ્યામંદિર સેન્ટરમાં જ જિલ્લા શિક્ષણાધિકારીની મુલાકાત દરમિયાન બારીમાંથી કોઈ વ્યક્તિ વિદ્યાર્થીને લખાવી રહ્યાનું હોવાનુ સામે આવ્યું હતું. જે બાદ શિક્ષણ અધિકારીને જોઈ અજાણ્યો યુવક ભાગી જતા જિલ્લા શિક્ષણ અધિકારીએ શાળાના 50 લોકોના સ્ટાફને સામૂહિક સસ્પેન્ડ કરીને કડક પગલા લીધા હતા.આ ગંભીર ઘટના અંગે શિક્ષણ મંત્રી પ્રફુલ પાંનસેરિયાએ જણાવ્યુ હતુ કે, “ગુજરાતભરમાં 15 લાખ વિદ્યાર્થીઓ શાંતિથી પરીક્ષા આપી રહ્યા છે. ત્યારે આ કેન્દ્ર પર કોની ક્ષતિને કારણે આ બધું થયું તે અંગેની તમામ તપાસ સાંજ સુધી પુરી કરવામાં આવશે.”
તેમણે વધુમાં જણાવ્યુ કે, “આપણા 15 લાખ વિદ્યાર્થીઓ અને તેમના માતાપિતાએ પરીક્ષા માટે તનતોડ મહેનત કરી હોય. ત્યારે આવી કોઇ એકાદ ઘટના અન્ય વિદ્યાર્થી પર કોઇ અસર ન છોડે તે પણ જોવાનું હોય છે. એકપણ વિદ્યાર્થીને અન્યાય ન થાય અને જે પણ દોષિત હશે તેની સામે એક્શન લેવામાં આવશે.”આ સાથે તેમણે વધુમાં જણાવ્યુ કે, “આ ઘટનાના સીસીટીવી ફૂટેજ મંગાવ્યા છે. જેના કારણે આ ઘટનામાં કોઇને અન્યાય નહીં થાય અને જેને કર્યુ છે તે છૂટે નહીં તેવી કાર્યવાહી કરવામાં આવશે.”
ગુજરાત વંદનના whatsapp ચેનલમાં જોડાવા આ લિંક પર ક્લિક કરોઃ
ગુજરાત વંદનના whatsapp ગ્રુપમાં જોડાવા આ લિંક પર ક્લિક કરોઃ