ગુજરાત વંદન

શરણાર્થિઓને CAA અંતર્ગત ભારતીય નાગરિકતા અપાઈ: 300 લોકોને મળી નાગરિકતા, ગૃહ મંત્રાલયે 14 શરણાર્થિઓને દિલ્હીમાં બોલાવી સર્ટિફિકેટ આપ્યા

15 May, 2024

ભારતમાં નાગરિકતા સંશોધન કાયદા(CAA)ની શરૂઆત પછી પ્રથમ વખત 300 જેટલા શરણાર્થિઓને ભારતીય નાગરિકતા આપવામાં આવી છે. 14 જેટલા આવા લોકોને ગૃહમંત્રાલયે સર્ટિફિકેટ ઈસ્યુ કર્યું છે. ઉલ્લેખનીય છે કે આ શરણાર્થિઓ ઘણા વર્ષોથી ભારતની નાગરિકતા માટે વલખા મારતા હતા. ગૃહ મંત્રાલયે આ 14 શરણાર્થિઓને દેશની રાજધાની દિલ્હીમાં બોલાવ્યા હતા. અહીં કેન્દ્રીય ગૃહ સચિવ અજય કુમાર ભલ્લાએ તેમને સર્ટિફિકેટ આપને અભિનંદન પાઠવ્યા હતા. સરકારે 11 માર્ચ-2024ના રોજ સીએએ કાયદો લાગુ કર્યો હતો.

આ કાયદા હેઠળ ભારતના ત્રણ પડોશી દેશ પાકિસ્તાન, બાંગ્લાદેશ અને અફઘાનિસ્તાનમાં ધાર્મિક ઉત્પીડનના શિકાર બનેલા બિન મુસ્લિમ શરણાર્થીઓને ભારતીય નાગરિકતા આપવામાં આવે છે. જોકે જે લોકો 31 ડિસેમ્બર-2014 અથવા તે પહેલા ભારત આવ્યા હોય, તેમને જ ભારતીય નાગરિકતા આપવામાં આવે છે. સીએએ કાયદા હેઠળ પડોશી દેશોમાંથી આવેલા હિન્દુ, શીખ, જૈન, બૌદ્ધ, પારસી અને ખ્રિસ્તીઓએ અરજી કરી હતી, તેમાંથી 300 લોકોને ભારતીય નાગરિકતા અપાઈ છે.

આ કાયદો પાંચ વર્ષ પહેલા એટલે કે વર્ષ 2019માં મંજૂર થયો હતો, પરંતુ 11-માર્ચ 2024માં લાગુ થયો છે. વિરોધ પક્ષોએ આ મુદ્દે ખુબ જ વિરોધ નોંધાવ્યો હતો અને કડક વલણ પણ જોવા મળ્યું હતું. આ કાયદા અંતર્ગત ભારતીય નાગરિકતાની વ્યાખ્યા નક્કી કરવામાં આવી છે. આ કાયદા હેઠળ પાકિસ્તાન, બાંગ્લાદેશ અને અફઘાનિસ્તાનમાં ધાર્મિક ઉત્પીડનના શિકાર બનેલા બિન મુસ્લિમ શરણાર્થીઓને ભારતીય નાગરિકતા આપવાની જોગવાઈ છે.

ગુજરાત વંદનના whatsapp ચેનલમાં જોડાવા આ લિંક પર ક્લિક કરોઃ‎

https://shorturl.at/hjzN0